ယဝ်ရဟွံပါဲပ္တိတ်ကဵု အကံက်ပါ်ပါဲဒၟံၚ် သ္ကိုပ်ဝန်ဇၞော်မ္ဂး ကၟာတ်ထောံတွောတ်တာဏောၚ် အိန္ဒိယဘပဠ

နယူဒေလဳ – ဂျောန်(၁၅)

ယဝ်ရဟွံပါဲပ္တိတ်ကဵု အကံကတွောတ်တာ ပါ်ပါဲဒၟံၚ်သ္ကိုပ်ဝန်ဇၞော်အိန္ဒိယမ္ဂး ကၟာတ်လဒဵုအာ ပရေၚ်သုၚ်စောဲတွောတ်တာ ပ္ဍဲကၟိန်ဍုၚ်ရောၚ်တုဲ သ္အာၚ်နူဂှ် သီုလုပ်စိုပ် ပ္ဍဲသ္ၚိသ္ဇိုၚ်ဝန်တအ်ရောၚ်ဂှ် အလဵုအသဳ ဘပဠလဝ်ရ။ 

တွောတ်တာဂှ် အတိုၚ်ညးပိုၚ်အာဏာအိန္ဒိယတအ် အာတ်မိက်လဝ်ဂှ် ပွမပါဲပ္တိတ်ကဵု အကံၚ်ဟီုပါ်ပါဲဒၟံၚ် မိုဝ်ဒဳ ပယျတ်ပယျတ်ကီု ပွမကၟာတ်လဒဵုကီု ဒးကၠောန်သ္ပကဵုလဝ်ရဂှ် ဂွံတီကေတ်ရ။ 

ညးပိုၚ်ပြဳအာဏာအိန္ဒိယတအ်ဂှ် နူကဵုဂျေတ်ဒိုဝ်ဇြဳ ညးရေၚ်တၠုၚ်ကေၚ်ကာ နူစခၞံဗဒှ်လဝ်တွောတ်တာဂှ်လေဝ် ပ္ဍဲမွဲကာလ ညးကေတ်လဝ်တာလျိုၚ် ရေၚ်တၠုၚ်ဒၟံၚ်ဂှ် ဒးဒုၚ်ကၠောန်သ္ပလဝ် ပရေၚ်ကဵုဇြဟတ်ဓရိုဟ် ဟွံပိုတ်သ္ကုတ်ရဂှ်လေဝ် ဟီုသ္ဂးလဝ်ရ။ 

ညးပိုၚ်ပြဳအာဏာတအ်ဂှ် ပ္ဍဲကၟိန်ဍုၚ်အိန္ဒိယ ကၟာတ်လဒဵုအာ တွောတ်တာရောၚ်ကီု အတိုၚ်ညးတအ်နွံပၟိက် ယဝ်ရဟွံရေၚ်တၠုၚ်ကၠောန်သ္ပကဵုမ္ဂး စဵုကဵုသ္ၚိဒၟံၚ်သ္ဇိုၚ်ဝန်တအ် လုပ်စိုပ်အာရောၚ်ဂှ် ဘပဠလဝ် ဇရေၚ်ဒိုဝ် ပ္ဍဲ Youtube Chat Show ရ။ 

ဝန်ဇၞော်တၚ်ဂၞၚ်အိန္ဒိယဂှ် တၚ်ဒိုဝ်ဇြဳဟီုဂးလဝ်ဂှ် ဒှ်ဆအယာံမာတ် ဂလာန်လီၜန်တုဲ တွောတ်တာဂှ် ဖံက်ပ္ကဝ်ဒၟံၚ် ဥပဒေဒေသန္တရ ထပ်ကဵုထပ်ရဂှ် ဟီုစောတ်စောဲလဝ်ရ။ 

ပၞောဝ်ကဵုကၟိန်ဍုၚ်အာတ်မိက်ကၠုၚ် သွက်ဂွံပါဲပ္တိတ်ကဵု ပရောပရာ ပ္ဍဲလတူတွောတ်တာဂှ် အိန္ဒိယဂှ် ဒှ်ကၟိန်ဍုၚ်မရနုက်ကဵုစတုတ္ထတုဲ ကၠာနူဍုၚ်ညးတအ်ဂှ် ဒှ်ကၟိန်ဍုၚ်ဂျပါန်၊ ရုယှာ ကေုာံ တူရကဳတအ်ရ။ 

ပ္ဍဲဂိတုမာတ်ချ် တုဲကၠုၚ်တေံလေဝ် စပ်ကဵုပရေၚ်ဗက်ဂၠိုက်ဂၠာဲ အာစာတွံဓဝ် သေတ်(ခ်) စိုပ်တၞုၚ်တၞး ပ္ဍဲသၟဝ်ကျာပွိုၚ်ဍုၚ်ပါန်ဂျာပ် ဍုၚ်အိန္ဒိယတုဲ တွောတ်တာ ကၟာတ်လဒဵုလဝ် အကံက်ဂျာနေဝ်လေတ်တအ်ရဂှ် ဂွံတီကေတ်ရ။

ပ္ဍဲသၞာံ ၂၀၂၁ လောန်ကၠုၚ်တေံလေဝ် ပ္ဍဲအခိၚ်ဂိုဝ်ဗေတ်ကၠောံထၞာန်သၠုၚ်ဒၟံၚ်ဂှ် သွက်ဂွံပါဲပ္တိတ်ကဵု ပိုအ်သ် ပါ်ပါဲလဝ် လ္တူအလဵုအသဳ ရပ်စပ်သောၚ်ဒၟံၚ်ဂှ် အလဵုအသဳအိန္ဒိယကဵု လဝ်အမိၚ် တွောတ်တာ သီုကဵု Facebook ဏီရ။ 

Ref: CNA

Leave a Reply

Your email address will not be published. Required fields are marked *