ဘာဗ္တောန်လိက် ပ္ဍဲတိဍာ် KNU ဒးဒုၚ်ပန်ကဵုလွဟ်ဇၞော်တုဲ ကွးဘာ (၃) တၠ ကလိဂွံဝပ်

တံၚ်ဥူ၊ ဂျောန် (၁၆)

အပ္ဍဲဘာဗ္တောန်လိက် တိဍာ်ဒပ်မဟာ (၂) ခရိုၚ်တံၚ်ဥူ ဗော်သွးကောန်ဂကူကရေၚ် KNU မွဲဂှ် ဟိုတ်နူမကမ်လွဟ်ဇၞော် နူဒပ်ကံၚ်ဇြဳပၞာန်တံ မပန်ပှော်လဝ်ဂှ် ဒတုံဗ္တိုဟ်ထ္ကးအာလဝ်တုဲ ကွးဘာဒၟံၚ်ပ္ဍဲဗ္ဒမ်လ္ၚဵုတံ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ပရိုၚ်အပ္ဍဲဒေသတံရ။

တုဲကၠုၚ် ပ္ဍဲဂိတုဂျောန် (၁၄) အခိၚ်ဗ္တံ ၜိုတ် (၁၁) နာဍဳဂှ် ဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်တံၚ်ဥူဂှ် ပေါဲဗ္တိုက်ဟွံမွဲမွဲသာ် ဟိုတ်နူပန်ပှော်စုတ်လဝ် လွဟ်ဇၞော်ကြာန်န်ဂှ်ရ မကမ်လွဟ်ဇၞော် (၁) မ ဒတုံဗ္တိုဟ်ထ္ကးအာလဝ် ဗ္ဒါဲဗ္ဒမ်ကွးဘာတန်သၠုၚ်ထိုဝ်လွဳဝါတံမံၚ် မၞုံအပ္ဍဲပွိုၚ်ဍုၚ်ထာန်တပေန် KNU တံဂှ်ရ။

ဟိုတ်နူမကမ်လွဟ်ဇၞော် ဒတုံဗ္တိုဟ်ထ္ကးအာလဝ်တုဲ ကွးဘာဒၟံၚ်ပ္ဍဲဗ္ဒမ်ဘာ (၃) တၠ ဇီုကပိုက်ကလိဂွံလဝ် ဝပ်တုဲ (၁) တၠ ဝပ်သ္ကာတ်မြဟ်လဝ်ရောၚ် ဂွံတီကေတ်ရ။

ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ် ပ္ဍဲဘာဗ္တောန်လိက်ဂှ်ရ ပြဟ်ဟ်ဏံ ဒးကၟာတ်လဝ် ဘာဗ္တောန် လိက်ဂှ်ရောၚ်ဂှ်လေဝ် ပရိုၚ်တမ်ရိုဟ်အပ္ဍဲဒေသတံ ဟီုရ။

ဘာတန်သၠုၚ်ထိုဝ်လွဳဝါ မၞုံအပ္ဍဲတိဍာ်ဒပ်မဟာ (၂) KNU တံဂှ်ဝွံ ကွးဘာအပံၚ်ဖအိုတ် နွံဒၟံၚ် ဗ္ဒါဲ (၂၀၀၀) တုဲ သီုကဵုဒှ်ဘာဗ္တောန်လိက် သၟဝ်တဲ ဌာနပရေၚ်ပညာ ကေုာံ ယေန်သၞာၚ်ကရေၚ် KECD မဒှ်ဌာန ဗော်သွးကောန်ဂကူကရေၚ် KNU မွဲဂှ်ရ။

ပ္ဍဲတိဍာ်ဒပ်မဟာ (၂) KNU ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ က္တဵုဒှ်လဝ် ပရေၚ်ပန်ပှော် မွဲဏှမွဲဏှတုဲ ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံ မွဲဏှမွဲဏှတုဲ သ္ၚိဌာန်ညးဒေသတံလေဝ် ဒးလွဟ်ဇၞော်လီုလာ်အာလဝ်တံ နွံဒၟံၚ်ရ။

ပ္ဍဲတိဍာ်ဗော်သွးကောန်ဂကူကရေၚ် KNU ဂှ် ပ္ဍဲဂိတုဂျောန်ဏံ ဟိုတ်နူပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တုဲ အပ္ဍဲဘာတန် မၞုံအပ္ဍဲပွိုၚ်ဍုၚ်ကအ်ကြိက် တိဍာ်ဒပ်မဟာ (၆) တံဂှ် ဗုမ်ဗ္တိုဟ်ထ္ကးအာလဝ်တုဲ စမြိုၚ်ဘာတန် ဇီုကပိုက်လီုလာ်အာတံလေဝ် က္တဵုဒှ်လဝ်ဏီရ။

ပပ္တံနူဒပ်ပၞာန်သီအဝဵု သၞာံ ၂၀၂၁ ဂိတုဖေဖဝ်ဝါရဳ (၁) တေံတုဲ ဒဵုကဵုအခိၚ်လၟုဟ် အပ္ဍဲပွိုၚ် ၂ သၞာံဏံ အပ္ဍဲတိဍာ် KNU ဂှ် ဟိုတ်နူပရေၚ်ပန်ပှော်ဗ္တိုက် ဒပ်ကံၚ်ဇြဳပၞာန်တံတုဲ ဘာဗ္တောန်လိက် အပံၚ်ဖအိုတ် (၁၇) မ ဇီုကပိုက်ဒးလီုလာ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ဌာနပရေၚ်ပညာ ကေုာံ ယေန်သၞာၚ်ကရေၚ် KECD တံရ။

ပရိုၚ်−သြၚ်လောန်တိုၚ်(မ်)

ဗီု− CJ

Leave a Reply

Your email address will not be published. Required fields are marked *