ရုၚ်ကိုန်စဳမာန်တိဗ္ၚ ပွိုၚ်ဍုၚ်ၜဳကလေၚ် ဒးဒုၚ်ဖံက်ဗ္တိုဟ်မာၚ်

ၜဳကလေၚ်၊ ဂျောန် (၂၀)

ရုၚ်ကိုန်စဳမာန်တိဗ္ၚ ဍုၚ်အံၚ်သာန်တၟိ မၞုံကွာန်ဒံၚ်သောန် ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်ဝွံ ဟိုတ်နူဒးဒုၚ်ဖံက်ဗ္တိုဟ်လဝ်မာၚ်ဂှ်ရ စမြိုၚ်ရုၚ်အတိုၚ်မွဲမ ဇီုကပိုက်လီုလာ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကိုန်စဳမာန်တိဗ္ၚယာယဳ ဒၞါဲကောန်ဒပ်ကံၚ်ဇြဳပၞာန်တံကီု သီုကဵုညးယိုက်ဝန်နူကဵုဌာနမဆေၚ်စပ်တံ လေပ်ကၠုၚ်စိုပ်မွဲဏှမွဲဏှဂှ်ဝွံ ပ္ဍဲဂိတုဂျောန် (၁၈) အခိၚ်လဒေါဝ်တ္ၚဲတေံ ဒးဒုၚ်ဖံက်ဗ္တိုဟ်လဝ်မာၚ်ရ။

ဟိုတ်နူဒးဒုၚ်ဖံက်ဗ္တိုဟ်လဝ်မာၚ်ဂှ်ရ စမြိုၚ်ရုၚ်ဂှ်ကြပ်မွဲမ ဇီုကပိုက်လီုလာ်အာလဝ်တုဲ မၞိဟ်ဇီု ကပိုက်ကလိဂွံဝပ် ဟွံမွဲရပုဟ်ဂှ် ညးဒေသမွဲတၠ သ္ဂးရ။

ရုၚ်ဂှ်ဝွံ ရဲရာန်လဝ်တိ ပ္ဍဲကဵုအရာပ်အံၚ်သာန်တၟိ ကွာန်ဒံၚ်သောန်တံ အခိၚ်ပၠောပ်အခေါန်တိဗ္ၚ မွဲပွူတုဲမွဲပွူဂှ် ဒှ်ဒၞါဲရုၚ် သၞာဲဒဴ နူကဵုဌာနစရၚ်တိတံ၊ ဂကောံအုပ်ဓုပ်ကွာန်တံ ကေုာံ ဒပ်ကံၚ်ဇြဳပၞာန်တံ ကၠုၚ်စိုပ်မံၚ်ဒၟံၚ်ရောၚ်ဂှ် ဂွံတီကေတ်ရ။

ကောန်ဂကောံဒပ် PDF ဒေသမွဲတၠဂှ် ပစူမာၚ် ၅ မတုဲ သွက်ဂွံဖံက်ထ္ကး ရုၚ်ကိုန်စဳမာန်တိဗ္ၚဂှ် ပလေဝ် ပလေတ်လဝ်ကီုလေဝ် မာၚ် ၂ မ မပစူလဝ် ဂတမုက်ရုၚ်ဂှ် ဟွံထေၚ်လဝ်မွဲသာ် က္တဵုဒှ်ဗ္တိုဟ်ထ္ကးအာဂှ်ကီု မာၚ်သှ်ေ ၃ မဂှ် အခိၚ်ကံၚ်ဇြဳပၞာန်တံ ကၠုၚ်စိုပ်ပလီုပလာ်ဂှ် စမြိုၚ်ရုၚ်ဂှ် သရိုဟ်စှ်ေအာလဝ်ရောၚ် ဟီုရ။

ပ္ဍဲကဵုလၟေၚ်ဒဒှ်မာၚ်ဗ္တိုဟ် စမြိုၚ်ရုၚ်ဂှ် ကောန်ဒပ်ဗၠာဲသၟိၚ် ကံၚ်ဇြဳပၞာန်ၜါတၠ ဒးဒှ်ရကလိဂွံလဝ်ဝပ်ဂှ် လ္ပာ် PDF တံ ဟီုဂးဒၟံၚ်နွံကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ရ။

ကြဴနူစမြိုၚ်ရုၚ် မာၚ်ဗ္တိုဟ်ထ္ကးတုဲဂှ် လ္ပာ်ကံၚ်ဇြဳပၞာန် ကၠောန်သ္ပစၟဳတ်ကၟာတ်လဒဵုလဝ် ဂၠံၚ်အာကၠုၚ် ဂၠံၚ်ကွဳစက်ဒံၚ်သောန်−ၜဳကလေၚ် ကေုာံ ဂၠံၚ်ဒံၚ်သောန်−ကျာ်ထဝ်တံရောၚ်ဂှ် ဂွံတီကေတ်ရ။

တုဲကၠုၚ် ပ္ဍဲဂိတုဨပရဴ ၂၆ တေံဂှ်လေဝ် ရုၚ်က္ဍိုက်ပ်အခေါန်ပွိုၚ်ဍုၚ် နူကဵုသ္ကဲဂၠံၚ် ကွဳစက် ၜဳကလေၚ်−ဒံၚ်သောန်တံ ဒးဒုၚ်ဖံက်ဗ္တိုဟ်မာၚ်ဂှ်ရ စမြိုၚ်ရုၚ် သရိုဟ်လီုလာ်အာလဝ်ရ။

ပရိုၚ်−သြၚ်လောန်တိုၚ်(မ်)

ဗီု−SBM

Leave a Reply

Your email address will not be published. Required fields are marked *