ပ္ဍဲပေါဲဗတိုက်ပလဝ် ကောန်အရာပ်မွဲတၠ ဒးချိုတ်အာ

ပလဝ်၊ ဂျောန်(၁၈)

ရးဒေသဇၞော်တၞၚ်သြဳ၊ ပ္ဍဲပေါဲဗတိုက်ၜါလ္ပာ်က္တဵုဒှ်လဝ် ဗ္ဒာဲကွာန်ပဝေါတ်ကုမ် ပွိုၚ်ဍုၚ်ပလဝ်ဂှ် ကောန်အရာပ်မွဲတၠ ဒးချိုတ်လဝ်ရဂှ် ညးဒေသကီု သီုညးတာလျိုၚ်လလောၚ်ပရိုၚ် တံဒပ် (၁)ခရိုၚ်ဗိက်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

တ္ၚဲဏံ ဂိတုဂျောန် စၟတ်တ္ၚဲ (၁၇) အခိၚ်ဒေါဝ်တ္ၚဲ (၂) နာဍဳဂှ် အခိၚ်ဒပ်စဵုဒၞာဒေသတအ် စၟဳစၟတ်ဒၟံၚ် ယာဉ်ကွဳစက်အာတရဴ ပ္ဍဲဗ္ဒာဲကွာန်ပဝေါတ်ကုမ်ဂှ် နူလ္ပာ်ဒပ်ကံၚ်ဇြဳပၞာန် ကၠုၚ်ပန်ပှ်ောလဝ်တုဲ ပေါဲဗတိုက်ၜါလ္ပာ် က္တဵုဒှ်လဝ်ရ။

ပ္ဍဲပေါဲဗတိုက်ၜါလ္ပာ် က္တဵုဒှ်လဝ် အခိၚ်ပွိုၚ် (၁၀) မိနေတ်ပြၚ်ၚ်ဂှ် ကိုဝ်ဝဏ္ဏတိုဝ် အာယုက် (၄၀) သၞာံ ဒဳကၠုၚ်ကွဳစက်ပ္ဍိုက်တၟံ ဒၟံၚ်ပွိုၚ်ဍုၚ်တၞၚ်သြဳဂှ် ပ္ဍဲဒၞာဲက္တဵုဒှ်ပရေၚ်ပရောဂှ်ဟေၚ် ဒးလွဟ်မကမ်တုဲ ဒးချိုတ်အာရ။

ညးဒေသဒးချိုတ်လဝ် ပ္ဍဲပေါဲဗတိုက်ဂှ် ဂကောံသ္ၚိကၟိန်အိန်ထံၚ်ညး ကၠုၚ်ကေတ်ဏာလဝ်ရဂှ် ဂွံတီကေတ်ရ။

ကြဴနူပရေၚ်ပန်ပှ်ောတုဲဂှ် ဒပ်ကံၚ်ဇြဳပၞာန် ဒဳဓရိပ်ဏာကွဳစက် လ္ပာ်ဍုၚ်ပလဝ်တုဲ ပ္ဍဲပရေၚ်ပန်ပှ်ောဏံ လ္ပာ်ဂကောံဇြဟတ်ပၠန်ဂတးတအ် ဇီုကပိုက်ဒးလဝ်ဝပ် ဟၟဲရဂှ် ညးတာလျိုၚ်လလောၚ်ပရိုၚ် ခရိုၚ်ဗိက် တံဒပ် (၁) ဟီုသ္ဂးလဝ်ရ။

ပွိုၚ်ဍုၚ်ပလဝ် လလောၚ်တြးလဝ် ပရေၚ်အုပ်ဓုပ်ပၞာန်ဂှ် ပ္ဍဲမွဲကာလ ဒပ်ပၞာန်သီအဝဵု ပွိုၚ် (၂) သၞာံပြၚ်ဏံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်က္တဵုဒှ်ဒၟံၚ် ခြာဟွံလအ်ဟွံလအ်တုဲ ဒေသလ္ပာ်ကံၚ်ဇြဳပၞာန် ဒးဗလးထောံလဝ်တိဍာ် မွဲဒေသလလေဝ် ဒှ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်- ဃော PDF ဒေသတအ်စၟဳစၟတ်ဒၟံၚ် ယာဉ်အာတရဴ ပ္ဍဲဂၠံၚ်ပလဝ်။

Leave a Reply

Your email address will not be published. Required fields are marked *