မွဲကာလသီအဝဵုဏံ ကောန်အရာပ် ဒးဒုၚ်ပြိုက်ဂစိုတ်လဝ် ဗ္ဒာဲ ၄၀၀၀ နွံကၠုၚ်

လဂုၚ်၊ ဂျောန်(၁၅)

ပ္ဍဲမွဲကာလဒပ်ပၞာန်သီအဝဵု ကၟိန်ဍုၚ်ဗၟာ ပွိုၚ်(၂)သၞာံပြၚ်ဏံ ကောန်အရာပ် ဒးဒုၚ်ပြိုက်ဂစိုတ်လဝ် စဵုကဵု ဗ္ဒာဲ ၄၀၀၀ တၠ နွံကၠုၚ်တုဲ ပ္ဍဲကဵုဂှ် ကောန်ဗော် NLD (၉၀)တၠပြၚ် ပါလုပ်ဒၟံၚ်ရဂှ် ဗဟဵုဗော်ဒဳမဝ်ကရေဇြဳ ကောန်ဂကူ NLD လလောၚ်တြးလဝ် ပ္ဍဲဂိတုဂျောန် စၟတ်တ္ၚဲ (၁၃) ဂှ်ရ။

ဒုၚ်သ္ဇိုၚ်ကဵု တၚ်ဂၞၚ် ဂကောံကံၚ်ကေတ်တၚ်ဂၞၚ်စၟတ်သမ္တီ ပရေၚ်ဖံက်ပ္ကဝ်အခေါၚ်အရာမၞိဟ် ဗော်ဒဳမဝ် ကရေဇြဳကောန်ဂကူ ပကောံပ္ကေဝ်ဂွံလဝ် စဵုကဵုဂိတုမေ သၞာံဏံတုဲ ဗော် NLD လလောၚ်တြးလဝ်ရ။

ပ္ဍဲပေါဲရုဲမာဲသၞာံ ၂၀၂၀ ဗော် NLD က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳ က္ဍိုက်လဝ်က္ဍိုပ် ဂွံဇၞးကေတ်လဝ်မာဲ ပေၚ်ၚ်ဂှ် နကဵုတၚ်ထ္ၜးဟိုတ် စရၚ်မာဲဗၠေတ်မှာ ဒပ်ပၞာန် ဂအုပ်သ္ကိုပ်ဗိုလ်ဇၞော် မေန်အံၚ်လှာၚ် က္ဍိုက်လဝ်က္ဍိုပ်ဂှ် ကေတ်ဇြဟတ်ကဵုလွဟ်လက်နက်တုဲ သီကေတ်လဝ် အဝဵုကၟိန်ဍုၚ်ဇၟာပ်ပ်တန်ရ။

ပ္ဍဲတ္ၚဲဒပ်ပၞာန်သီအဝဵု သၞာံ ၂၀၂၁ ဂိတုဖေဖဝ်ဝါရဳ စၟတ်တ္ၚဲ (၁)ဂှ်ဟေၚ် ကံၚ်ဇြဳပၞာန် ရပ်စပ်ထိၚ်ဒဝ်လဝ် ဝန်ဇၞော်အလဵုအသဳ၊ သ္ကိုပ်ဝန်ဇၞော် တွဵုရး ကေုာံ ရးဒေသဇၞော်၊ ကောန်ဗော် NLD ကီု သီုကဵုညးစၞးဇၞး လဝ်မာဲ ပါလုပ် သီုက္ဍိုပ်သ္ကိုပ်ကၟိန်ဍုၚ် အလဵုအသဳညးဍုၚ်ကွာန် ရုဲစှ်ပ္တိုန်လဝ်တအ်ဂှ်ရ။

လ္တူညးဍုၚ်ကွာန်ဓမံက်ထ္ၜးဆန္ဒ ဒစဵုဒစးကဵု ပရေၚ်သီအဝဵုတအ်ဂှ် ကံၚ်ဇြဳပၞာန် ပ္ကီုပရာပ်ပန်ပှော် ပါ်ဒကးကီု၊ ရပ်စပ် ညးပါလုပ်တအ်ကီု၊ ပျဲပျာံပြိုက်ဂစိုတ် ပ္ဍဲဗဒိုပ်စၟဳစၟတ်ကီု၊ စံၚ်ပလီုပြိုက်ဂစိုတ် ကွာန်၊ သ္ၚိဒၟံၚ်မၞိဟ် ကေုာံ ကောန်မၞိဟ်တအ်ကီု၊ ပၠံၚ်ၜးကေတ် ပရေၚ်ပိုၚ်ပြဳညးဍုၚ်ကွာန်ကီု ကလေၚ်ပလန် လဝ်တဲ နကဵုကမၠောန်ပ္ကီုပရာပ်ကြာန်န်ဓဇန်ဓဇန် မပ္တံသာ်ဏံရဂှ် NLD ဟီုသ္ဂးလဝ်ရ။

လ္တူအကာဲအရာဗီုဏံဂှ် ကောန်အရာပ်ညးဍုၚ်ကွာန် ဒစဵုဒစး ဟွံဒုၚ်တဲ ပရေၚ်ဒပ်ပၞာန်သီအဝဵုတအ်ဂှ် မၞိဟ်ဒးဒုၚ်ရပ်ဒက်လဝ်ကဵု ကံၚ်ဇြဳပၞာန် မသက္ကုသၞောဝ်ဂမၠိုၚ် ပံၚ်လၟိဟ် ၁၃၅၀၀ တၠပြၚ် ပ္ဍဲဂှ် ၄၃၀၀ တၠပြၚ် ကလေၚ်ဗၠးတိတ်ကၠုၚ်လဝ်ရ။

ပ္ဍဲကဵုမၞိဟ်ဒးဒုၚ်ရပ်ဒက်ထိၚ်ဒဝ်လဝ် သှ်ေဒၟံၚ် ၉၂၀၀ တၠပြၚ်ဂှ် ညးစၞးကၠတ်ထဝ် (၇၇) တၠကီု သီုကောန် ဗော်ဒဝ်မိုဝ်ကရေဇြဳကောန်ဂကူ (၁၂၀၀) တၠ ပါလုပ်ဒၟံၚ်ရဂှ် တၚ်ဂၞၚ်စၟတ်သမ္တီတအ် ဓမံက်ထ္ၜးလဝ်ရ။

ပၞောဝ်ကဵုညးဒးဒုၚ်ကၟာတ်ဒၞာလဝ် ပရေၚ်ပိုၚ်ပြဳ မပါလုပ် သီုသ္ၚိဒၟံၚ် (၆၂၀) တၠ မနွံဒၟံၚ်ဂှ် ပရေၚ်ပိုၚ်ပြဳ ညးစၞးကၠတ်ထဝ် (၁၇၁) တၠ ပါလုပ်ဒၟံၚ်တုဲ ပရေၚ်ပိုၚ်ပြဳကောန်ဗော် NLD (၃၃၃) တၠတအ်လေဝ် ပါလုပ်ဒၟံၚ်ရ။

သ္အာၚ်နူဂှ်ပၠန် ပ္ဍဲရုၚ်ဌာန်ဂအုပ်ဗော်ကီု သီုရုၚ်ကဆံၚ်ကဆံၚ်တအ်လေဝ် လောန်ၜက်လုပ်တုဲ ပလီုပလာ် လဝ်ကီု၊ ကေတ်ဏာလဝ် ကပေါတ်ကြိယာဗာ ဗော်ပိုၚ်ပြဳလဝ် (၁၅၄) ဝါ နွံကၠုၚ်လဝ်ကီု ပရေၚ်ဒဒှ်သ္ၚိ ဒၟံၚ်ကောန်အရာပ်တအ် ဒးဒုၚ်ပ္ကီုပရာပ်၊ ပၠံၚ်ၜး၊ စံၚ်ပလီုလဝ် ပ္ဍဲကဵုလၟိဟ် ဟွံအောန်နူ (၁၂၀၀) ဝါဂှ် ပံၚ်လၟိဟ်စမြိုၚ် (၅၃၀၀၀) ပြၚ် လီုလာ် ဒးဆောံလေၚ်လဝ်ရ။

ပ္ဍဲကချေၚ်၊ ကရေၚ်ဍာဲ၊ ကရေၚ်၊ ချေၚ်၊ သေတ်ဂါၚ် ကေုာံမဂွေ ဇြဟတ်ရပ်လွဟ်တဝ်စၞေဟ်ကဵု ကံၚ်ဇြဳပၞာန်တဴဒၟံၚ်ဂှ် ပရေၚ်ကံၚ်ဇြဳပၞာန် ကၠောန်သ္ပ ဗတိုက်လဝ်ကဵုပၞာန်ကျာ (၈၆) ဝါဂှ် ကောန်အရာပ် (၃၉၀) ပြၚ် ဒးချိုတ်လဝ်ကီု ညးဒးလဝ်ဘဲဝပ်သ္ကာတ်မြဟ် (၁၅၄) တၠ နွံလဝ်ရဂှ် တၚ်ဂၞၚ်စၟတ်သမ္တီ NLD ဓမံက်ထ္ၜးလဝ်ရ။

နကဵုဂကောံပွဳဗွိုၚ်ကၟိန်ဍုၚ်နာနာ ပါလုပ်သီုအာဇြဳယာန်တအ် မိက်ဂွံကဵုရေၚ်တၠုၚ် လၟေၚ်ကမၠောန် ဓမံက်ပ္တိတ် ကေတ်ကဵုအရေဝ် ဒုဟ်ရာဇဝတ်ကံၚ်ဇြဳပၞာန်က္လိလောန်လဝ် အတိုၚ်သၞောဝ် ဥပဒေကၟိန်ဍုၚ်နာနာ ညံၚ်ဂွံစိုပ်တရဴ လ္တူနူဏံရဂှ် ကဝ်မတဳရေၚ်တၠုၚ်ကေၚ်ကာဗဟဵု NLD ဗတိုက်ဖ္အောဝ်လဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-RFA

Leave a Reply

Your email address will not be published. Required fields are marked *