မိုဝ်ဗျေဝ်၊ ဂျောန် (၁၅)
ဒၞါဲပေါဲဗ္တိုက်သ္ကာတ်မြဟ်ဒၟံၚ် ပယျဵုတွဵုရးသေံ ကဵု တွဵုရးကရေၚ်ဍာဲ ပ္ဍဲမိုဝ်ဗျေဝ်ဂှ် အပ္ဍဲၜါသတ္တာဟဂှ် ဒပ်ကံၚ်ဇြဳပၞာန် ဂစိုတ်လဝ် ညးဍုၚ်ကွာန်ကောန်အရာပ် ၂၀ ဟွံကရောၚ်ဂှ် ဂကောံအပ္ဍဲဒေသတံ လလောၚ်ပ္တိတ်လဝ်ရ။
ပ္ဍဲကဵုညးဒးဒုၚ်ဂစိုတ်ဂယိုၚ် အပ္ဍဲပေါဲဗ္တိုက်တံဂှ် ကောန်ၚာ်သၟတ် သၟဝ် (၁၅) သၞာံ (၃) တၠ ပါလုပ်တုဲ မၞိဟ်ဗြဴ ၅ တၠ၊ မၞိဟ်ချိုတ်သှ်ေတံဂှ် ဒှ်မၞိဟ်တြုံဂမၠိုၚ်ရောၚ် ဂွံတီကေတ်ရ။
ညးဒးဒုၚ်ဂစိုတ်ဂမၠိုၚ်ဝွံ ပ္ဍဲကဵုကွာန် ဒၞါဲကရောၚ်ပၞာန်ကံၚ်ဇြဳပၞာန်တံ ဇက်တိုန်ဂှ် ပန်ဂစိုတ် ညးဍုၚ်ကွာန် တံ နကဵုသေနာတ်တံကီု၊ ဂစိုတ်ဂယိုၚ် ညးမကၟာတ်ဒးမံၚ် အပ္ဍဲပေါဲဗ္တိုက်တံသၟးဟွံက စဵုကဵုသ္ပအဓမ္မ ဂစိုတ်ဂယိုၚ်ဒၟံၚ် ညးဗြဴတံလေဝ် ပါလုပ်ဒၟံၚ်ရ။

ညးတာလျိုၚ် ဂကောံဒပ်စဵုဒၞါညးဍုၚ်ကွာန်မိုဝ်ဗျေဝ်မွဲတၠဂှ် သက်သဳဂွံညာတ်လဝ် ဒဒှ်ရပန်ဂစိုတ်လဝ် ညးဍုၚ်ကွာန်တံ နကဵုသေနာတ်တံဂှ် နွံဒၟံၚ်တုဲ ညးတၠဒုဟ်အဓိက ပ္ဍဲပြဝတံဏံဂှ်ဝွံ ဒှ်ကောန်ဒပ် ကံၚ်ဇြဳပၞာန်တံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“မၞိဟ်မကၟာတ်ဒးမံၚ် ပ္ဍဲပေါဲဗ္တိုက်တံဂှ်လေဝ် ပန်ဂစိုတ်လဝ် နကဵုသေနာတ်တံနွံဂှ် သက်သဳဂွံညာတ် လဝ်နမတ်တံ နွံဒၟံၚ်ရ။ ညးဍုၚ်ကွာန်ဗၠးတိတ်ကၠုၚ်တံလေဝ် နွံရ။ ရံၚ်ကေတ်အရာတံဏံတုဲ ကံၚ်ဇြဳပၞာန် ကၠောန်လဝ်ရောၚ် ဟီုဂွံရ။ ပရူပရာ သ္ပအဓမ္မပလီုပလာ်ထောံ သၟတ်ဗြဴၜါတၠတံ၊ ဂစိုတ်ထောံလဝ် အပါညးတံ၊ ရံၚ်ကေတ်ဝပ်သေနာတ် ပ္ဍဲက္ဍဟ်တံဂှ်မ္ဂး ညအ်ဂှ် ပြဝကံၚ်ဇြဳပၞာန်တံရောၚ် ပိုယ်တံ ဟီုဂွံရ” သာ်ဝွံ သ္ဂးရ။
သ္အာၚ်နူဂှ်ပၠန် ညးဍုၚ်ကွာန်ဂမၠိုၚ်ဝွံ လ္တူဍုၚ်တံဂှ် ဟိုတ်နူပေါဲဗ္တိုက်သ္ကာတ်မြဟ်ဒၟံၚ်ကီုလေဝ် ဒးဆေၚ်ဒၟံၚ်မုက် ကုအကာဲအရာတိသ္ဇက်ဂွံဂြိပ်ဟွံမွဲဂှ်ရ ဒးမံၚ်စံၚ်ဒၟံၚ် ပ္ဍဲကဵုသ္ၚိဒၟံၚ်ညးတံသၟးတုဲ ဒဵုကဵုအခိၚ်လၟုဟ် လ္တူဂၠံၚ်အပ္ဍဲဍုၚ်တံဂှ် ကပှ်ဇွဟွံမာန်ဏီတံကီု၊ မၞိဟ်ကၠေံခၞၚ်ဒၟံၚ် ဟွံအောန်နူကဵု ၃၀ တၠ နွံဒၟံၚ်ယျဂှ် ညးဟီုလဝ်ဏီရ။

ဒပ်ကံၚ်ဇြဳပၞာန်ဝွံ ပ္ဍဲဂိတုဂျောန် (၉) တေံဂှ်လေဝ် ကြဴနူသ္ပအဓမ္မ ကုၝဲကဵုဒေံၜါတၠ အာယုက် ၁၅ ကဵု အာယုက် ၂၀ နူကဵုအရာပ်ဇြဳကာ (၂) ဍုၚ်မိုဝ်ဗျေဝ်တုဲဂှ် ဂစိုတ်ဏာလဝ် ဂတမုက်အပါအံက်ညး တံရောၚ်ဂှ် ဂွံတီကေတ် နူကဵုဂကောံညးဗြဴကယာန်ဂမၠိုၚ်ရ။
ကံၚ်ဇြဳပၞာန် ဟိုတ်နူဂ္စါန်ဒၟံၚ် သွက်ဂွံထိၚ်ဒက် ဍုၚ်မိုဝ်ဗျေဝ် မဒှ်ဍုၚ်လၟိဟ်မၞိဟ်ပိဠက်ပြၚ် မမံၚ်တန်တဴဒၟံၚ်ဂှ်တုဲ စနူဂိတုမေ သတ္တာဟလက္ကရဴအိုတ်တုဲ အကြာဂကောံဇြဟတ်ပၠန်ဂတးတံဂှ် ပေါဲဗ္တိုက်တံ သ္ကာတ်မြဟ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−PDF မိုဝ်ဗျေဝ်

