ဗိက်၊ ဂျောန်(၁၈)
ရးဒေသဇၞော်တၞၚ်သြဳ၊ ပွိုၚ်ဍုၚ်ဗိက် ညးမဒှ်ကော ညးစၞးကၠတ်ထဝ် ဗော်ဒဳမဝ်ကရေဇြဳကောန်ဂကူ NLD ဂှ် ကြဴနူဒးဒုၚ်ရပ်လဝ်တုဲ ဒးချိုတ်အာ ပ္ဍဲပရေၚ်စၟဳစၟတ်ရဂှ် ညးစုက်လုက်ကဵု ဂကောံသ္ၚိကၟိန်ညးတအ် ဟီုကဵု ဌာန်ပရိုၚ်သြန်လောန်တိုၚ်(မ်)ရ။
ဥူတေန်တာန်ဥူ ညးမဒှ်ကော ညးစၞးကၠတ်ထဝ် ဗော် NLD ဥူမေန်ဇြဝ်တေအ်(ဦးမၚ်းဇော်တင့်)ဂှ် ဒးချိုတ်အာ ပ္ဍဲပရေၚ်စၟဳစၟတ်ရဂှ် နူလ္ပာ်ဒပ်ကံၚ်ဇြဳပၞာန် ကဵုနၚ်ပရိုၚ် ဇရေၚ်ဂကောံကၟိန်အိန်ထံၚ်ညး ပ္ဍဲဂိတုဂျောန် စၟတ်တ္ၚဲ (၁၆) ဂှ်ရ။

ဒပ်ကံၚ်ဇြဳပၞာန်ကဵု ကောန်ဒပ်ဗၠာဲသၟိၚ်တအ်ဂှ် ပ္ဍဲဂိတုဂျောန် စၟတ်တ္ၚဲ (၆) တုဲကၠုၚ်တေံဂှ် သွက်ဂွံသၟာန်စၟဳစၟတ်နွံမံၚ်ဂးတုဲ ကၠုၚ်ကော်ကေတ်ဏာ ဥူတာန်တေန်ဥူ ဒၟံၚ်အရာပ်နောက်လေဝ် ဍုၚ်ဗိက်တုဲ လအ်ပွိုၚ် (၁၀) တ္ၚဲတုဲ ဒဒှ်ရချိုတ်အာဂှ် ကဵုနၚ်ပရိုၚ်ရ။
ၜိုန်ရကဵုကၠုၚ်ပရိုၚ် ဒဒှ်ရဥူတေန်တာန်ဥူ ဒးချိုတ်လဝ် ပ္ဍဲပရေၚ်စၟဳစၟတ်ကီုလေဝ် ကံၚ်ဇြဳပၞာန် ဟွံဂွံပ္အပ်ကဵုဇွ ကုဂကောံသ္ၚိကၟိန်ညးဏီရဂှ် ညးစုက်လုက်ကဵု ဂကောံသ္ၚိကၟိန်ညးမွဲတၠ ဟီုသ္ဂးလဝ်ရ။
ကံၚ်ဇြဳပၞာန်ဂှ် နကဵုတၚ်စောတ်စောဲ ဥူတေန်တာန်ဥူ ထံက်ပၚ်ကဵုဒၟံၚ် ဇွောံမစၞစ ဇရေၚ်ဒပ်စဵုဒၞာညးဍုၚ်ကွာန် PDF ကီု၊ ကဵုဒၟံၚ်ပရိုၚ်ဒပ်ကံၚ်ဇြဳပၞာန် ကု PDF တအ်ကီုဂးတုဲ ကြဴနူရပ်ကေတ်လဝ်ဂှ် ပြိုက်ဂစိုတ်လဝ်ရ။

ဥူမေန်ဇြဝ်တေအ် ညးမဒှ် ညးစၞးကၠတ်ထဝ် ဇၞးလဝ်ပေါဲရုဲမာဲ သၞာံ ၂၀၂၀ ဂှ် ကြဴနူဒပ်ပၞာန်သီအဝဵုတုဲ နူဒပ်ကံၚ်ဇြဳပၞာန် ဗ္ဂပ်စုတ်ၝောံပိုဒ်နာနာသာ်တုဲ ဟိုတ်နူပံက်လဝ်ဂဗုတ်ဂှ်ရ ဒးပါဲဓလေတ်ဒၟံၚ်ရဂှ် ဂွံတီကေတ်ရ။

အတိုၚ်တၚ်လလောၚ်တြး ဗဟဵု ဗော်ဒဳမဝ်ကရေဇြဳကောန်ဂကူ NLD လလောၚ်တြးလဝ်မ္ဂး ပ္ဍဲမွဲကာလဒပ်ပၞာန်သီအဝဵု ပွိုၚ် (၂)ပြၚ်ဏံ ကောန်အရာပ်ဒးဒုၚ်ပြိုက်ဂစိုတ်လဝ် ဗ္ဒာဲ (၄၀၀၀) တၠ နွံကၠုၚ်တုဲ ပ္ဍဲကဵုဂှ် ကောန်ဗော် NLD (၉၀) ပြၚ်ပါလုပ်ဒၟံၚ်ရဂှ် လလောၚ်တြးလဝ် ပ္ဍဲဂိတုဂျောန် စၟတ်တ္ၚဲ(၁၃)ဂှ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-MZT FB

