တၞၚ်သြဳ၊ ဂျောန်(၂၀)
ရးဒေသဇၞော်တၞၚ်သြဳ လလောၚ်တြးလဝ် ပရေၚ်အုပ်ဓုပ်ပၞာန်၊ ပ္ဍဲကွာန်ဗာန်ဗလအ်ကဵု ကွာန်တမဳလှ ပွိုၚ်ဍုၚ်တၞၚ်သြဳဂှ် ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ ပေါဲဗတိုက်ၜါလ္ပာ် သ္ကာတ်မြဟ် ဒၟံၚ်ရဂှ် ညးတာလျိုၚ် ဒပ်စဵုဒၞာညးဍုၚ်ကွာန် (ပကဖ) ရးတၞၚ်သြဳ တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကရောၚ်ပၞာန်ပံၚ်တောဲ ဒပ်ပၞာန်တိုက်ကံၚ်ဇြဳပၞာန် တံဒပ်ခမရ (၅၆၁) ဖျေံသ္ဇိုၚ်ညံၚ်ပေန်ကွေန် သ္ပတံနူ ဂိတုဂျောန် စၟတ်တ္ၚဲ(၁၇) တုဲ ဟိုတ်နူထ္ပက်လုပ်ကၠုၚ်ကရောၚ်ပၞာန်ဂှ်ရ အကြာဒပ်ပံၚ်ကောံ ပေါဲဗတိုက် သ္ကာတ်မြဟ်ဒၟံၚ်ကဵု ဒပ်ပံၚ်ကောံဒပ်စဵုဒၞာဒေသတအ်ရ။
ပ္ဍဲဂိတုဂျောန် စၟတ်တ္ၚဲ (၁၇) ဂှ် ပေါဲဗတိုက်ၜါလ္ပာ် က္တဵုဒှ်လဝ် ဗ္ဒာဲပွိုၚ်မွဲတ္ၚဲတုဲ လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် ဟွံအောန်နူ (၂) တၠနွံတုဲ ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်ဂှ် ညးဒေသ (၂)တၠ ဒးလဝ်ဘဲဝပ်ရ။

သ္အာၚ်နူဂှ်ပၠန် ပ္ဍဲဂိတုဂျောန် စၟတ်တ္ၚဲ (၁၈) ကဵု စၟတ်တ္ၚဲ (၁၉)ဂှ်လေဝ် ပေါဲဗတိုက်ဆက်က္တဵုဒှ်ဒၟံၚ်တုဲ ဒပ်ပံၚ်ကောံ ဒပ်စဵုဒၞာဒေသတအ် ကၟာတ်ဗတိုက်လဝ် ကရောၚ်ပၞာန် ကံၚ်ဇြဳပၞာန်ဖျေံလဝ်ဗဒိုပ် ပ္ဍဲကွာန်တအ်ရဂှ် ညးတာလျိုၚ် (ပကဖ) တၞၚ်သြဳမွဲတၠ ဟီုသ္ဂးလဝ်ရ။
ဟိုတ်နူပေါဲဗတိုက်ၜါလ္ပ်ာတုဲ ညးဒေသ နူကွာန်ညံၚ်ပေန်ကွေန်၊ တြဴမိုၚ်၊ ဇြေန်ခေါၚ်၊ ဗာန်လဝ်၊ ဗာန်လေန်၊ တမဳလှ၊ ဂဝ်တဝ်၊ ယျေပဝ်၊ ဗာန်ကျုပ်၊ တကျေတ်၊ ကျွဲထုၚ်ကုမ် (၃၀၀၀) ပြၚ်တအ်ဂှ် ထောံသ္ၚိဌာန်တုဲ ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ်ရ။

ကွာန်ဗာန်လဝ် ပွိုၚ်ဍုၚ်တၞၚ်သြဳကဵု ကွာန်မၞုံဇိုၚ်ကရပ်ကွာန် ဒပ်ကံၚ်ဇြဳပၞာန် ထ္ပက်လုပ်ကၠုၚ် ကရောၚ် ပၞာန်တအ်ဂှ် ဒေသ ဒပ်စဵုဒၞာဒေသတအ် ထိၚ်ဒဝ်လဝ်အုပ်ဓုပ်လဝ် လေဝ်ဒှ်ရ။
ပ္ဍဲရးတၞၚ်သြဳဂှ် ပ္ဍဲဂိတုမေ တုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ပေါဲဗတိုက်ၜါလ္ပာ်က္တဵုဒှ်လဝ် ဗ္ဒာဲ(၅၀)ဝါ နွံတုဲ ဟိုတ်နူပေါဲဗတိုက်ဂှ် ညးဒေသ (၃၄,၀၀၀) ပြၚ် ထောံသ္ၚိဌာန်တုဲ ဒးဂြိပ်ဒဴဒၟံၚ်ရဂှ် ဂကောံသုတေသနဒေသဂှ် လလောၚ်တြးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – TPDF

