ပရေင်တပ်ဒဏ်ကၟာတ်လဒဵုအမေရိကာန် လ္တူတိုက်သြန်ကံၚ်ဇြဳပၞာန်(၂) မဂှ် အရာမဇီုကပိုက်တံ ဇၞော်ကၠုၚ်မာန် 

နေဗျဳဒဝ်၊ ဂျောန်(၂၂) 

တိုက်သြန်သၠာဲဂတးဗၞိက်ဍုၚ်သ္အာၚ်ဗၟာ(MFTB) သၟဝ်တဲကံၚ်ဇြဳပၞာန် မရေၚ်တၠုၚ်မံၚ် အကံက်သြန်လှုဲဍုၚ်သ္အာၚ်တံကဵု တိုက်သြန်ပရေၚ်ကူသာန်သွံရာန်(MICB)တံဂှ် အလဵုသဳအမေရိကာန် ဖျေံစၟတ်ထောံပရေၚ်ကေတ်အရေဝ်ကၟာတ်လဒဵုတံမ္ဂး အရာမဇီုကပိုက် လ္တူပရေၚ်ပိုန်ဒြပ်ဍုၚ်ဗၟာတံ ဇၞော်ကၠုၚ်မာန်ရောၚ်ဂှ် ပရေၚ်ပါ်ပါဲတံ နွံမံၚ်ရ။ 

အလဵုသဳအမေရိကာန်ဂှ် သွက်ဂွံသၞောတ်ဗ္ၜတ်ထောံ ပရေၚ်သြန်လုပ် ဇရေၚ်တၠအဝဵုပၞာန်တံဂှ်တုဲ လ္တူတိုက်သြန် မၞုံသၟဝ်တဲကံၚ်ဇြဳပၞာန်(၂)မတံဂှ် ဖျေံစၟတ်အာ ပရေၚ်ကေတ်အရေဝ်ကၟာတ်လဒဵု ပရေၚ်ပိုန်ဒြပ်တၟိတၟိတံဏောၚ်ဂှ် နိဿဲကေတ် ပရိုၚ်တမ်ရိုဟ်ကလုတ်တမာန်တံတုဲ Thai PBS မဒှ်ဌာန်ပရိုၚ်သေံမွဲဂှ် ချူကၠုၚ်လဝ် ဗိုန်န်ခိုၚ်ၚ်ရ။ 

ပရေၚ်ကၟာတ်လဒဵုတပ်ဒဏ်ဏံဂှ် ရန်တၟအ်သွက်ဂွံဖအောန်ဖျေံ ပွပကီုပရာပ် ဒပ်ကံၚ်ဇြဳပၞာန်လ္တူကောန်အရာပ်တံကဵု ဍာ်ဒကေဝ်ပြုပြေၚ်ပရေၚ်ပၞာန်တံဏောၚ်ဂှ် သ္ဂးရ။ 

ဟိုတ်နူပရိုၚ် အလဵုသဳအမေရိကာန်တံ ဖျေံစၟတ်အာပရေၚ်ကၟာတ်လဒဵုတပ်ဒဏ်တၟိတၟိတံဏောၚ်ဂှ်တုဲ တၠကမၠောန်ဗၞိက်ပၠောပ်၊ ဗၞိက်ပလံၚ်တံကီု သီုအကြာတၠကမၠောန်ပရေၚ်ပိုန်ဒြပ်တံဂှ် အရာမဂွိၚ်ဂွါဲတံ သၠုၚ်တိုန်မံၚ်ရ။ 

ပရေင်တပ်ဒဏ်ကၟာတ်လဒဵုအမေရိကာန် လ္တူတိုက်သြန်ကံၚ်ဇြဳပၞာန်(၂) မဂှ် အရာမဇီုကပိုက်တံ ဇၞော်ကၠုၚ်မာန် 

တၠကမၠောန် ဗၞိက်ပၠောပ်၊ ဗၞိက်ပလံၚ်မွဲတၠဂှ်တှ်ေ ဖျေံစၟတ်ထောံပွကေတ်အရေဝ်ကၟာတ်ဆိုအ်တံမ္ဂး အလုံပရေၚ်ပိုန်ဒြပ်ဍုၚ်ဗၟာမွဲ ပရေၚ်ဇီုကပိုက်တံနွံကၠုၚ်မာန်တုဲ အကြာကၟိန်ဍုၚ်ရေၚ်သ္ကအ် လ္တူကိစ္စပရေၚ်လှဲပြံၚ်သြန်တံ၊ ကိစ္စပရေၚ်ဓလိုက်တမ်ရိုဟ်တံမပါလုပ် လ္တူကဏ္ဍပရေၚ်ဆက်စၠောံတံဂှ် အရာမဇီုကပိုက်ဇၞော်ကၠုၚ်မာန်ရောၚ်ဂှ် ပါ်ပါဲလဝ်ရ။ 

“ဇီုကပိုက်မာန်ကွေံရ။ ပိုဲတံသီုညးဖအိုတ်လေဝ် ဇီုကပိုက်အာကီုဏောၚ်၊ လၟုဟ်ဂှ် လတေၚ်ဆီလမျီုဍုၚ်ပိုဲ တိုက်သြန်တံဂှ် ပါကၠုၚ်ယျ။ ဒးဟီုတှ်ေ ဣဏံဂှ် ဆေၚ်စပ်အာကဵုအလုံဍုၚ်မွဲဟဂှ်ရ၊ တိုက်သြန်ဗီုတံဏံဂှ် တိုက်သြန်အလဵုသဳဍုၚ်ဗၟာလေဝ် ဟီုစဂွံရ။ ပ္ဍဲပိုဲဂှ် တိုက်သြန်တၞဟ်ဟ်ဂှ် အခေါၚ်အရာဗီုတံဏံဂှ် ဂွံဟွံသေၚ်ပုဟ်။ ယဝ်ရ သၠဲပြံၚ်သြန်တံမုတံတှ်ေ ကိစ္စသၠဲပြံၚ်သြန်အကြာဍုၚ်ရေၚ်သ္ကအ်ဂှ်တှ်ေ ဒးဗ္ဒဗ္ဒါဲမံၚ်တိုက်သြန်အလဵုသဳရလေဝ်။ အေဂှ်တှ်ေ သ္ပထောံတိုက်သြန်အလဵုသဳဂှ် သွက်ကမၠောန်အလဵုသဳတံ ဒပ်ပၞာန်တံမုတံ မွဲဓဝ်ဟွံသေၚ်ပုဟ်၊ ကိစ္စဆေၚ်စပ်ကဵု ပရေၚ်ဓလိုက်တမ်ရိုဟ်ဍုၚ်သ္အာၚ်ပိုဲတၞဟ်ဟ်တံလေဝ် ပါမံၚ်။ တုဲပၠန် ဆေၚ်စပ်ကဵုထလဳကောန်တံ ဗွဲမဂၠိုၚ် ဇီုကပိုက်အာမာန်မံၚ်” ဂှ် သ္ဂးရ။ 

ဆ္ဂး က္ဍိုပ်သ္ကိုပ်ဂကောံလလောၚ်ပရိုၚ်ကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန်ဂှ် နအလဵုတိုက်သြန်ဍုၚ်ဗၟာတံဂှ် ဆက်စပ်ကဵုတိုက်သြန်အမေရိကာန်တုဲ ပံက်လဝ်စရၚ်သြန်တိုက်သြန်တံ၊ ဆက်စၠောံတုဲကၠောန်မံၚ်ကမၠောန်တံ ဟွံမွဲဂှ်ရ ကၟာတ်ဆိုအ်ထောံပရေၚ်ပိုန်ဒြပ်လေဝ် ပရေၚ်ဇီုကပိုက်ဟွံမွဲပုဟ်ဂှ် ဟီုလဝ် ပ္ဍဲဂျောန် စၟတ်တ္ၚဲ(၂၀)ဂှ်ရ။ 

သ္အာၚ်နူဏံပၠန် ပ္ဍဲဍုၚ်ဗၟာဂှ် ပရေၚ်ရေၚ်တၠုၚ်တိုက်သြန်ဍုၚ်သ္အာၚ်ဂှ် ရေၚ်တၠုၚ်မံၚ်နကဵုတိုက်သြန်မွဲမဓဝ်ဟွံသေၚ်တုဲ တိုက်သြန်ပုဂ္ဂလိကပ္ဍဲဍုၚ်တံဂှ် နူကဵုတိုက်သြန်လစှ်ေတံဂှ်မွဲကဆံၚ် ရေၚ်တၠုၚ်မံၚ်ကဵုတိုက်သြန်ဍုၚ်သ္အာၚ်တံရတုဲ ဟွံဒးဒှ်ဓဝိၚ်ပုဟ်ဂှ်လေဝ် သ္ဂးရ။ 

တၠပညာပရေၚ်ပိုန်ဒြပ်မွဲတၠဂှ်တှ်ေ ပရေၚ်ကၟာတ်လဒဵုအလဵုသဳအမေရိကာန်ဂှ် ၜိုန်ရရန်လဝ်ကဵုက္ဍိုပ်သ္ကိုပ်ပၞာန်တံကီုလေဝ် သွက်ညးကေတ်မံၚ် ပရေၚ်ရေၚ်တၠုၚ်ပ္ဍဲတိုက်သြန်(၂)ဏံဂှ် ဒှ်ကၠုၚ်အခက်အခုဲမာန်တုဲ လ္တူပရေၚ်ပိုန်ဒြပ်ဍုၚ်ဗၟာ အရာမဇီုကပိုက်နွံ ဟွံမွဲဂှ် ဒှ်မံၚ်အကာဲအရာဒးမၚ်ကျောဝ်ရောၚ်ဂှ် ဟီုရ။ 

“တၚ်ပ္တဝ်က္ဍိုပ်အဓိကဂှ် အလဵုသဳပၞာန်ရ။ ကၠောန်ကဵုတိုက်သြန်ကၟိန်ဍုၚ်ဟွံဂွံတှ်ေ ကၠောန်ကဵုတိုက်သြန်ပုဂ္ဂလိကတၞဟ်ဟ်ပၠန်ဏောၚ်။ သ္ဇက်ဂွံဇီုကပိုက်ပရေၚ်ပိုန်ဒြပ်တီတီဂှ် ဟွံညာတ်ပုဟ်။ ဆ္ဂး တိုက်သြန်(၂)ဏံဂှ် ဒးတွဵုရလေဝ်။ ဍေံတံဂှ် ဖံက်သေဝ်ဍေံတံ ပြံၚ်အာတိုက်သြန်ပုဂ္ဂလိကတၞဟ်ဟ်တံအိုတ်ရဏောၚ်။ ဖဵုအဆက်လက္ကရဴဂှ်တှ်ေ ဒးမၚ်ကျောဝ်မံၚ် မွဲလစုတ်ဏီရ” ဂှ် သ္ဂးရ။ 

ကံၚ်ဇြဳပၞာန်ဂှ်တှ်ေ လၟေၚ်ကမၠောန်အမေရိကာန်လၟုဟ်ဏံဂှ် ကၠောန်သ္ပလ္တူဍုၚ်ဗၟာ ညံၚ်ဂွံကြေပ်ဂြတ်ပ္ဍဲပရေၚ်ပိုန်ဒြပ်ကဵု ပရေၚ်ဍုၚ်ကွာန်တုဲ ပ္ဍဲအရာဂါမ်ကွာ်အာသၞောတ်ဒဳမိုကရေဇြဳဗော်ဇဳ ညးဍုၚ်ကွာန်တံနွံပၟိက်မံၚ်ဂှ် သ္ကဵုဒှ်ကၠေံ ပွလဇုဲလဇ အရာဟွံမွဲပၟိက်တံမာန်ရောၚ်ဂှ် လလောၚ်တြးလဝ်ရ။ 

အမေရိကာန်မပါလုပ် ဂကောံဍုၚ်ပလိုတ်တံဂှ် ကြဴနူဒပ်ပၞာန်သီအဝဵုတုဲ မ္ၚးနူကေတ်အရေဝ်ကၟာတ်ဆိုအ် က္ဍိုပ်သ္ကိုပ်ပၞာန်မပါလုပ် ညးတာလျိုၚ်ကံၚ်ဇြဳပၞာန်တံဂှ် ကၠောန်သ္ပမံၚ် ပွကေတ်အရေဝ်တပ်ဒဏ် ကုဂၠံၚ်သြန်လုပ်ကံၚ်ဇြဳပၞာန်တံရ။ 

ကုကမၠောန်ဆက်စပ်ကဵုကံၚ်ဇြဳပၞာန်တံကဵု ညးမပါဗက်တံဂှ် ကၠောန်သ္ပကၠုၚ်မံၚ် ပွတပ်ဒဏ်ကၟာတ်ဆိုအ်တံကီုလေဝ် ဒဵုအခိၚ်တ္ၚဲဏံ ဟွံစိုပ်တရဴဏီပုဟ်ဂှ် ညးချဳဓရာၚ် ပရေၚ်ဒဳမိုကရေဇြဳကေုာံ ပရေၚ်ထပိုတ်သြန်ဆီပဠက်ဍုက်တံ ထံက်ထ္ၜးပါ်ပါဲလဝ်ရ။ 

ပရိုၚ်-သြၚ်လောန်တိုၚ်မ် 

ဗီု- Social Media

Leave a Reply

Your email address will not be published. Required fields are marked *