ပ္ဍဲကအ်ကြိက် ဟိုတ်နူအန္တရာယ်လွဟ်ဇၞော်တုဲ ညးဒေသတံ သွက်ဂွံကၠောန်စဂှ် ခက်ခုဲကၠုၚ်

ကအ်ကြိက်၊ ဂျောန်(၂၀)

ပ္ဍဲတွဵုရးကရေၚ်၊ ပွိုၚ်ဍုၚ်ကအ်ကြိက်ဂှ် ဟိုတ်နူဒပ်ကံၚ်ဇြဳပၞာန် ပန်ပှော်မံၚ်လွဟ်ဇၞော်အရိုဟ်ဒဒှ်တ္ၚဲဂှ်ရ ညးဍုၚ်ကွာန်ကောန်အရာပ်ဒၟံၚ်ပ္ဍဲဒေသတံ ဒးဂွိၚ်ဂွါဲဖေက်လကိုတ်မံၚ်လၟိုန်တုဲ သွက်ဂွံကၠောန်စဂှ် ဒးဆေၚ်မံၚ်မုက် ကုအခက်အခုဲဗွဲမဂၠိုၚ်ရဂှ် ညးဒေသကအ်ကြိက်တံ ဟီုဂးလဝ်ရ။

ပ္ဍဲပွိုၚ်ဍုၚ်ကအ်ကြိက်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗတိုက်ဆေၚ်မုက်တံ က္တဵုဒှ်မံၚ်မွဲဏှမွဲဏှတုဲ ဒပ်ကံၚ်ဇြဳပၞာန်တံဂှ် စွံပွန်လ္တူကောန်အရာပ်တံတုဲ နကဵုတၚ်ရန်တၟံနွံနွံ ကၠောန်သ္ပမံၚ် ပွဗတိုက်တရဴကျာကဵု ပွပန်ပှော်လွဟ်ဇၞော် ပ္ဍဲကွာန်တံလၟိုန်ရ။

ဟိုတ်နူ ပွဗ္တိုက်ပန်ပှော်ဒပ်ကံၚ်ဇြဳပၞာန် ဗီုဏံဂှ်တုဲ ညးဍုၚ်ကွာန်ဒေသ ဒၟံၚ်ပ္ဍဲပွိုၚ်ဍုၚ်ကအ်ကြိက်တံ ဒဒှ်မဇီုကပိုက်က္လိဂွံဝပ်ချိုတ်ဂျိုၚ်တံကဵု ဒဒှ်မဆောံလေၚ်သ္ၚိဌာန်တံဂှ် က္တဵုဒှ်မံၚ် မွဲဏှမွဲဏှရ။ ၜိုန်ရကမၠောန်ပရေၚ်တဵုလွဳတံ ဒှ်ကမၠောန်ပရေၚ်ပိုန်ဒြပ်အဓိက ပွိုၚ်ဍုၚ်ကအ်ကြိက်ကီုလေဝ် ဟိုတ်နူပွပန်ပှော်လွဟ်ဇၞော်ဒပ်ကံၚ်ဇြဳပၞာန်တံတုဲ သွက်ဂွံတဵုလွဳဂှ် ဒှ်ကၠုၚ်အခက်အခုဲတုဲ ပ္ဍဲအခိၚ်ရတ်သီတံဂှ်လေဝ် ဟိုတ်နူအန္တရာယ်လွဟ်ဇၞော်တုဲ သွက်ဂွံဆက်ကၠောန်ကမၠောန်တံဂှ် ခက်ခုဲကၠုၚ်ရ။

ညးတာလျိုၚ်ဆဝ်မ္ၚုဟ် ဂကောံခေါၚ်အရာမၞိဟ်ကရေၚ် KHRG သဝ်နန္ဒသူဂှ်တှ်ေ ဟိုတ်နူပွဗ္တိုက်စွံပွန် ဒပ်ကံၚ်ဇြဳပၞာန်တံတုဲ ညးဍုၚ်ကွာန်တံ သွက်ဂွံဒတူလိုၚ်ဂှ် ခက်ခုဲကၠုၚ်တုဲ လၟေၚ်ကမၠောန်ဍေံတံဂှ် က္လိလောန်မံၚ်အမှုရာဇာဝတ်ပၞာန်ဏောၚ်ဂှ် ပါ်ပါဲလဝ်ရ။

“ဟိုတ်နူပွပန်ပှော်လွဟ်ဇၞော်ကြာန်န်ကံၚ်ဇြဳပၞာန်တံဂှ်တုဲ ဒြပ်ရတ်ပိုန်ဟာန်ကောန်အရာပ်တံ ဒးဇီုကပိုက်လီုလာ်မံၚ်တုဲ ညးဍုၚ်ကွာန်ကောန်အရာပ်တံ ဒးဇီုကပိုက်ချိုတ်ဂျိုၚ်မံၚ်အိုတ်ရ။ သ္အာၚ်နူဂှ်ပၠန် တိရိစ္ဆာန်သ္ၚိညးတံ၊ စမြိုၚ်တံဂှ်လေဝ် ဒးဇီုကပိုက်လီုလာ်ကၠုၚ်ကီုရ။ ပရေံအိုတ်ဂှ်တှ်ေ ပွဗ္တိုက်တရဴကျာကံၚ်ဇြဳပၞာန်တံရ။ ဟိုတ်နူပွဗ္တိုက်တရဴကျာတုဲ သ္ၚိဌာန်ပိုန်ဟာန်ဗွဲမဂၠိုၚ်ဂၠေၚ် ဇီုကပိုက်လီု လာ်အာလဝ်တုဲ စမြိုၚ်ပရေၚ်ဘာသာတံ၊ ဘာဗ္တောန်လိက်တံ၊ ရုၚ်ဂဥုဲ၊ ဗ္ဒမ်ကဵုဂဥုဲတံလေဝ် ဒးလီုလာ် အာပေၚ်ၚ်ရ။ ရံၚ်ကေတ်တှ်ေ အရာတံဏံဂှ် မုဟွံဆေၚ်မွဲသာ် ဗ္တိုက်စွံပွန်လ္တူကောန်အရာပ် တံသက်က် ဟေၚ်ရ။ ပွဗ္တိုက် အကြာဂကောံရပ်လွဟ်ဍေံတံ မွဲဂကောံကုမွဲဂကောံ ဟွံသေၚ်ပုဟ်ဏး။ လၟေၚ်ဒဒှ်တံ ဏံဂှ် ဝးဗ္ကဝ်မံၚ် ပရေၚ်ဗ္စာရဏာမၞိဟ်ဂၠးတိတံတုဲ အမှုရာဇာဝတ်ပၞာန်လေဝ်ဒှ်ရ” ဂှ် ညးသ္ဂးရ။

ပြဟ်ဟ်ဏံဂှ်တှ်ေ ဟိုတ်နူပဋိပက္ခပရေၚ်ပၞာန်တုဲ ညးဒေသတံ အခေါၚ်အရာကမၠောန် ကၟိတ်အောန် ကြဳကၠုၚ်တုဲ ဟိုတ်နူအခေါၚ်အရာကမၠောန်ကၟိတ်ဟွံမွဲဂှ်ရ မၞိဟ်ဍောတ်တ်ဗွဲမဂၠိုၚ်တံ အာစိုပ်ကၠောန် ကမၠောန် လ္ပာ်ဍုၚ်သေံတေံ သၠုၚ်တိုန်ကၠုၚ်ရဂှ် ဂွံတီကေတ်ရ။

သ္အာၚ်နူဏံပၠန် ဟိုတ်နူဒပ်ကံၚ်ဇြဳပၞာန်တံ ပန်ပှော်လွဟ်ဇၞော်သၟးဟွံက သီုကဵုကၠောန်သ္ပမံၚ် ပွဗ္တိုက်ထံၚ် ပရိုၚ်ကဵုတရဴကျာတံ မွဲဏှမွဲဏှဂှ်ရ ညးသၟတ်ကွးဘာမၞုံပ္ဍဲဒေသတံ သွက်ဂွံဗ္တောန်ပညာဂှ် အရာမဒှ် ဓဝိၚ်တံ နွံမံၚ်ဗွဲမဂၠိုၚ်ဂၠေၚ်ဂှ် အ္စာဘာ ညးဒေသမၞုံပ္ဍဲပွိုၚ်ဍုၚ်ကအ်ကြိက်မွဲတၠ သ္ဂးလဝ်ရ။

တုဲကၠုၚ်ဂိတုဂျောန် စၟတ်တ္ၚဲ(၆)ဂှ်လေဝ် ပွိုၚ်ဍုၚ်ကအ်ကြိက် KNU ပ္ဍဲကွာန်ဇြာန်ဖဠာဂှ် ဟိုတ်နူဒပ် ကံၚ်ဇြဳပၞာန်တံ ဗ္တိုက်ဂြာတ်လဝ်မခတိုဟ်နကဵုတရဴကျာဂှ်ရ ဘာဗ္တောန်လိက် မၞုံပ္ဍဲကွာန်တံမပါလုပ် စမြိုၚ်သ္ၚိဒၟံၚ်လ္ၚဵုတံ ဇီုကပိုက်လီုလာ်လဝ်တုဲ ဘာဗ္တောန်လိက်ဂှ်လေဝ် ဒးကၟာတ်ထောံလဝ်မွဲချိုန်ခဏရ။

တွဵုရးကရေၚ်၊ ပွိုၚ်ဍုၚ်ကအ်ကြိက်ဂှ် ပ္ဍဲအရာကူသာန်သွံရာန် သေံ-ဗၟာ ၜါဍုၚ်ဂှ် ဍုၚ်ပယျဵုဗြဝတဳတုဲမ္ဂး ၜိုန်ရဒှ်ဍုၚ်အဓိကမွဲကီုလေဝ် ပ္ဍဲကာလဒပ်ပၞာန်သီအဝဵုဏံဂှ် ညးဒေသတံ ဒးဆေၚ်မံၚ်မုက်ကုအကြေပ်အဂြတ်ဇဳဒိုဟ်ရ။

ပရိုၚ်- သြၚ်လောန်တိုၚ်မ်

ဗီု- KNU

Leave a Reply

Your email address will not be published. Required fields are marked *