အလုံမွဲကၟိန်ဍုၚ် ဟိုတ်နူချဳဒရာၚ်ဗကပ်ဗဗေၚ်ပ္ကဴ ညးဗြဴဒးဒုၚ်ရပ်လဝ် ၜိုတ်(၅၀)တၠနွံတုဲ၊ ညးတြုံမွဲတၠကဵု ညးဗြဴမွဲတၠ ဒးဒုၚ်ပံက်လဝ်ဂဗုတ်

လဂုၚ်၊ ဂျောန်(၂၁)

နဒဒှ်စၟတ်သမ္တီတ္ၚဲဒှ်မၞိဟ် ညးကဵုကသပ်ကၟိန် ဍုၚ်ဒဝ်အံၚ်သာန်သုကျဳ မရနုက်ကဵု (၇၈)သၞာံ ဒးဒုၚ်ဒၟံၚ်ထံၚ် စာတ်နေပျဳဒဝ်ဂှ် ညးချဳဒရာၚ်ဗကပ်ဗဗေၚ်ပ္ကဴတအ်ဂှ် ပ္ဍဲကဵုညးကံၚ်ဇြဳပၞာန်ရပ်ကော်ဏာလဝ်တအ်ဂှ် ညးဗြဴ ၜိုတ်(၅၀)တၠ ပါလုပ်ဒၟံၚ်တုဲ ညးဒးဒုၚ်ပံက်လဝ်ဂဗုတ် နကဵုၝောံပိုဒ် ၅၀၅ (က)လေဝ် နွံကၠုၚ်ဒၟံၚ်ရ။

သ္ဇိုၚ်ဝန် နူဆေၚ်ထဝ်သမာဓိ ပွိုၚ်ဍုၚ်ပဗေဝ်တာန်၊ ဍုၚ်လဂုၚ် (၁၃)တၠ ဟိုတ်နူစရှ်လဝ်ပ္ကဴနၚ်ဇဳတုဲ ကော်စၟဳစၟတ်လဝ် ပ္ဍဲရုၚ်ဂကောံပရေၚ်အုပ်ဓုပ် ပွိုၚ်ဍုၚ်(ပဗေဝ်တာန်) ရဂှ် ချူဓမံက်လဝ် ပ္ဍဲတေဝ်လဳဂရာမ်ချာန်နေဝ် ထံက်ဂလာန်ကံၚ်ဇြဳပၞာန်ရ။

သ္အာၚ်နူဂှ်ပၠန် ညးစရှ်ကဵုပ္ကဴနၚ်ဇဳ သွက်ဗကပ်ဗဗေၚ်ပ္ကဴ ပ္ဍဲဖျာရတနာသဳရိဂှ် ကေုာံ ညးဗြဴစရှ်လဝ်ပ္ကဴ (၁၈)တၠကော်စၟဳစၟတ်လဝ် ပ္ဍဲရုၚ်သာယျာဍိုပ်ဍဴကီု၊ ပ္ဍဲဗ္ဒာဲဖျာဇြေန်မလိုက် လဂုၚ်ဂှ်လေဝ် စရှ်လဝ်ပ္ကဴ နဒဒှ်စၟတ်သမ္တီ တ္ၚဲဒဝ်အံၚ်သာန်သုကျဳဒှ်မၞိဟ်ဂးတုဲ ညးဗြဴပိတၠ ဒးဒုၚ်ရပ်လဝ်ရဂှ်လေဝ် ဓမံက်ထ္ၜးလဝ် ပ္ဍဲချာန်နေဝ်တေဝ်လဳဂရာမ် ထံက်ဂလာန်ကဵု ဒပ်ပၞာန်ဂှ်ဏီရ။

အလုံမွဲကၟိန်ဍုၚ် ဟိုတ်နူချဳဒရာၚ်ဗကပ်ဗဗေၚ်ပ္ကဴ ညးဗြဴဒးဒုၚ်ရပ်လဝ် ၜိုတ်(၅၀)တၠနွံတုဲ၊ ညးတြုံမွဲတၠကဵု ညးဗြဴမွဲတၠ ဒးဒုၚ်ပံက်လဝ်ဂဗုတ်

ပ္ဍဲတေဝ်လဳဂရာမ် Kamayut Information ဂှ်မ္ဂး ညးဗြဴပွိုၚ်ဍုၚ်ဂှ် အောန်အိုတ် (၁၂) တၠ ဒးဒုၚ်ရပ်လဝ် ရဂှ် ဓမံက်ထ္ၜးလဝ်ရ။ ပ္ဍဲကဵုညးဒးဒုၚ်ရပ်လဝ် လ္ၚဵုဂှ် ကလေၚ်ဗလးကဵုလဝ် နတၚ်ဒုၚ်ဝန်ရဂှ်လေဝ် ဂွံတီကေတ် နူတွဳဗွိုၚ်စုက်လုက်ကဵုညးတအ်ရ။

သ္အာၚ်နူဂှ်ပၠန် နူကဵုထံၚ်ယျမေဝ်တေန် ရးဒေသအၚ်ဝ ကောန်ထံၚ်ပရေၚ်ဍုၚ်ကွာန်တြေံ ကိုဝ်သူရမောၚ် မောၚ် အာလုပ်ဆဵုကဵုကောန်ထံၚ် ကေုာံ ဒဝ်စန္ဒာမျေတ် အာလုပ်ဆဵုလဝ်ကဵု တၠသ္ၚိညး ကောန်ထံၚ် ပရေၚ်ဍုၚ်ကွာန် ဒးဒုၚ်ဒၟံၚ်ထံၚ်ပွိုၚ်(၁၂)သၞာံဂှ်တုဲ အခိၚ်က္လေၚ်စဴကၠုၚ်ဂှ် နကဵုတၚ်စောတ်စောဲ စရှ်လဝ်ပ္ကဴဂှ် ရပ်ကေတ်လဝ် ပ္ဍဲဂိတုဂျောန် စၟတ်တ္ၚဲ (၁၉)တုဲ ဒးဒုၚ်ပံက်လဝ်ဂဗုတ် ပ္ဍဲဗဒိုပ်ဗၠာဲသၟိၚ်ယျမေဝ်တေန် နကဵုၝောံပိုဒ် – ၅၀၅၀ -က ရဂှ် ဂွံတီကေတ်ရ။

အလုံမွဲကၟိန်ဍုၚ် နဒဒှ်စၟတ်သမ္တီတ္ၚဲဒှ်မၞိဟ်ဒဝ်အံၚ်သာန်သုကျဳ မရနုက်(၇၈) သၞာံ ကၠုၚ်စိုပ် ပ္ဍဲဂိတုဂျောန် စၟတ်တ္ၚဲ(၁၉) ဂှ် ကၠောန်ဗဒှ်လဝ် ပေါဲဗကပ်ဗဗေၚ်ပ္ကဴရ။

တၞုၚ်ဂၠံၚ် မဳဒုမ် ပွိုၚ်ဍုၚ်သုဝဏ္ဏ၊ ဍုၚ်လဂုၚ်ဂှ်လေဝ် သၟတ်ၜါတၠ စရှ်လဝ်ပ္ကဴ သွက်ဂွံချဳဒရာၚ်ဗကပ် ဗဗေၚ်ပ္ကဴ ကွာ်ကၠုၚ်ဒၟံၚ်ဂှ် ကောန်ဒပ်ကံၚ်ဇြဳပၞာန်တအ် ကၠုၚ်ရပ်ကေတ်ဏာလဝ်ရဂှ် ညးဂဗဆဵုနမတ် တအ် ဟီုကဵု ဌာန်ပရိုၚ်သြၚန်လောန်တိုၚ်(မ်)ရ။

“ဂတမုက်အဲရ ရပ်ကော်ကေတ်ဏာ သၟတ်စရှ်လဝ်ပ္ကဴ ၜါတၠရ။ ကၠုၚ် ၝတအ်ဗက်ကၠုၚ်ဂးတုဲ ပ္တိုန်ဏာလ္တူကွဳစက်ရ။ ဍေံတအ်ဂှ် စရှ်လဝ်ပ္ကဴတုဲ ဆၜိုတ်ကွာ်ဒၟံၚ်ဂၠံၚ်ဓဝ်ရ မုလေဝ်ရမျာၚ်က္ညာၚ် ကရေဲဟၟဲပုဟ်”ဂှ် ညးဆဵုဂဗနမတ် မံၚ်ပွိုၚ်ဍုၚ်သုဝဏ္ဏမွဲတၠ ဟီုသ္ဂးလဝ်ရ။

ပ္ဍဲတ္ၚဲဂှ်အခိၚ်ဒေါဝ်တ္ၚဲဂှ် နူကဵုဇာနှိက်ပရေၚ်မၞိဟ် သွက်ဂွံပါလုပ်ချဳဒရာၚ် ပ္ဍဲပေါဲဗကပ်ဗဗေၚ်ပ္ကဴ ဗတိုက်ဖ္အောဝ်လဝ်တုဲ မၞိဟ်ပါလုပ်အလဵုဇကု ဟွံအောန်နူမသုန်တၠ ဒဒှ်ရဒးဒုၚ်ရပ်လဝ်ရဂှ် ဓမံက်လဝ် ပ္ဍဲမုက်လိက်တေဝ်လဳဂရာမ် တြးဝါဒကံၚ်ဇြဳပၞာန်ရ။

မၞိဟ်ဒးဒုၚ်ရပ်လဝ် ဗွဲမဂၠိုၚ်တအ်ဂှ် ဒှ်သၟတ်တအ်တုဲ မၞိဟ်တြုံ၊ မၞိဟ်ဗြဴကီု သီု LGBT တအ်ပါလုပ်ဒၟံၚ်ရ။

ပ္ဍဲတ္ၚဲက္တဵုဒှ်မၞိဟ် ညးကဵုကသပ်ကၟိန်ဍုၚ် ဒဝ်အံၚ်သာန်သုကျဳ မရနုက်ကဵု(၇၈)သၞာံ ဒးဒုၚ်ဖျေံလဝ်ထံၚ် ကဵုကံၚ်ဇြဳပၞာန် ဗွဲအဓမ္မ ကၠုၚ်စိုပ် ပ္ဍဲဂိတုဂျောန်စၟတ်တ္ၚဲ (၁၉) ဂှ် နဒဒှ်ဓမံက်ထ္ၜးဒဒှ်ရ ဒစဵုဒစးကဵု တၠအဝဵုပၞာန် ညးဍုၚ်ကွာန် သီု အလုံမွဲဍုၚ် သွက်ဂွံချဳဒရာၚ်အာ ပေါဲဗကပ်ဗေၚ်ပ္ကဴဂှ် ဂကောံဇြဟတ်ပၠန်ဂတးတအ် ဗတိုက်ဖ္အောဝ်လဝ်ရ။

ဒပ်ပၞာန်သီအဝဵုတုဲ အခိၚ်လအ်ကၠုၚ် ပွိုၚ် (၆၀)တ္ၚဲ သ္ပတံနူ ဂိတုဨဗြဴ စၟတ်တ္ၚဲ (၂) သၞာံ ၂၀၂၁ဂှ်တုဲ ရန်ကဵုညးဒးဒုၚ်ပြဟ်လလုဲလဝ် ဟိုတ်နူပွပ္ကီုပရာပ်ကံၚ်ဇြဳပၞာန်တုဲ စကၠောန်ဗဒှ်ကၠုၚ် ပေါဲဗကပ်ဗဗေၚ်ပ္ကဴ နဲကဲၜတ်တ်ရ။

ပ္ဍဲဂိတုဂျောန် စၟတ်တ္ၚဲ (၁၉) သၞာံ ၂၀၂၁ ဒပ်ပၞာန်သီလဝ်အဝဵုဂှ် နဒဒှ်စၟတ်သမ္တီ တ္ၚဲဒှ်မၞိဟ်ဒဝ်အံၚ် သာန်သုကျဳ ကၠောန်ဗဒှ်လဝ် ပရေၚ်ချဳဒရာၚ်ဗကပ်ဗဗေၚ်ပ္ကဴကီု၊ ပ္ဍဲသၞာံ ၂၀၂၂ ဂှ်လေဝ် ချဳဒရာၚ်ကၠောန် ဗဒှ်လဝ်ဗကပ်ဗဗေၚ်ပ္ကဴတုဲ ပေါဲဗကပ်ဗဗေၚ်ပ္ကဴ သၞာံ ၂၀၂၃ ဂိတုဂျောန် စၟတ်တ္ၚဲ (၁၉)ဂှ် ဒှ်မရနုက်ကဵု ပိဝါတုဲ ပ္ဍဲဇၟာပ်ပ်ကၠောန်ဗဒှ်ပေါဲဗကပ်ဗဗေၚ်ပ္ကဴလေဝ် ကံၚ်ဇြဳပၞာန် ဗတိုက်ရိုဟ်ဒၟံၚ် ပေါဲဗကပ်ဗဗေၚ်ပ္ကဴ သ္ကာတ်တ်မြဟ်ဟ်ဗွဲမဂၠိုၚ်နွံရ။

ပရိုၚ် – သြၚ်လောန်တိုၚ်(မ်)

ဗီုရုပ်-ချာန်နေဝ်တေဝ်လဳဂရာမ်တြးဝါဒကံၚ်ဇြဳပၞာန်

Leave a Reply

Your email address will not be published. Required fields are marked *