ရေဝ်၊ ဂျောန် (၂၁)
တွဵုရးဍုၚ်မန် ပွိုၚ်ဍုၚ်ရေဝ် ပ္ဍဲကွာန်အကျာံဂှ် ပၞာန်ညးဍုၚ်ကွာန်မွဲတၠ နူကဵုသြဇာကံၚ်ဇြဳပၞာန်ဂှ် ဒးဒုၚ်ပန်ဂစိုတ်လဝ် ကဵုသေနာတ်ဂှ်ရ ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဥူယျေဝ်ဝေန်နာၚ် မဒှ်ကောန်ပၞာန်ညးဍုၚ်ကွာန်ဂှ် ပ္ဍဲဂိတုဂျောန် ၂၀ အခိၚ်နူဂယး ၜိုတ် ၉ နာဍဳဂှ် ဂကောံလကိုဟ်ဍုၚ်ရေဝ် မဒှ်ဂကောံဒပ်ပၠန်ဂတး ဖျေံသ္ဇိုၚ်ရေဝ်ဂှ် လုပ်စိုပ်ပန်ပှော်လဝ် နကဵုသေနာတ် ပ္ဍဲလ္တူသ္ၚိရ။

ဟိုတ်နူဒးဒုၚ်ပန်ကဵု သေနာတ်ဂှ်ရ ကောန်ပၞာန်ညးဍုၚ်ကွာန် ဥူယျေဝ်ဝေန်နာၚ်ဝွံ ချိုတ်အာလဝ် ပ္ဍဲကဵုဒၞါဲဒှ်ပရူဂှ်တုဲ ဇွညးဂှ် ပလံၚ်ဗစိုပ်ကဵုလဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ရေဝ်ရောၚ် ဂွံတီကေတ်ရ။
ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် ကောန်ပၞာန်ညးဍုၚ်ကွာန် ဥူယျေဝ်ဝေန်နာၚ်ဂှ်ဝွံ ဒဒှ်ရ ဒှ်ကောန်အရာပ်သာမညဂှ်ကီု၊ ကြဴနူပန်ပှော်တုဲဂှ် ကောန်ဂကောံ PDF တံ ကေတ်ဏာလဝ် သီုကဵုထိုၚ်လှုဲ သြန်နွံၜါကိုဋ်ဒ္ကေဝ်ဂှ်ကဵု ဖုၚ်တံဂှ်ရောၚ် တြးဒၟံၚ်ဝါဒတံ နွံဒၟံၚ်ရ။

ကောန်ပၞာန်ညးဍုၚ်ကွာန် ဥူယျေဝ်ဝေန်နာၚ်ဂှ် ဂကောံညးတံ ပန်ပသောၚ်ထောံလဝ်ရောၚ် က္ဍိုပ်သ္ကိုပ်လကိုဟ်ဍုၚ်ရေဝ် ချူပ္တိုန်လဝ် ပ္ဍဲမုက်လိက်ဇာဇၞိက်ပရေၚ်မၞိဟ်ညးရ။
စပ်ကဵုအကာဲအရာ မ္ဒးပန်ပှော်ပသောၚ်လဝ် ကောန်ပၞာန်ညးဍုၚ်ကွာန် ဥူယျေဝ်ဝေန်နာၚ်ဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက်လဝ် က္ဍိုပ်သ္ကိုပ်လကိုဟ်ဍုၚ်ရေဝ်ကီုလေဝ် ဒဵုကဵုအခိၚ်လၟုဟ် ကလေၚ်သှ်ကဵုလဝ် ဟွံမွဲဏီရ။

ပ္ဍဲပွိုၚ်ဍုၚ်ရေဝ် တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် တမ်ဒပ်ကံၚ်ဇြဳပၞာန်၊ ဗ္ဒိုပ်ဒပ် ကေုာံ ရုၚ်နူကဵုဌာနမဆေၚ်စပ်တံ ဒးဒုၚ်ဗ္တိုက်ဒၟံၚ် မွဲဏှမွဲဏှတုဲ သီုကဵုဒှ်ဒေသ လ္ပာ်ကံၚ်ဇြဳပၞာန်တံ ပတေၚ်ဂြတ်လဝ် ပရေၚ်ဂီုကၠီု ဗွဲတၟေၚ်မွဲရ။
ပရိုၚ်−သြၚ်လောန်တိုၚ်(မ်)
ဗီု−SBM

