ကျာ်မြဟ်၊ ဂျောန် (၂၂)
သ္ၚိဒၟံၚ်ဒဝ်ခေန်မျဵုမျေတ် ညးစၞးကၠတ်ထဝ်တွဵုရး ဗော် NLD ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် ကံၚ်ဇြဳပၞာန်တံ ကၠုၚ်စိုပ်ကၟာတ်ဏာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံဒပ်ကံၚ်ဇြဳပၞာန်၊ ဗၠာဲသၟိၚ် ကေုာံ ဂကောံအုပ်ဓုပ်တံဝွံ ပ္ဍဲဂိတုဂျောန် ၂၀ အခိၚ်ဇိုၚ်သဝ်တ္ၚဲဂှ် ကၟာတ်သီလဝ် သ္ၚိဒၟံၚ်ဒဝ်ခေန်မျဵုမျေတ် မၞုံဂၠံၚ်ဗညာနဲ အရာပ်မိစောဗု လၟိဟ် (၃) ဍုၚ်ကျာ်မြဟ်ဂှ်ရ။
ဟိုတ်နူကံၚ်ဇြဳပၞာန် ပံက်လဝ်အမှု ကုညးစၞးကၠတ်ထဝ် ဒဝ်ခေန်မျဵုမျေတ် နကဵုသၞောဝ်ဗ္တိုက်ပလီုပွပကီုပရာပ်တံဂှ်တုဲ ဒးဂြိပ်ဒဴပါဲဒလေတ်ဒၟံၚ်ဂှ်ရ ဒးကၟာတ်လဒဵုလဝ် သ္ၚိဒၟံၚ်ဂှ်ရောၚ်ဂှ် သ္ဂးရ။

ဒဝ်ခေန်မျဵုမျေတ်ဝွံ ကြဴနူဒပ်ပၞာန်သီအဝဵုတုဲ ပါလုပ်လဝ် ပ္ဍဲပေါဲထ္ၜးဆန္ဒတံဂှ်ဂးတုဲ ဒးဒုၚ်ပံက်လဝ်အမှု နကဵုၝောံပိုဒ် ၅၀၅ (က) ရာဇာသာတ်ဇၞော်တုဲ ဒးဂြိပ်ဒဴဒၟံၚ်တုဲ လက္ကရဴဂှ် ကံၚ်ဇြဳပၞာန် ပံက်လဝ်အမှု နကဵုသၞောဝ်ပကီုပရာပ်တံရ။
စပ်ကဵုကိစ္စဒးဒုၚ်ကၟာတ်လဒဵုသ္ၚိဒၟံၚ်ဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံ ဒဝ်ခေန်မျဵုမျေတ် ညးစၞးကၠတ်ထဝ်ဂှ်ကီုလေဝ် ဒဵုကဵုအခိၚ်လၟုဟ် ဟွံဂွံအခိၚ်ဏီရ။

ဒဝ်ခေန်မျဵုမျေတ်ဝွံ ပေါဲရုဲမာဲ သၞာံ၂၀၁၅ ကဵု ၂၀၂၀ သီုၜါဝါဂှ် ဒှ်ညးစၞးကၠတ်ထဝ်တွဵုရး ဗော် NLD မဂွံဇၞးလဝ် သီုၜါအလန်မွဲတၠရ။
အတိုၚ်စၟတ်သမ္တီ ဗော် NLD တံဂှ်မ္ဂး အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံဏံ သ္ၚိဒၟံၚ် ကေုာံ ဒြပ်ရတ် ညးစၞးကၠတ်ထဝ် ကေုာံ ကောန်ဗော် NLD ၃၃၃ တၠတံ ဒးဒုၚ်ကၟာတ်လဒဵုလဝ်ရောၚ် ပ္ဍဲဂိတုဂျောန် (၁၃) တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−SBM

