တယိတ်ချံၚ်၊ ဂျောန် (၂၂)
ဟိုတ်နူကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် အပ္ဍဲပွိုၚ်ဍုၚ်တယိတ်ချံၚ်၊ ရးဒေသဇၞော်တၞၚ်သဳဂှ်ရ ညးဒေသပါဲဒဴဘဲပၞာန် (၅၀၀၀) ပြၚ် မ္ဒးဂြိပ်ဒဴပါဲဒလေတ်ဒၟံၚ် လလအ်ပွိုၚ် ၂ သတ္တာဟပြၚ်ဂှ်ဝွံ ဒဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ်အိုတ်ဏီပုဟ်ဂှ် ညးမရီုဗၚ်ရေၚ်တၠုၚ်ကဵုဒၟံၚ်ပရေၚ်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကရောၚ်ပၞာန်ကံၚ်ဇြဳပၞာန်ဝွံ စနူဂိတုဂျောန် တုဲကၠုၚ်တေံတုဲ ဟိုတ်နူလုပ်စိုပ်ထ္ပက်ကၠုၚ်ကရောၚ်ပၞာန် အပ္ဍဲကွာန်ဂမၠိုၚ် နူကဵုပွိုၚ်ဍုၚ်တယိတ်ချံၚ် နကဵုဇြဟတ်ဗွဲမဂၠိုၚ်ဂၠေၚ်ဂှ်ရ ပေါဲဗ္တိုက်ၜါလ္ပာ်တံ သ္ကာတ်မြဟ်လဝ်ရ။
ဟိုတ်နူပေါဲဗ္တိုက်ၜါလ္ပာ်တံတုဲ ညးဒေသမွဲဠက်ပြၚ် နူကဵုကွာန် ၁၀ ကွာန် ပါလုပ်သီုကဵုကွာန်ကနက်သဳရိ၊ ယၚေဝ်၊ ကမျိုၚ်၊ ဝါယျေတ်၊ ကျဲမေန်ကုန်တံဂှ်ဝွံ ဒးဂြိပ်ဒဴပါဲဒလေတ်လဝ် ဒၞါဲဗၠးဘဲတံကဵု ပ္ဍဲကၠအ်ဂူတံရ။

ပ္ဍဲကဵုဏံ ညးဒေသပါဲဒဴဘဲပၞာန် ၅၀၀၀ ပြၚ်ဝွံ ၜိုန်ရကလေၚ်စဴအာ ဌာန်ဒၟံၚ်တံကီုလေဝ် ညးဒေသပါဲဒဴဘဲ ပၞာန် သှ်ေ ၅၀၀၀ ပြၚ်ဂှ် ဟိုတ်နူဒပ်ကံၚ်ဇြဳပၞာန်တံ ဆက်နွံဒၟံၚ် ပ္ဍဲကဵုပွဳပွူကွာန်ယၚေဝ်ဂှ်ရ ဟွံဂံၚ် စဴဌာန်ဒၟံၚ်အိုတ်ဏီရ။
ညးဒေသပါဲဒဴဘဲပၞာန်ဂမၠိုၚ်ဝွံ အခိၚ်ပါဲဒဴဘဲပၞာန် လအ်ကၠုၚ်ဗက် နွံပၟိက်ဒၟံၚ်ကဵု ဇွောံမစၞစ ကေုာံ အရီုဗၚ်ဒၞါဲမံၚ်တံရောၚ်ဂှ် ညးတာလျိုၚ် ဂကောံရီုဗၚ် ညးပါဲဒဴဘဲပၞာန်တၞၚ်သဳမွဲတၠ ဟီုရ။

မွဲလ္ပာ်ပၠန်ဂှ် ညးဍုၚ်ကွာန်ပါဲဒဴဘဲပၞာန်ဂမၠိုၚ်ဝွံ ဟိုတ်နူဒှ်ဒၟံၚ်အခိၚ်ကသီုဂှ်ရ မၞိဟ်ဒှ်ယဲဇွဟ်၊ ယဲဂၞဴအာ၊ ဒးချာံဇကုဂမ္တဴ ကေုာံ မၞိဟ်ကလိဂွံဝပ်ဇီုကပိုက်ဒးတံလေဝ် နွံဒၟံၚ်ဂှ်ရ အရာမနွံပၟိက် အရီုဗၚ်ဂဥုဲဇဗတံ နွံဒၟံၚ်ရောၚ်ဂှ် ဂွံတီကေတ်ရ။
ဟိုတ်နူဒပ်ကံၚ်ဇြဳပၞာန် ထ္ပပ်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်တယိတ်ချံၚ်ဂှ်ရ အကြာဂကောံဒပ်စဵုဒၞါ ဒေသတံဂှ် ပေါဲဗ္တိုက် ဟွံအောန်နူကဵု ၁၀ ဝါ က္တဵုဒှ်လဝ်တုဲ ၜါလ္ပာ်ဇီုကပိုက်ချိုတ်ဂျိုၚ်တံလေဝ် နွံဒၟံၚ်ရ။

ပ္ဍဲရးတၞၚ်သဳဂှ် တုဲကၠုၚ်အပ္ဍဲဂိတုမေတေံ ဟိုတ်နူပေါဲဗ္တိုက်ၜါလ္ပာ်တုဲ ညးဒေသ ၃၄၀၀၀ ပြၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ဂွံတီကေတ် အတိုၚ်တၚ်လလောၚ်တြး ဂကောံဗော်သွး အပ္ဍဲဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ

