ရေဝ်၊ ဂျောန်(၂၃)
တွဵုရးဍုၚ်မန် ပွိုၚ်ဍုၚ်ရေဝ် သၞေဟ်ကၚ်စၟဳစၟတ် ဒဒန်ချောၚ်တောၚ် မၞုံဗ္ဒာဲကွာန်ချောၚ်တောၚ်ဂှ် ဒပ်ပံၚ် ကောံ ဂကောံဇြဟတ်ပၠန်ဂတးတအ် လုပ်စိုပ်ဗတိုက်လဝ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သၞေဟ်ကၚ်စၟဳစၟတ်ချောၚ်တတာ မ္ၚးနူဒပ်ကံၚ်ဇြဳပၞာန်၊ ဗၠာဲသၟိၚ်တအ်တုဲ ပၞာန်ညးဍုၚ်ကွာန်တအ်လေဝ် ဖျေံလဝ်ဗဒိုပ်ဂှ် ပ္ဍဲဂိတုဂျောန် စၟတ်တ္ၚဲ (၂၀) အခိၚ်နူဂယး ၜိုတ်(၁၀)နာဍဳ ဒပ်ပံၚ်ကောံ ဂကောံဇြဟတ် ပၠန်ဂတးတအ် လုပ်စိုပ်ဗတိုက်လဝ်ရ။
ဟိုတ်နူပရေၚ်ပန်ဗတိုက်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ်ဗ္ဒာဲ ၂၀ မိနေတ်တုဲ လ္ပာ်ကံၚ်ဇြဳပၞာန် ဟွံအောန်နူမွဲတၠ ဒးချိုတ်လဝ် နွံမာန်ရဂှ် ဂွံတီကေတ်ရ။

ပ္ဍဲပရေၚ်ပန်ပှ်ောၜါလ္ပာ်ဂှ် လ္ပာ်ကံၚ်ဇြဳပၞာန် ပန်ဏာလွဟ်သၟတ် ပ္ဍဲလ္ပာ်ကွာန်ချောၚ်တောၚ်အဆက်က်တုဲ ညးဒေသမွဲတၠ ဒးလဝ်ဘဲဝပ်ရ။
ညးတြုံကောန်ဒေသ ဒးလဝ်ဘဲဝပ်မွဲတၠဂှ်မ္ဂး ပလံၚ်ဗစိုပ်ဏာလဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ရေဝ် နကဵုအရီုဗၚ် ဂကောံရီုဗၚ်ဟံၚ်ပြာ်မၞိဟ်တအ်ရ။

က္ဍိုပ်သ္ကိုပ်လကိုဟ်ဍုၚ်ရေဝ်ဂှ် ပ္ဍဲကဵုပေါဲဗတိုက်ဏံ လ္ပာ်ကံၚ်ဇြဳပၞာန် ဒးချိုတ်လဝ် (၄) တၠရဂှ် ချူပ္တိုန် လဝ် ပ္ဍဲမုက်လိက်ဇာနှိက်ပရေၚ်မၞိဟ်ညးရ။
မွဲအဆက်ဓဝ် ပ္ဍဲတ္ၚဲဂှ် အခိၚ်နူဂယး (၁၁) နာဍဳဂှ် ပ္ဍဲဗ္ဒာဲစၚ်နာဍဳ ဍုၚ်လၟိုၚ် နကဵုတၚ်စောတ်စောဲ ကၠောန် စဒၟံၚ်တၞးကာဒ်ကောန်ဍုၚ် ကဵုဒၟံၚ်ပရိုၚ်ကဵု ကံၚ်ဇြဳပၞာန်ဂးတုဲ ဒဝ်သာန်မျေတ်ကျွဲဂှ် ဂကောံလကိုဟ် ဍုၚ်ရေဝ် ပန်ပသောၚ်လဝ်ရ။
ဂိတုဂျောန် စၟတ်တ္ၚဲ (၃) တုဲကၠုၚ်ဂှ်လေဝ် သၞေဟ်ကၚ်စၟဳစၟတ် ဒဒန်ချောၚ်တောၚ်ရေဝ်ဂှ် ဂကောံ လကိုဟ်ဍုၚ်ရေဝ် လုပ်စိုပ်ဗတိုက်လဝ်တုဲ ပေါဲဗတိုက်ၜါလ္ပာ် က္တဵုဒှ်လဝ်ပွိုၚ် ဗ္ဒာဲ ၄၅ မိနေတ်တုဲ လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် နွံကၠုၚ်ရ။
ပရိုၚ်- သြၚ်လောန်တိုၚ်(မ်)
ဗီုရုပ်-လကိုဟ်ဍုၚ်ရေဝ်/CJ

