ပ္ဍဲတွဵုရးဍုၚ်မန် ညးဒှ်ယဲပုၚ် ဗ္ဒာဲ ၄၀၀ တၠ နွံကၠုၚ်

မတ်မလီု၊ ဂျောန်(၂၂)

ပ္ဍဲတွဵုရးဍုၚ်မန် နူဂိတုဂျာန္နဝါရဳသၞာံဏံ စဵုကဵုဂိတုဂျောန် တတိယသတ္တာဟ ညးဒှ်ယဲပုၚ် စဵုကဵုဗ္ဒာဲ ၄၀၀ တၠ နွံကၠုၚ်တုဲ ပ္ဍဲကဵုဂှ် ကောန်ၚာ်မွဲတၠ ဒးချိုတ်လဝ်ရဂှ် ဂွံတီကေတ် အတိုၚ်တၚ်ဂၞၚ် ဌာနက္ဍိုက်က္ဍိုပ် ပရေၚ်ထတ်ယိုတ်တွဵုရး ကံၚ်ဇြဳပၞာန်ရ။

အတိုၚ်ပရေၚ်ပရောယဲပုၚ်က္တဵုဒှ်ကၠုၚ်လဝ်ဂှ် ပ္ဍဲဂိတုမေတုဲကၠုၚ်တေံကဵု ဂိတုဂျောန်ဏံဂှ် ပရေၚ်ကၠောံ ထၞာန် သၠုၚ်ဂၠိုၚ်တိုန်ကၠုၚ်ဒၟံၚ်ကီု ပ္ဍဲပွိုၚ် (၂) ဂိတုဏံ ညးက္တဵုဒှ်ယဲ ၃၀၀ ပြၚ်နွံရ။

ပ္ဍဲပရေၚ်ယဲက္တဵုဒှ်လဝ်ဂှ် ဗက်ကဵုပွိုၚ်ဍုၚ်မ္ဂး ပ္ဍဲပွိုၚ်ဍုၚ်မတ်မလီု (၉၇) တၠ၊ ပွိုၚ်ဍုၚ်ပံၚ် (၈၅) တၠ၊ ပွိုၚ်ဍုၚ်ကျာမြဟ် (၅၆) တၠ၊ ပွိုၚ်ဍုၚ်ၜါသွာၚ် (၃၆) တၠ၊ ပွိုၚ်ဍုၚ်ရေဝ် (၃၈) တၠ က္တဵုဒှ်လဝ်ဂၠိုၚ်အိုတ်တုဲ ပ္ဍဲပွိုၚ်ဍုုၚ်သှ်ေဒၟံၚ်တအ်ဂှ် နွံဒၟံၚ် (၁၀) တၠ လ္ပာ်လ္တူ က္တဵုဒှ်လဝ်ယဲ နွံဒၟံၚ်ရ။

ပ္ဍဲကဵုဂှ် ပွိုၚ်ဍုၚ်ပံၚ် ကောန်ၚာ်နူကွာန်အလှာ်မွဲတၠဂှ် ဒှ်လဝ်ယဲပုၚ်တုဲ ဟိုတ်နူဟွံဂွံအခိၚ် လွဳလွတ်ဗွဲမ ဂတာပ်အခိၚ်တုဲ ဒးချိုတ်လဝ်ရ။

သဝ်ဝန်တအ်ဂှ်မ္ဂး သ္ပတမ်နူဂိတုဏံတုဲ ပရေၚ်ယဲပုၚ်ကၠောံထၞာန် ထပ်ဂၠိုၚ်တိုန်ကၠုၚ်မာန်ဒၟံၚ်ဂှ်ရ ကောန်ၚာ်သၟတ်တအ်ဂိယဲမ္ဂး သွက်ဂွံစွံသတိဗွဲတၟေၚ်ကီု ယဲလောန်လ္တူနူ ၃ တ္ၚဲမ္ဂး သွက်ဂွံအာထ္ၜး ပ္ဍဲရုၚ်ဂဥုဲ၊ ဗ္ဒမ်ဂဥုဲဂှ် ဗတိုက်ဖ္အောဝ်လဝ်ရ။

ယဲပုၚ်ဂှ် ဟိုတ်နူဒှ်ယဲကၠောံထၞာန် နူဒးဒုၚ်ကိတ်ကဵုဂၟိတ်ကၠ အေဒဳ(သ်) ဍတ်ပါ်ကၠုၚ် ပ္ဍဲဍာ်ကေဝ်ဍာ်သ္အး မွဲကဆံၚ်ဂှ်ရ နဒဒှ်ပရေၚ်စဵုဒၞာ ပ္ဍဲမွဲဗွိုၚ်သ္ၚိဒၟံၚ်ဇကုဂှ် သွက်ဂွံကၠောန်သ္ပကဵု ပရေၚ်ကၟာတ်လဒဵု၊ ဆာဲ၊ သၠာဲ၊ စၟတ်ဂှ် နွံဒၟံၚ်ပၟိက်ရ။

တွဵုရးဍုၚ်မန်ဂှ် ပ္ဍဲသၞာံ ၂၀၂၂ တုဲကၠုၚ်တေံ ညးဒှ်ယဲပုၚ် စဵုကဵု ၂၀၀၀ တၠပြၚ် နွံလဝ်တုဲ ပ္ဍဲကဵုဂှ် ကောန်ၚာ်မွဲတၠ ဒးချိုတ်လဝ်ရဂှ် ဂွံတီကေတ် အတိုၚ်တၚ်ဂၞၚ်ဌာနက္ဍိုက်က္ဍိုပ်ပရေၚ်ထတ်ယိုတ်တွဵုရး ကံၚ်ဇြဳပၞာန်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-CJ

Leave a Reply

Your email address will not be published. Required fields are marked *