မာန်သာချူသက်၊ ဂျောန် ၂၂
က္ၜၚ်ဗၠိုပ်ဍာ်ဍောတ် ကၠေံအာ လောန်ကၠုၚ်ၜါတ္ၚဲတေံ အဟိန်စှ်ေလ္ၚတ် က္ၜၚ်တိုၚ်တာန်နေတ်လီုလီုယၟုဒယှ်ဂှ် သုၚ်စောဲလပှ်ရမျာၚ်တုဲ ဂၠိုက်ဂၠါဲရံၚ်ဂှ် ပ္ဍဲဂိတုဂျောန် ၂၀ တေံ ဂွံမိၚ်ကေတ်လဝ် ဗရုညံၚ်ကဵုၜုၚ်တက်ဒၟံၚ်ရောၚ် သၞာဲဒဴအမေရိကာန်တံ ဟီုရ။
ကြဴနူသုၚ်စောဲလပှ်ရမျာၚ်တုဲ ဂၠိုက်ဂၠါဲတုဲဂှ် လအ်ဂွံပန်နာဍဳဂှ် ဇၟာပ်ပ်ခြာပိစှော်မိနေတ် ဂွံမိၚ်ကေတ်ဒၟံၚ် ဗရုၜုၚ်တက်ဒၟံၚ်တံရောၚ်ဂှ် သ္ဂးရ။
စပ်ကဵုပရေၚ်ဂၠိုက်ဂၠါဲတုဲ ၜိုန်ရသွဟ်လ္ပာ်ဟွံခိုဟ်တံသၟး တိတ်ဒၟံၚ်ကီုလေဝ် ဆက်ဂၠိုက်ဂၠါဲဒၟံၚ်ရောၚ် ဒပ်မၚ်ပြၚ်ၜဳ အမေရိကာန် ဟီုရ။

က္ၜၚ်ဗၠိုပ်ဍာ် မၞိဟ်မသုန်တၠ ဍိုက်ဗက်အာဂှ်ဝွံ ပ္ဍဲဂိတုဂျောန် ၁၈ တေံ ကၠေံအာ ပ္ဍဲကဵုၜဳမှာသၟိတ် အတ္တလာန်တေတ်သၟဝ်ကျာတုဲ က္ၜၚ်ကျာကနေဒါမွဲဖ္ဍိုက် ဂၠါဲဂွံဆဵုလဝ် ကဝေက်လီုလာ်အာလဝ်မွဲရောၚ်ဂှ် သ္ဂးရ။
ဗရုညာန်ညေဲ မံက်တိတ်ကၠုၚ် နူကဵုသၟဝ်ဍာ်ဂှ် နူကဵုက္ၜၚ်ကျာကနေဒါ ဂၠိုက်ဂၠါဲဂွံတီကေတ်လဝ်တုဲ သွက်ဂွံဂၠါဲ ဒၞါဲရမျာၚ်တိတ်ကၠုၚ်တံဂှ် ဂ္စါန်လဝ်ကီုလေဝ် ဟွံပြေပြံၚ်ဒှ်ဒၟံၚ်ရောၚ် သ္ဂးရ။
က္ၜၚ်ဗၠိုပ်ဍာ်ဂှ် ခြာဟွံလအ် အံက်ဇြဳဂျေန်အိုတ်ရဏောၚ်ဂှ်ရ ပၠံၚ်အခိၚ်တုဲ သွက်ဂွံရီု မၞိဟ်မသုန်တၠ မပါဗက်အာဂှ် ဒးပ္တိတ်ဒၟံၚ်ဇြဟတ်ရောၚ် မဒှ်ရ။

က္ၜၚ်ဗၠိုပ်ဍာ်ဍောတ် ဇမၠိၚ် ၂၁ ဟတ် ကဵုလဝ်ယၟုတိုၚ်တာန်ဂှ်ဝွံ ဗၠိုပ်အာသၟဝ်ဍာ်တုဲ လအ်မွဲနာဍဳကဵု ပန်စှော်သုန်မိနေတ်ဂှ် အဆက်ပိုတ်အာလဝ် ကုက္ၜၚ်ဇၞော်ဂှ်ရ။
အံက်ဇြဳဂျေန် ပါလုပ် ပ္ဍဲက္ၜၚ်ဗၠိုပ်ဍာ်ဍောတ်ဏံဂှ်ဝွံ သၞောတ်ဟံၚ်ပြာ်လမျီု ကွက် ၉၆ နာဍဳပါဂှ် ဂွံတီကေတ်ကီုလေဝ် ညအ်ဂှ် ဒှ်အခိၚ်ဂၠေံတဴဗွဲမလောန်ဂှ် သၞာဲဒဴ ဒပ်မၚ်ပြၚ်ဗ္တဳအမေရိကာန်မွဲတၠ ဟီုရ။
က္ၜၚ်ဗၠိုပ်ဍာ်ဍောတ် မကၠောန်လဝ် နကဵုကာဗောန်ဝှိုက်ဗာ တိုက်တေနဳယာန်တံဂှ်ဝွံ လျိုၚ် ၂၃၀၀၀ ပံၚ်ဇြိုၚ်ဒၟံၚ်ရောၚ် ဂွံတီကေတ်ရ။
ဨရိယာဂၠိုက်ဂၠါဲဒၟံၚ်ပြဟ်ဟ်ဏံဂှ်ဝွံ ၉၀၀ မိုၚ်ဂေတ်ကၠောံနွံတုဲ ဒမျိုဟ်ဍေံ ၁၃၀၀၀ ပေ နွံရောၚ် ဂွံတီကေတ်ရ။
Ref: The New York Times

