ဒပ်ကံၚ်ဇြဳပၞာန် ကလေၚ်ဆုတ်နူ ဒဳမအ်သဵု

ဒဳမအ်သဵု၊ ဂျောန် (၂၀)

ဒပ်ကံၚ်ဇြဳပၞာန် မဖျေံလဝ်သ္ဇိုၚ် ပ္ဍဲကွာန်ဒဝ်ညေခူ မၞုံသ္ကုတ်ဗၟံက်ဒဳမအ်သဵု တွဵုရးကရေၚ်ဍာဲတံ ထောံ လသာတိဍာ်တုဲ ကလေၚ်ဆုတ်အာလဝ်ဂှ် ပရိုၚ်တမ်ရိုဟ်အပ္ဍဲဒေသတံ ဟီုကဵု ဌာန်ပရိုၚ် သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန် မဖျေံလဝ်သ္ဇိုၚ် ပ္ဍဲကွာန်ဒဝ်ညေခူဂှ်ဝွံ ပ္ဍဲဂိတုဂျောန် (၁၄) တုဲကၠုၚ်တေံ ကလေၚ်ဆုတ် တိတ်အာလဝ် နကဵုကွဳစက်ပၞာန် (၁၀) ဖ္ဍိုက်ရ။

ဒပ်ကံၚ်ဇြဳပၞာန် မကလေၚ်ဆုတ်စ္ဍးအာဂှ်ဝွံ တုဲကၠုၚ် ပ္ဍဲဂိတုမေ (၂) တေံ လုပ်စိုပ်ကၠုၚ်လဝ် ပ္ဍဲဂကောံ ကွာန်ဒဝ်တမကျဳတုဲ ဖျေံလဝ်သ္ဇိုၚ် ပ္ဍဲကွာန်ဒဝ်ညေခူ ကေုာံ ကွာန်ဒဝ်သဵုဖျတံရ။

ဒပ်ကံၚ်ဇြဳပၞာန် မဆုတ်ကလေၚ်ထောံဒပ်ဂှ်ဝွံ နူကဵုကွာန်ညးဍုၚ်ကွာန်တံ သ္ပဒတဴတံဂှ် ၜိုန်ရကလေၚ်ဆုတ်တိတ်အာကီုလေဝ် ပစူလဝ်မာၚ် ဗွဲမဂၠိုၚ်ဂၠေၚ်နွံဒၟံၚ်ရောၚ် ဥူဗညာ မဒှ်ညးအုပ်ကာဖက်ဆော ကံၚ်ဇြဳအုပ်ဓုပ်အခိၚ်ကာလအကြာ ကရေၚ်ဍာဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန် ကလေၚ်ဆုတ်စ္ဍးအာ သာ်ဏံဂှ်ဝွံ ပ္ဍဲကဵုဍုၚ်မိုဝ်ဗျေဝ် ပယျဵုတွဵုရးကရေၚ်ဍာဲဂှ် ဟိုတ်နူပေါဲဗ္တိုက်တံ သ္ကာတ်မြဟ်ဒၟံၚ်ဂှ်ရ အာကဵုရီုဗၚ်ပၞာန်လေဝ် ဒှ်မာန်ရောၚ် ညးသ္ဂးရ။

အခိၚ်လၟုဟ်ဂှ် ပ္ဍဲကဵုပွိုၚ်ဍုၚ်မိုဝ်ဗျေဝ် ကဵု ဗၟံက်ၜဳသြၚ်လောန်၊ ပယျဵုဍုၚ်သေံကဵု တွဵုရးကရေၚ်ဍာဲတံဂှ် ကံၚ်ဇြဳပၞာန်ကဵု ဂကောံဒပ်စဵုဒၞါဒေသတံ ပေါဲဗ္တိုက်တံ သ္ကာတ်မြဟ်ဒၟံၚ်ရောၚ် ဂွံတီကေတ်ရ။

ဟိုတ်နူပေါဲဗ္တိုက်ဂမၠိုၚ်တုဲ ညးဍုၚ်ကွာန် (၂) ကိုဋ်ပြၚ် နူကဵုတွဵုရးကရေၚ်ဍာဲဂှ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံဂှ်တုဲ သွက်ညးတံ နွံပၟိက်ဒၟံၚ်ကဵု ဇွောံမစၞစသ္ဇိုၚ်တံကဵု ကပေါတ်အရပ်စပ် ကာတၟေၚ်ရောၚ်ဂှ် ဂကောံအပ္ဍဲဒေသတံ ဟီုဂးလဝ်ရ။

တွဵုရးကရေၚ်ဍာဲ မကြပ်ကဵုနေဗျဳဒဝ် ဒၞါဲဒတန်ရုၚ်ကံၚ်ဇြဳပၞာန်တံ ဖျေံသ္ဇိုၚ်ဂှ် သွက်ဂွံထိၚ်ဒက်ဍိုက်က်ပေၚ်ၚ်မာန်ဂှ် ကံၚ်ဇြဳပၞာန်တံ ထ္ပက်ဒၟံၚ်ကရောၚ်ပၞာန်ရ။

ပရိုၚ်−သြၚ်လောန်တိုၚ်(မ်)

ဗီု−အဃောဒပ်ကံၚ်ဇြဳပၞာန် ဆုတ်တိတ်အာ အလန်ပထမတေံ ဗီုဂွံဆဵုကေတ် ဂကောံဒပ်စဵုဒၞါညးဍုၚ်ကွာန်တံ ပ္ဍဲကဵုဒဝ်ညေခူ

Leave a Reply

Your email address will not be published. Required fields are marked *