ၜၚ်ကံက်၊ ဂျောန် (၂၀)
အကြာဍုၚ်အာဇြဳယာန်အဓိကဂမၠိုၚ် ဟိုတ်နူလညာတ်တၞဟ်ခြာတံ ဂၠိုၚ်ဒၟံၚ်ဂှ်ရ ပေါဲသဳကၠဳ ကုဝန်ဇၞော်ကာဍုၚ်သ္အာၚ် ကံၚ်ဇြဳပၞာန်ဗၟာ နူကဵုအလဵုအသဳသေံ သ္ကိုပ်သ္ကတုဲ မကၠောန်ဗဒှ်လဝ်ဂှ်ဝွံ နူကဵုတ္ၚဲမစၟတ်လဝ်ဂှ် လဇုဲမွဲတ္ၚဲတုဲမှ ဂွံဆဵုဂဗလဝ်ရ။
နကဵုအာဇြဳယာန် အခိၚ်ကၟာတ်လဒဵုလဝ် အခေါၚ်တိုန်စိုပ်ကောံဓရီု အလဵုအသဳပၞာန်ဗၟာဂှ် အလဵုအသဳၜၚ်ကံက်ဝွံ သွက်ဂွံကလေၚ်ခိုဟ်ကဵု က္ဍိုပ်သ္ကိုပ်ပၞာန်ဗၟာဂှ် ကဵုလဝ်ဇြဟတ်ဂရိုဟ်ရ။

သ္ကိုပ်ဝန်ဇၞော်သေံ မဂွံလဝ်အဝဵု နူကဵုပၞာန်သီအဝဵုဂှ်ဝွံ တုဲကၠုၚ် ၄ တ္ၚဲတေံ သွက်ကောံဓရီုဓမ္မတာဟွံသေၚ်မွဲဂှ် ကော်ဘိက်လဝ် ဝန်ဇၞော်ကာဍုၚ်သ္အာၚ် အာဇြဳယာန်ရ။
“အခိၚ်လၟုဟ်ဂှ် အကြာက္ဍိုပ်သ္ကိုပ် သွက်ဍုၚ်ဗၟာတံ သွက်ဂွံကလေၚ်ပ္ညဳပ္ညပ်ပေၚ်ၚ်ဂှ် စိုပ်ဒၟံၚ်အခိၚ်ယျ”သာ်ဝွံ ဟီုဂးစုတ်လဝ် ပ္ဍဲကဵုလိက်ဘိက်ဂှ်ရောၚ် ဂွံတီကေတ်ရ။
သ္အာၚ်နူဂှ်ပၠန် တၚ်နၚ်လ္ၚဵုတံဂှ်ဝွံ နိဿဲကေတ်လဝ် တၚ်နၚ်နူကဵုကောံဓရီုအာဇြဳယာန်ကဆံၚ်လ္တူ နူပြဟ်ဟ်တေံလေဝ် မဒှ်ရ။

နူကဵုတမ်ရိုဟ်ပရိုၚ်ၜါတၠဂှ် ဝန်ဇၞော်ကာဍုၚ်သ္အာၚ် ကံၚ်ဇြဳပၞာန်ဗၟာ မခါန်ကၞက်လဝ် မၞုံယၟု တာန်ဇြိုဲ တိုန်စိုပ်လဝ် ကောံဓရီုဏံရောၚ်ဂှ် ဟီုဂးလဝ်ရ။
“အခိၚ်လၟုဟ်ဂှ် အပြံၚ်အလှာဲဗွဲမဂၠိုၚ် က္တဵုဒှ်ဒၟံၚ်တုဲ ပရေၚ်ဗ္တိုက်တံလေဝ် သၠုၚ်တိုန်ကၠုၚ်ဒၟံၚ်ယျ။ ဍုၚ်ဗၟာဂှ် ဟိုတ်နူပ္တဝ်ဒၟံၚ်က္ဍိုပ် ကုဂၠံၚ်တရဴ ကၠောန်ဗဒှ်ပေါဲရုဲမာဲဏောၚ်ဂှ်ရ ပိုယ်တံဝွံ နွံပၟိက်ဒးကၠောန် ပရေၚ်ဆက်ဆောံဆေၚ်မုက် ကုဍုၚ်ဗၟာရေၚ်သ္ကအ်ရောၚ်” ဂှ် ဝန်ဇၞော်ကာဍုၚ်သ္အာၚ်သေံ ဟီုဂးလဝ်ဏီရ။
Reuters

