ပဠဝ်၊ ဂျောန် (၁၆)
ရးဒေသဇၞော်တၞၚ်သဳ၊ ပွိုၚ်ဍုၚ်ပဠဝ်၊ ဍုၚ်ပလ၊ ဗ္ဒါဲကွာန်မေန်ပျေန်ဒံၚ်ဂှ် ညးဍုၚ်ကွာန်ဒေသ ၂ တၠ လိုန်ဒးမာၚ်တိုပ်တိတုဲ မွဲတၠချိုတ်အာတုဲ မွဲတၠကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဂျောန် ၁၄ အခိၚ်လဒေါဝ်တ္ၚဲဂှ် ဥူဖိုဝ်လူ အာယုက် ၄၆ ဒၟံၚ်အရာပ် စၟတ် (၃) ဍုၚ်ပလဂှ်ကဵု ကိုဝ်အံၚ်ဇြဝ်လာတ် အာယုက် ၂၆ သၞာံတံဝွံ အခိၚ်အာကပှ်သတ်ချ ပ္ဍဲဂြိုပ် ဗ္ဒါဲကွာန်မေန်ပျေန်ဂှ် လိုန်ဒးလဝ်မာၚ်တိုပ်တိရ။

ဟိုတ်နူလိုန်ဒးမာၚ်တိုပ်တိဂှ်ရ ကိုဝ်အံၚ်ဇြဝ်လာတ်ဝွံ ချိုတ်အာလဝ် ပ္ဍဲဒၞါဲဒှ်ပရူဂှ်တုဲ ဥူဖိုဝ်လူဝွံ ပ္ဍဲကဵုဇကုဇကောဝ်၊ မတ်တံဂှ် ဒးကဝေက်မာၚ် ကလိဂွံလဝ်ဝပ်ဂှ်ရ ပလံၚ်ဗစိုပ်လဝ် ရုၚ်ဂဥုဲပလ ရောၚ်ဂှ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး မာၚ်တိုပ်တိတံဏံဝွံ အခိၚ်ဒပ်ကံၚ်ဇြဳပၞာန်တံ ထ္ပက်ကရောၚ်ပၞာန်ဂှ် ပစူလဝ်ဒှ်မာန်ရောၚ် သ္ၚဳဂၠိပ်ဒၟံၚ်တံ နွံဒၟံၚ်ရ။

တုဲကၠုၚ် ပ္ဍဲဂိတုဂျောန် ၁၁ တေံဂှ်လေဝ် မၞိဟ်တြုံရဲဒေသ ၁ တၠ သွက်ဂွံကၠောန်ဗ္ၚ အဃောစှ်ေအာဝါ လ္ပာ်ပလိုတ်ဗ္ဒိုပ်ဗၠာဲသၟိၚ် ဍုၚ်ပလဂှ် ဒးမာၚ်တုဲ ဇီုကပိုက်ကလိဂွံလဝ်ဝပ် ပ္ဍဲကဵုဇိုၚ်ရ။
ပ္ဍဲပွိုၚ်ဍုၚ်ပဠဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် အပ္ဍဲကာလဒပ်ပၞာန်သီအဝဵုဏံ ဒပ်ကံၚ်ဇြဳပၞာန်ဝွံ သုၚ်စောဲကၠုၚ်မာၚ်တိုပ်တိတံ သာဂၠိုၚ်တုဲ ပ္ဍဲကဵုဗ္ဒါဲပွဳပွူ တမ်ဒပ်၊ ဗ္ဒိုပ်ဒပ်တံဂှ်လေဝ် ပစူမာၚ်တိုပ်တိတံဂှ် ကၠောန်ကၠုၚ်ဒၟံၚ်အဆက်က်ရောၚ် ဂွံတီကေတ် ဇရေၚ်ဂကောံဇြဟတ် ပၠန်ဂတးတံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ

