ထဝါဲ၊ ဂျောန်(၁၆)
ရးဒေသဇၞော်တၞၚ်သြဳ၊ ပွိုၚ်ဍုၚ်ထဝါဲ၊ ပ္ဍဲဒေသဂြိုပ်ဗၟံက်ဂှ် နူဒပ်ကံၚ်ဇြပၞာန် ပန်ဖျေံလွဟ်ဇၞော်တုဲ ဟိုတ်နူထ္ပက်လုပ်ကၠုၚ်ကရောၚ်ပၞာန်ဂှ်ရ ညးဒေသ နူကွာန် (၇)ကွာန်တအ် ဒးဂြိပ်ဒဴဒၟံၚ်သီုအလုံကွာန်ရဂှ် ဂွံတီကေတ်နူဂကောံဇြဟတ်ပၠန်ဂတးတအ်ရ။

ဒပ်ကံၚ်ဇြဳပၞာန် ဇြဟတ်မၞုံ (၁၀၀) ပြၚ်ဂှ် ပ္ဍဲဂိတုဂျောန် စၟတ်တ္ၚဲ (၁၅) သ္ပတံနူအခိၚ်နူဂယးဂှ် ပန်ဖျေံလွဟ်ဇၞော် ပ္ဍဲဒေသဂြိုပ်ဗၟံက်ထဝါဲ အဆက်ဟွံပိုတ်သ္ကုတ်တုဲ ထ္ပက်လုပ်ကၠုၚ်ကရောၚ်ပၞာန်ရ။
ဟိုတ်နူကရောၚ်ပၞာန် ကံၚ်ဇြဳပၞာန် လုပ်စိုပ်ကၠုၚ်ဂှ်ရ ညးဒေသ နူကွာန်ပ္ဍဲဒေသဂြိုပ်ဗၟံက်ထဝါဲ (၇) ကွာန် ပါလုပ်သီုကွာန်ပကာရဳ၊ တေန်ကာန်တုံ၊ ပခါပ်၊ တယျေတ်ၚုပ်၊ ရမ္မာဇြူ၊ လုက်ကျေတ်ပြောၚ်တအ်ဂှ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ် သီုအလုံကွာန်မွဲရ။

ၜိုန်ရကရောၚ်ပၞာန်ကံၚ်ဇြဳပၞာန် ထ္ပက်လုပ်ကၠုၚ်ကီုလေဝ် စဵုကဵုအခိၚ်လၟုဟ်ဏံ ပေါဲဗတိုက် ဟွံဂွံက္တဵု ဒှ်ဏီတုဲ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရဂှ် ညးတာလျိုၚ်ကရောၚ်ပၞာန်ဒပ်ပံၚ်ကောံထဝါဲ ဟီုကဵု ဌာန်ပရိုၚ်သြၚ်လောန်တို(မ်)ရ။
ပ္ဍဲဒေသဂြိုပ်ဗၟံက်ထဝါဲဂှ် အကြာဒပ်ကံၚ်ဇြဳပၞာန်ကဵု ဒပ်ဂကောံဇြဟတ်ပၠန်ဂတးတအ် ပေါဲဗတိုက် က္တဵုဒှ်ဒၟံၚ် ခြာဟွံလအ်ဟွံလအ်ဂှ်ရ လၟိဟ်ညးဒေသကဝက်ပြၚ်ၚ် ပြံၚ်ကၠောံအာမံၚ်တန်တဴဒၟံၚ် ပ္ဍဲဍုၚ်ထဝါဲကဵု ပ္ဍဲကွာန်ဒၞာဲဗၠးဘဲတအ်ပေၚ်ၚ် နွံကၠုၚ်ဒၟံၚ်ရ။

ပ္ဍဲကဵုဂိတုမေ စၟတ်တ္ၚဲ (၃၁) တုဲကၠုၚ်တေံလေဝ် ကြဴနူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်တေန်ကာန်တုံ မၞုံဒေသဗၟံက်ဂြိုပ်ထဝါဲတုဲဂှ် စံၚ်ပလီုလဝ်သ္ၚိဒၟံၚ် ဟွံအောန်နူ (၆) မရဂှ် ဂွံတီကေတ်နူညးဒေသတအ်ရ။
ပ္ဍဲရးဒေသဇၞော်တၞၚ်သြဳဂှ်မ္ဂး ပ္ဍဲဂိတုမေတုဲကၠုၚ်တေံ မ္ၚးနူပေါဲဗတိုက်ဒပ်ကံၚ်ဇြဳပၞာန်ကဵု ဂကောံဇြဟတ် ဒပ်ပၠန်ဂတးတအ်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ညးဒေသ ၃၄,၀၀၀ ပြၚ် ဒးဂြိပ်ဒဴပါဲ ဓလေတ်ဒၟံၚ်ရဂှ် ဂကောံသုတေသန ပ္ဍဲဒေသဂှ် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- Dawei PDF

