ဟိုတ်နူဒှ်ဓဝိၚ်ဂွိၚ်ဖေက်ရုယှာပလီုပလာ် စမြိုၚ်သ္ဇိုၚ် သၟဝ်ဍာ်တုဲ နေတိုဝ်မၚ်ရံၚ်ကျောဝ်ဒၟံၚ်

ဝါယှေန်တာန် -ဂျောန်(၁၈)

ဂကောံနေတိုဝ်ဂှ် ကြဴနူပၠံၚ်သၟုဟ်ဓာတ်နအ်ဒ်သထွေန် ဒးဒုၚ်ဗတိုက်လဝ်တုဲ ဟိုတ်နူပရိုၚ်ရုယှာ ပ္တိတ်ဒၟံၚ်ဗီုရုပ်တိ စမြိုၚ်သ္ဇိုၚ် သၟဝ်ဍာ် ပၟိက်ကိစ္စဇၞော် မၞုံပ္ဍဲဗွိုၚ်ဥရောပဂှ်တုဲ သွက်ဂွံစဵုဒၞာ ပၠံၚ်သၟုဟ်ဓာတ် သၟဝ်ဍာ်ကဵု ဇုက်ကေဗာဂှ် ဒက်ပ္တန်ကၠုၚ်ဇြေန်တာမွဲရ။

ပ္ဍဲကောံဓရီုကၠောန်ဗဒှ်လဝ် ပ္ဍဲဘရာပ်သေဝ်လ်ဂှ် ဝန်ဇၞော်ပရေၚ်စဵုဒၞာနေတိုဝ်တအ် သွက်ပရေၚ်ဂီုကၠီု စမြိုၚ်သၟဝ်ဍာ် ပၟိက်ကိစ္စဇၞော်တအ်ဂှ် သ္ပလဝ်ဒ္တန် အစဳဇန်ဌာနပရေၚ်အာကၠုၚ်တရဴဍာ် ဗဟဵုရဂှ် ညးအုပ်ကာနာနာ ဂျာန်သ်သတအ်တာန်ဘာက် ဟီုသ္ဂးလဝ်ရ။

ဇြေန်တာဏံဂှ် ဖျေံသ္ဇိုၚ် ပ္ဍဲဌာန်ဂအုပ်ဒပ်ပၞာန်ဍာ်နေတိုဝ် မၞုံနအ်ဝုတ် ဗ္ဒာဲလာန်ဒါန်ဂှ်တုဲ မ္ၚးနူမှာသၟိဒ် အတ္တလာန်တိတ်ဂှ် ကေတ်အာတာလျိုၚ် သွက်ဂွံဖန်ဗဒှ်သၞောတ်မၚ်ရံၚ်ထံၚ်ပရိုၚ် ဨရိယာ မၞုံပ္ဍဲက္ၜဳသၟဝ် ကျာ၊ က္ၜဳဗဝ်တေတ်၊ က္ၜဳဒမျိုဟ်ကဵု က္ၜဳပ္ဍဲဗလးတိရောၚ်ဂှ် ဂွံတီကေတ်ရ။

ပရေၚ်ပ္တိတ်ဇြဟတ် သွက်ဂွံစဵုဒၞာ စမြိုၚ်သ္ဇိုၚ်သၟဝ်ဍာ် ကၟိန်ဍုၚ်ပလိုတ် ပၟိက်ကိစ္စဇၞော်တအ်ဂှ် ဒှ်ပရေၚ် ကလေၚ်ပလန်တဲ ဟိုတ်နူကၠောန်သ္ပလဝ် ကမၠောန်ပလီုပလာ် ပၠံၚ်သၟုဟ်ဓာတ်သဘာဝ နတ်သထွောန် (၁) ကဵုနတ်သထွောန်(၂) ဂှ်ရဂှ် ဂွံတီကေတ်တုဲ ပ္ဍဲလကြဴပရေၚ်ပရော ပၠံၚ်သၟုဟ်ဓာတ် ဒးဒုၚ်ပလီုပလ်ာ လဝ်တုဲ ညးလဵု ရပ်ဒၟံၚ်ဇုက်ရောဟီုဂှ်မ္ဂး ဟွံဂွံတီကေတ်လဝ် ကၠးကၠးဖ္ဍးဖ္ဍးဏီရ။

က္ၜၚ်ကရုယှာတအ်ဂှ် ပ္တိတ်ကေတ်လဝ် ဗီုရုပ်တိ စမြိုၚ်သ္ဇိုၚ် သၟဝ်ဍာ်မဟာမိတ်ဍုၚ်ပလိုတ် ပၟိက်ကိစ္စ ဇၞော် မၞုံပ္ဍဲဗလးက္ၜဳတအ်ရဂှ် နေတိုဝ် ဟီုသ္ဂးလဝ်ရ။

ပရေၚ်ဘပဠ ဂၠိုၚ်တိုန်ကၠုၚ်ဒၟံၚ်ရဂှ် ဂအုပ်ဗိုလ်ဂျာမာန် သၞံၚ်ပိဍောၚ်တြေံ ဟာန်သ်ဝါနာ ဝိုၚ်ယာမာန်ဂှ် ရုယှာဆဝ်ပ္ၚုဟ်လဝ် သွက်ဂွံကလေၚ်ပလန်တဲကဵု ပရေၚ်ပရောထံၚ်ပရိုၚ် သၟဝ်ဍာ် ပ္ဍဲဨရိယာနေတိုဝ်ရဂှ် သောၚ်ထ္ၜးလဝ်ရ။

“က္ၜၚ်ရုယှာတအ် ပ္တိတ်ကေတ်ဒၟံၚ်ဗီုရုပ်တိ စမြိုၚ်သ္ဇိုၚ်ပိုဲ သၟဝ်ဍာ်ပၟိက်ကိစ္စဇၞော်ဒၟံၚ်ဂှ်ရ။ အရာဏံ သွက်ဂွံဒှ်ပရေၚ်ပလာပ်ပထုဲဍုၚ်ပလိုတ် ရုယှာပ္တဝ်ကၠုၚ်ကဵု ဇုက်ကေဗာသၟဝ်ဍာ်ကဵု စမြိုၚ်သ္ဇိုၚ်ပၟိက် ကိစ္စဇၞော်တၞဟ်တအ်ဟာဂှ် ပရေၚ်ဒးဒှ်ဓဝိၚ် ဂၠိုၚ်တိုန်ကၠုၚ်ဒၟံၚ်ရ” ဂှ် ညးဟီုလဝ်ကဵု သၟာပရိုၚ်တအ် ပ္ဍဲဌာန်ဂအုပ်နေတိုဝ် မၞုံပ္ဍဲဍုၚ်ဗရာပ်သေဝ်ဂှ်ရ။

ဇြေန်တာနေတိုဝ်တၟိဂှ် သွက်ဂွံပါ်တြးတၚ်ဂၞၚ် ဆေၚ်စပ်ကဵုအန္တရာယ် ကေုာံပရေၚ်ဘပဠ က္တဵုဒှ်ဒၟံၚ် ဂွံတဴတက်ခိုဟ်တိုန်ကၠုၚ်ဂှ် ညးလုပ်ဂကောံနေတိုဝ်တအ် ၊ မဟာမိတ်တအ် ကေုာံကဏ္ဍပုဂ္ဂလိ ကတအ်ဂှ် ဒးသှ်ပတဴအာ မွဲကရောံမွဲစွံတုပ်ပ်ရောၚ်ဂှ် ညးဟီုသ္ဂးလဝ်ဏီရ။

ပ္ဍဲကဵုက္ၜဳသၟဝ်ကျာမွဲဓဝ်ဟေၚ်ဂှ် ပၠံၚ်ကၠေၚ်ဍေန် ကေုာံပၠံၚ်သၟုဟ်ဓာတ်သဘာဝ ဆက်စၠောံလဝ် မၞုံဒၟံၚ် ၜိုတ်(၈၀၀၀)ကဳလောမဳတာတုဲ သွက်ဂွံမၚ်ရံၚ်ကျောဝ် သၞောတ်သၟဝ်ဍာ်၊ ကောန်ဂရေတ် ကေုာံ ဂရာပ် သ္အာၚ်နူဂှ် လၟိုန် ဒှ်ဒၟံၚ်အကာဲအရာ ဒှ်ဟွံမာန်ရဂှ် ဂွံတီကေတ်ရ။

“ပ္ဍဲသၟဝ်ဍာ်ဏံ မွဲကရောံကဵု စမြိုၚ်သ္ဇိုၚ်ဂၠိုၚ်ကဵုလ္ၚီကဳလောမဳတာ သွက်ဂကောံနေတိုဝ် ဂွံနွံတန်တဴ ဒၟံၚ်မွဲစွံလၟိုန် နဲလဵုလေဝ် ဒှ်ဟွံမာန်ရ။ ဆ္ဂးပ္ဍဲ ကဏ္ဍပုဂ္ဂလိက ပရေၚ်ချဳဒရာၚ်က္ၜၚ်ကဵု ပရိုၚ်တၚ်ဂၞၚ် ဆေၚ်စပ်ကဵု ပရေၚ်မၚ်ရံၚ်ကျောဝ်တအ် နွံဒၟံၚ်ဗွဲမဂၠိုၚ်ဂှ်ရ ပွမထံၚ်ပရိုၚ်၊ ပွမပါ်တြးတၚ်ဂၞၚ်ပရိုၚ်၊ ပွမဆက်စၠောံစၟတ်သမ္တီတအ်ဂှ် သာတုဲပကောံပကေဝ် ခိုဟ်ကၠုၚ်ဏောၚ်” ဂှ် ညးအုပ်ကာနာနာနေတိုဝ် ဟီုလဝ်ကဵု သၟာပရိုၚ်တအ် ပ္ဍဲအခိၚ်ကောံဓရီုတုဲဂှ်ရ။

စၞးဒးပ္တိတ်ဇြဟတ် သွက်ဂွံမၚ်ရံၚ်ကျောဝ် သီုညးဖအိုတ်ဂှ် ဇြေန်တာတၟိကဵု မဟာမိတ်နေတိုဝ်တအ် စွံအာအာရီု ပ္ဍဲဒၞာဲပၠံၚ်သၟုဟ်ဓာတ် မၞုံအန္တရာယ်ဂၠိုၚ် ပ္ဍဲဍာ်က္ဍာ သၟာဗၠိုပ်ဍာ်တအ်အာစိုပ် လောဲသွာမာန် တအ်ရောၚ်ဂှ် ဂွံတီကေတ်ရ။

Ref,Aljazeera

Leave a Reply

Your email address will not be published. Required fields are marked *