ရေဝ်၊ ဂျောန်(၁၅)
တွဵုရးဍုၚ်မန်၊ ပွိုၚ်ဍုၚ်ရေဝ်လလောၚ်တြးလဝ်ပရေၚ်အုပ်ဓုပ်ပၞာန်ဂှ် ပ္ဍဲအခိၚ်ခြာဟွံလအ်ဏံ သၠုၚ်ပ္တိုန် အာပရေၚ်ပၞာန်ဏောၚ်ဂှ်ရ ညးဍုၚ်ကွာန်တံ ပၟိက်ဟွံမွဲမွဲသာ် လ္ပအာတရဴညိဂှ် ဂကောံဒပ် စဵုဒၞါညးဒေသ ရေဝ် ဒုၚ်လဝ်ဂုဏ်ရ။
ပ္ဍဲအခိၚ်ဗွဲကြဴဏံ ပ္ဍဲသ္ကုတ်ဂၠံၚ် မတ်မလီု-ရေဝ်ဂှ် ဟိုတ်နူဒပ်ကံၚ်ဇြဳပၞာန်တံ သုၚ်စောဲကွဳစက်အရာပ်တံတုဲ ပတောံအာကၠုၚ်မံၚ်ဂှ်ရ ဒးဒုၚ်လဝ်ဂုဏ်ဗီုလၟုဟ်ဏံရဂှ် သ္ဂးရ။
ဟိုတ်ဂှ်ရ နကဵုညးဒေသတံ ပၟိက်ဟွံမွဲမွဲသာ် ညံၚ်ဟွံဂွံအာတရဴကီု၊ ယဝ်ရ ဂကောံဒပ်စဵုဒၞါဒေသတံ စၟဳတ်ကၠုၚ်မ္ဂး သွက်ဂွံဒုၚ်စၟဳတ်နကဵုစေတနာအးအးကီု၊ ယာဉ်ဖ္ဍိုက်မၞိဟ်ယဲတံလေဝ် ညံၚ်ဟွံဂွံဒဳ လ္တူကဳလို ၈၀ဂှ် ဖ္တိုက်ဖ္အောဝ်လဝ်ရ။

သ္အာၚ်နူဂှ်ပၠန် နကဵုယာဉ်ဖ္ဍိုက်မၞိဟ်ယဲတံ တိုန်အာမတ်မလီုတုဲဗက် အခိၚ်သ္ဂာဗ္တံ ညံၚ်ဟွံဂွံစှ်ေကၠုၚ်ပၠန်ဂှ် ညးတာလျိုၚ်ဒပ်စဵုဒၞါညးဍုၚ်ကွာန်ရေဝ် ဗိုလ်ယာန်နာၚ် ဒုၚ်လဝ်ဂုဏ်ရ။
သ္ကိုပ်ဌာနဒပ်ပၞာန်ဗၠးၜးကောန်ဂကူကရေၚ် KNLA တမ်ဒပ်(၂၇)ဂှ်လေဝ် ပ္ဍဲသ္ကုတ်ဂၠံၚ် တွဵုရးဍုၚ်မန် ကဵုရးတၞၚ်သဳတံဂှ် ကၠောန်သ္ပအာပွချဳဒရာၚ်ထိၚ်ဒဝ်တံဂှ်ရ ညံၚ်ဂွိုအ်အာတရဴ အဖဝ်ဂကောံဒပ် ကံၚ်ဇြဳပၞာန်တံလ္တူကွဳစက်မွဲစွံကီု၊ လ္တူကွဳစက်တံဂှ် ညံၚ်ဂွိုအ်ဖ္ဍိုက်ပ္တိုန်လဝ် ကပေါတ်ဆေၚ်စပ်ကဵု ကံၚ်ဇြဳပၞာန်တံကီု၊ သွက်ဂွံဒုၚ်ကေတ်ပွစၟဳတ်တံနကဵုစေတနာအးအးဂှ် လလောၚ်ပ္တိတ်လဝ် လိက်ကဵုသတိ ပ္ဍဲဂိတုဂျောန် စၟတ်တ္ၚဲ(၁၀)ဂှ်ရ။

အမိၚ်ဏံဂှ် စနူဂိတုဂျောန်စၟတ်တ္ၚဲ(၁၅)ဏံ လမျီုစလုပ်အာရောၚ်တုဲ နကဵုညးဍုၚ်ကွာန်တံ ဟွံဒေါံဟွံဂွံ သွက်ဂွံဒ္ဂေတ်ဗက်ကဵု တၚ်စေဝ်ပၞောန်မလလောၚ်တြးလဝ်တံအိုတ်ညိဂှ် သ္ကိုပ်တမ်ဒပ် တမ်ဒပ်(၂၇) သ္ကိုပ်ဌာန KNLA သဝ်နေဝ်ဒါထူ ကဵုလဝ်သတိရ။
ပွိုၚ်ဍုၚ်ရေဝ်ဂှ် ပ္ဍဲကာလဒပ်ပၞာန်သီအဝဵုဏံ တမ်ဒပ်ကံၚ်ဇြဳပၞာန်၊ ဗ္ဒိုပ်ဒပ်တံကဵု ရုၚ်နူဌာနမဆေၚ်စပ်တံ ဒးဒုၚ်ဗ္တိုက်မံၚ်မွဲဏှမွဲဏှတုဲ ဟိုတ်နူပရေၚ်လေၚ်ဒိုက်ဇီုကပိုက်ဂၠိုၚ်ကၠုၚ်မံၚ်ဂှ်ရ ဒှ်ကၠုၚ်ဒေသ လ္ပာ်ကံၚ်ဇြဳပၞာန်တံ ဒးဗလးကၠုၚ်တဲ ကုတိဍာ်လ္ၚဵုတံ မွဲရ။
ပရိုၚ်-သြၚ်လောန်တိုၚ်မ်
ဗီု- Ye PDF

