ပံၚ်၊ ဂျောန်(၂၃)
တွဵုရးဍုၚ်မန် ပ္ဍဲဘာညးဒေသကော်ဂး ဘာဓာတ်တိုၚ်လ္တူဒဵု မၞုံအရာပ်မိုဝ်နှိုၚ် ဍုၚ်ပံၚ်ဂှ် လေံကျာ်မွဲဇကု ဒးဒုၚ်ပြိုက်ဂစိုတ်လဝ်တုဲ ထောံဖျေံလဝ် ပ္ဍဲကတိုၚ်သ္ၚိဝစ်တုဲ ဂဗုတ်ပလေံလဝ်ဇွ က္တဵုဒှ်လဝ်ရဂှ် ညးဒေသတအ် ဟီုကဵု ဌာန်ပရိုၚ်သြန်လောန်တိုၚ်(မ်)ရ။
ပ္ဍဲဂိတုဂျောန် စၟတ်တ္ၚဲ (၂၀) တုဲကၠုၚ်တေံ အခိၚ်ဗ္တံဂှ် ပ္ဍဲအကဵုအရှာမ်ဘာလကျာ် မၞိဟ်သုၚ်စဒၟံၚ်အရက်မွဲဂကောံကဵု ဥူကောသလ္လ အာယုက် (၆၀) သၞာံ မံၚ်ဒၟံၚ်ပ္ဍဲဘာဂှ် အရေဝ်ဂၠိုၚ် ဒှ်လဝ်သၞညးသ္ကအ်ရဂှ် ဂွံတီကေတ် အတိုၚ်တၚ်လဟီု ကျာ်ဇၞော်ဂ္ဇံဘာဂှ်ရ။

ကြဴနူဂှ် မၞိဟ်သုၚ်လဝ်အရက် (၄) တၠဂှ် ၜံက်ဂစိုတ်လဝ် ဥူကောသလ္လကဵုမုဲတုဲဂှ် ကၠဟ်ထောံဖျေံ ပ္ဍဲကတိုၚ်သ္ၚိဝစ်လကြဴဘာလကျာ်တုဲ ဂဗုတ်ပလေံလဝ်ဇွက္တဵုဒှ်လဝ်ရ။
ပ္ဍဲလ္တူပရေၚ်ပရောဏံ အတိုၚ်တၚ်ကျာ်ဇၞော်ဂ္ဇအ်ဘာ တေၚ်စိုပ်မ္ဂး ယျေဝ်လေန်ထောန်၊ ဘိုဝ်ဘိုဝ် ကေုာံအနှေ ပါလုပ်ဒၟံၚ် ပ္ဍဲပရေၚ်ပြိုက်ဂစိုတ်လဝ် ဥူကောသလ္လဂှ် ကောန်ဒပ်ဗၠာဲသၟိၚ်ကံၚ်ဇြဳပၞာန် ရပ်ကေတ်လဝ်ရ။
ဆ္ဂးညးမၞုံယၟုတုၚ်ဇြဝ် ပါလုပ်ဒၟံၚ် ပ္ဍဲပရေၚ်ပရောဏံ သှ်ေဒၟံၚ်မွဲတၠပၠန်ဂှ် ဟိုတ်နူဂြိပ်ဒဴပါဲဓလေတ်ဒၟံၚ်တုဲ လ္ပာ်ဒပ်ဗၠာဲသၟိၚ်တအ် ဗက်ဂၠာဲရပ်ဒၟံၚ်ရဂှ် ဟီုသ္ဂးလဝ်ရ။

ဇွဥူကောသလ္လ ဒးဒုၚ်ပြိုက်ဂစိုတ်လဝ်ဂှ် ပလံၚ်ဗစိုပ်ဏာလဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ပံၚ်ရဂှ် ဂွံတီကေတ်ရ။
ပ္ဍဲတွဵုရးဍုၚ်မန် ပ္ဍဲမွဲကာလဒပ်ပၞာန်သီအဝဵု မ္ၚးနူဂဗုတ်ကၠတ်ဂၠံက်၊ ဂဗုတ်ပၠံၚ်ၜးတုဲ ဂဗုတ်ပၠံၚ်ၜးပြိုက်ဂစိုတ်ကီု သီုဂဗုတ်ဂစိုတ်မၞိဟ် ပလေံဇွတအ်လေဝ် ဆက်က္တဵုဒှ်ဒၟံၚ် အဆက်က်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – ဂကောံရီုဗၚ်ဟံၚ်ပြာ်ပရေၚ်မၞိဟ် မိုဝ်နှိုၚ်

