ၜၚ်ကံက်၊ ဂျောန် (၂၀)
ပေါဲသဳကၠဳပရေၚ်ဍုၚ်ဗၟာ ဗွဲပလး နူကဵုဍုၚ်သေံ သ္ကိုပ်သ္ကတုဲ တိုန်စိုပ်သီုကံၚ်ဇြဳပၞာန် သီုဍုၚ်အာဇြဳယာန်လ္ၚဵု မၞုံအပ္ဍဲဒေသတံဂှ် ၜိုန်ရပရေၚ်ဒစဵုဒစးတံနွံဒၟံၚ်ကီုလေဝ် ပ္ဍဲဂိတုဂျောန် ၁၉ ဂှ် စကၠောန်ဗဒှ်အာရောၚ် ဌာနကာဍုၚ်သ္အာၚ်ဍုၚ်သေံ လလောၚ်ပ္တိတ်ကၠုၚ်ရ။
နကဵုဍုၚ်သေံ ကၠာတေံ ပေါဲသဳကၠဳပရေၚ်ဍုၚ်ဗၟာ ဗွဲပလးတံဂှ် ကၠောန်ဗဒှ်လဝ် နကဵုဗီုပြၚ်စုၚ်ဇဳတုဲ အလန်ဏံဂှ် ဒှ်ပေါဲသဳကၠဳဆဵုဂဗ အလန်တတိယတုဲ ညးစၞးကဆံၚ်သၠုၚ် နူကဵုလာအိုဝ်၊ ကာမ္ဗောဒဳယာ၊ ဗၟာ၊ အိန္ဒိယ၊ ကြုက်၊ ဘရူနိုၚ် ကေုာံ ဝေဒ်နာမ်တံ သွက်ဂွံတိုန်စိုပ်နွံဒၟံၚ်ရ။
ပေါဲသဳကၠဳဆဵုဂဗဏံဂှ် ကၠောန်ဗဒှ်အပ္ဍဲဗွိုၚ်မူအာဇြဳယာန်ဟွံမာန်ကီုလေဝ် သွက်ဂွံသောၚ်ကလး ပရေၚ်ဍုၚ်ဗၟာ ပရေၚ်ဂိုတ်ဂ္စါန်ပ္တိတ်ဇြဟတ်တံဂှ် သွက်ဂွံရီုဗၚ်ထံက်ပၚ်ကဵုအာဂှ် ရန်တၟံလဝ်ရောၚ် ထ္မံက်ထ္ၜးလဝ် ပ္ဍဲကဵုတၚ်လလောၚ်တြး ဌာနကာဍုၚ်သ္အာၚ်ဍုၚ်သေံ နူဏေံတေံရ။
စပ်ကဵုပရေၚ်သဳကၠဳဏံတုဲ ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာသာၚ်ကျဳဇြေန်သဵုဂှ် ယဝ်ရဆဵုဂဗသဳကၠဳကဵု ဒပ်ပၞာန် နကဵု Track 1.5 Dialogue မ္ဂး ဍုၚ်ဂွိၚ်ဖေက် ဒှ်အာသဘဴသ္ပစၟတ်သမ္တီ ကုဒပ်ပၞာန် မွဲနဲမွဲဗီုဂှ်နွံဒၟံၚ်တုဲ ပရေၚ်ဆဝ်မ္ၚုဟ်ကြုက် ကိုန်စဳမာန်ပရေၚ်ပိုန်ဒြပ် အပ္ဍဲဒေသအာဇြဳယာန်တံလေဝ် ပါလုပ်ဒၟံၚ်ရောၚ် သ္ၚဳဂၠိပ်လဝ်ရ။

“ယဝ်ရဆဵုဂဗသဳကၠဳကဵု ဒပ်ပၞာန် ကု Track 1.5 မ္ဂး ပရေၚ်လုပ်သၞောဝ်ဍေံဂှ် မွဲနဲမွဲဗီု ဂွိၚ်ဖေက်ဒှ်အာ သဘဴသ္ပစၟတ်သမ္တီဂှ်လေဝ် နွံဒၟံၚ်ရ။ တန်တဴကဵုလ္တူဏံတုဲ ပိုယ်တံ လညာတ်ဟွံတုပ်ဒၟံၚ်ဂှ် ဂွံဆဵုကေတ်ရ။ ပရေၚ်ပ္တိတ်ဇြဟတ်သေံဂှ်တှ်ေ ကြုက်ကဵုသေံ ဗွဲတၟေၚ် စပ်ကဵုကိစ္စစပ်ကဵု ပရေၚ်ပိုန်ဒြပ် ကူသာန်သွံရာန် တံဂှ်တုဲ အရာမပ္ညဳပ္ညပ် အကြာကြုက်ကဵု သေံဂှ်နွံ။ ဗွဲတၟေၚ် စပ်ကဵုကိုန်စဳမာန်ဂၠံၚ်သုတ် သေံ၊ ကြုက်၊ ဗၟာ မဒးတတ်အာ ဍုၚ်ဗမာဂှ်တုဲ ဟိုတ်နူဆက်စပ်ဒၟံၚ်တံ နွံဂှ်ရ ပံၚ်တောဲကၠောန်တုဲ သွက်ဂွံထ္မံက်ရုပ်ရဴ လ္ပာ်ပရေၚ်ပိုန်ဒြပ်ကြုက် နူတမ်မူလတေံဂှ် လၟုဟ် ထ္မံက်ရုပ်ရဴဟွံမာန်ဂှ်လေဝ် လအ်ဒၟံၚ်ညိညယျ။ တုဲပၠန် ကိုန်စဳမာန်ကြုက်ဂှ် ဟိုတ်နူဆက်စပ်ဒၟံၚ်ကဵု ပရေၚ်ပိုန်ဒြပ်ပံၚ်တောဲ အာဇြဳယာန်တံ မွဲဒကုတ်မွဲ ဒကူဂှ်ရ အရာမဆဝ်မ္ၚုဟ် ကြုက်တံလေဝ် ပါလုပ်ဒၟံၚ်ကီုရောၚ် အခိၚ်လၟုဟ် ရဲသ္ၚဳဂၠိပ်သာ် ဏံတံလေဝ် နွံရ” သာ်ဝွံ ညးသ္ဂးရ။
ပေါဲသဳကၠဳ Track 1.5 Dialogue စပ်ကဵုပရေၚ်ဍုၚ်ဗၟာဂှ်ဝွံ စကၠောန်ဗဒှ်လဝ် ပ္ဍဲဍုၚ်သေံ ပ္ဍဲဂိတုမာတ်ချ် အလန်ပထမတုဲ အလန်ဒုတိယဂှ် ကလေၚ်ကၠောန်ဗဒှ်လဝ် ပ္ဍဲဍုၚ်အိန္ဒိယ ပ္ဍဲဂိတုဨပရဴတုဲ သၞာဲဒဴကဆံၚ်သၠုၚ် နူကဵုဍုၚ်ကြုက်၊ အိန္ဒိယ၊ ဗၟာ၊ ဗေန်ဂလာဒေတ်၊ ဂျပါန် ကေုာံ ဍုၚ်အာဇြဳယာန်လ္ၚဵုတံကဵု တၠပညာဂမၠိုၚ် တိုန်စိုပ်သဳကၠဳလဝ်အိုတ်ရ။
ပေါဲသဳကၠဳဗွဲပလး Track 1.5 Dialogue စပ်ကဵုပရေၚ်ဍုၚ်ဗၟာ မကၠောန်ဗဒှ်ဒၟံၚ်အခိၚ်လၟုဟ်ဂှ် နကဵုဍုၚ်သေံ တုဲကၠုၚ်မွဲၜါတ္ၚဲတံရ ကော်ဘိက်လဝ် ဝန်ဇၞော်ကာဍုၚ်သ္အာၚ် ဍုၚ်အာဇြဳယာန်တံ သွက်ဂွံတိုန်စိုပ်ဂှ်တုဲ ဥက္ကဌဒးအလန်အာဇြဳယာန် အေန်ဒိုဝ်နဳယှာ၊ မလေဝ်ယှာ ကေုာံ သေန်ကာပေါဝ်တံဂှ် တိုန်စိုပ်အာဟွံသေၚ်ပုဟ်ဂှ် ကလေၚ်လဝ်ပရိုၚ်ရ။

ပေါဲသဳကၠဳဏံဂှ် ကၠောန်ဗဒှ် ပ္ဍဲဂိတုဂျောန် ၁၈ ကဵု ၁၉ ဏံဏောၚ် ပရိုၚ်မံက်တိတ်ဒၟံၚ်ကီုလေဝ် လ္ပာ်ဗၟာဂှ် ဂကောံညးစၞးကံၚ်ဇြဳပၞာန်တံ သွက်ဂွံတိုန်စိုပ်ဂှ် ကော်ဘိက်လဝ်ကီုလေဝ် ဂကောံချဳဒရာၚ်ကတိုၚ် ကၟဟ်ပရေၚ်ဍုၚ်ဗၟာပိကၠံပြၚ်ကီု သီုကဵုအလဵုအသဳညဳသၟဟ်ဂကူ NUG တံဂှ် ဒစဵုဒစးလဝ်အိုတ်ရ။
ညးချဳဒရာၚ်ကတိုၚ်ကၟဟ်ပရေၚ်ဍုၚ်ဗၟာမွဲတၠ ကိုဝ်ယျေဝ်ဂှ် ပေါဲသဳကၠဳသာ်ဏံဂှ်ဝွံ ညံၚ်အကာဲအရာ ဍုၚ်ဗၟာလၟုဟ်ကဵု ပၠန်ဂတးတံ သာတုဲဂွံခိုဟ်ကၠုၚ်ဂှ် ဖဵုဍေံဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍေံတံ ကၠောန်ပေါဲသဳကၠဳဗီုဏံဒှ်ဒှ်၊ မုဒှ်ဒှ် အကာဲအရာဍုၚ်ဗၟာပိုယ်လၟုဟ်ဏံကဵု ပၠန်ဂတးပိုယ်တံ သာတုဲဂွံခိုဟ်ကၠုၚ်ဒှ်ဒှ် ဖဵုမွဲမွဲဂှ် နွံအာဟွံသေၚ်ပုဟ်။ မူဟိုတ်ရောဟီုတှ်ေ ဗီုတံဏံဂှ် အလဵုအာဇြဳယာန် ဟွံဒုၚ်တဲပုဟ်။ ပြဝသာ်ဏံတံဂှ် သီုအာဇြဳယာန် သီုဍုၚ်သ္အာၚ် မရေၚ်တၠုၚ်ဒၟံၚ် ပရေၚ်ဍုၚ်ဗၟာ ညံၚ်ဂွံခိုဟ်ဂှ် ဒှ်ပြဝ မအာလ္ပာ်လဟုတ်ဏောၚ်ဂှ် နကဵုအဲ ညာတ်ရ” သာ်ဝွံ ညးသ္ဂးရ။

သ္အာၚ်နူဂှ်ပၠန် စပ်ကဵုကိစ္စဍုၚ်ဇိုၚ်ဝုတ်ဒိုဟ် ကြုက် ကေုာံ အိန္ဒိယ မဆက်စပ်ဒၟံၚ်ကဵု ဒတုဲဖဵုပရေၚ်ဍုၚ် ကွာန်တံ ကၠုၚ်စိုပ်တုဲ ထံက်ဒၟံၚ်ဂလာန် ကုဂကောံပၞာန် လ္ဂောံကဵုပရေၚ်ဍုၚ်ကွာန်တံဂှ် နကဵုညးဍုၚ် ကွာန်ဍုၚ်ဗၟာဂမၠိုၚ် သၠးအာအခေါၚ်ဟွံသေၚ်ဂှ်ရ ဖဵုအဆက်လက္ကရဴဍေံဂှ် ဍုၚ်တံဏံ ဂွံဒုၚ်စသိုၚ်ရောၚ် ကိုဝ်ယျေဝ် သ္ဂးရ။
နကဵုဍုၚ်သေံ သွက်ဂွံသောၚ်ကလး အကြေပ်အဂြတ်ဍုၚ်ဗၟာဂှ် သၞာံတုဲကၠုၚ် ပ္ဍဲကၞောတ်ဒဳဇြေမ် ဗာတေံဂှ်လေဝ် ဒုသ္ကိုပ်ဝန်ဇၞော်သေံ ကဵု ဝန်ဇၞော်ကာဍုၚ်သ္အာၚ်တံဝွံ ကော်ဘိက် ဍုၚ်လုပ်ဂကောံ အာဇြဳယာန်တံဂှ်တုဲ သဳကၠဳလဝ်ဗွဲပလး ပ္ဍဲကဵုဍုၚ်သေံရ။
ပ္ဍဲကဵုပေါဲသဳကၠဳဏံဂှ် ညးစၞးနူကဵုဍုၚ်လုပ်ဂကောံအာဇြဳယာန်ဂမၠိုၚ် လာအိုဝ်၊ ကာမ္ဗောဒဳယာ ကေုာံ ဍုၚ်ဝေဒ်နာမ်တံကဵု ဂကောံညးစၞး နူကဵုဝန်ဇၞော်ကၟိန်ဍုၚ် လ္ပာ်ကံၚ်ဇြဳပၞာန် ဥူဝဏ္ဏမံၚ်လွေန်တံ သ္ကိုပ်သ္ကဂှ် တိုန်စိုပ်လဝ်အိုတ်တုဲ ပ္ဍဲအရာသောၚ်ကလးပရေၚ်ဍုၚ်ဗၟာဂှ် သွဟ်ချိုတ်တ်ပၠိုတ်တ် ဟွံတိတ်ကၠုၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−BRT News

