မၞိဟ်ဒးဒုၚ်ဂစိုတ် ပ္ဍဲကဵုဒၞါဲစၟဳစၟတ်ကံၚ်ဇြဳပၞာန်တံဂှ် နွံကၠုၚ် (၉၀) ပြၚ်

လ္ဂုၚ်၊ ဂျောန် (၂၃)

အလုံမွဲကၟိန်ဍုၚ် ကြဴနူဒပ်ပၞာန်သီအဝဵုတုဲ စဵုကဵုဂိတုဂျောန် ၂၁ သၞာံဏံဂှ် မၞိဟ်ဒးဒုၚ်ဂစိုတ်လဝ် ပ္ဍဲကဵုဗ္ဒိုပ်စၟဳစၟတ်ကံၚ်ဇြဳပၞာန်တံဂှ် နွံကၠုၚ် စဵုကဵု ၉၁ တၠရောၚ် ဂကောံရီုဗၚ်မၚ် မွဲကောန်ထံၚ်ပရေၚ် ဍုၚ်ကွာန် AAPP တံ လလောၚ်ပ္တိတ်လဝ်ရ။

ကြဴနူဒးဒုၚ်ရပ်ဒက်တုဲဂှ် မၞိဟ်ဒးဒုၚ်ဂစိုတ်ဍဵုဍိုက်ပျဲပျာံ ပ္ဍဲကဵုဒၞါဲစၟဳစၟတ် ပၞောဝ်ကဵု ၉၁ တၠဂှ် မၞိဟ်တြုံ ၈၈ တၠ မၞိဟ်ဗြဴ ၃ တၠ ပါလုပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

တုဲကၠုၚ် ပ္ဍဲဂိတုဨပရဴ ၂၇ တေံ ကြဴနူဗ္ဒိုပ်ဗၠာဲသၟိၚ် မၞုံကွာန်ညံၚ်ခါယှေ၊ ပွိုၚ်ဍုၚ်ဝဝ်၊ ရးဗဂေါ ဒးဒုၚ်ဗ္တိုက်တုဲဂှ် ညးဒေသ နူကဵုကွာန်ဗ္ဒါဲဗ္ဒါဲတံ (၃၀) ပြၚ်ဂှ် ဒပ်ကံၚ်ဇြဳပၞာန် ရပ်ဒက်လဝ်ရ။

ပ္ဍဲကဵုညးဒးဒုၚ်ရပ်ဒက်ဂမၠိုၚ် ဥူမျတုၚ် ကေုာံ ကိုဝ်ကျဝ်မျတုၚ် ဒၟံၚ်ကွာန်(ကျုံပါ) ၊ ဒဝ်တေန်မျဵုခိုၚ်၊ ဥူဝေန်ဇြဝ်ဌေ ကေုာံ ဥူသာန်ယှေ ဒၟံၚ်ကွာန်ဖိုဝ်သဗာတံ အပံၚ်ဖအိုတ် ၅ တၠ ချိုတ်အာလဝ် ပ္ဍဲကဵုဒၞါဲစၟဳစၟတ်တံဂှ်ရ။

အတိုၚ်တၚ်နၚ် AAPP တံဂှ်မ္ဂး ကြဴနူဒးဒုၚ်ရပ်ဒက် အပ္ဍဲသၞာံ ၂၀၂၁ တုဲဂှ် မၞိဟ်ဒးဒုၚ်ဂစိုတ် ပ္ဍဲကဵုဒၞါဲစၟဳစၟတ်တံဂှ် ၄၅ တၠ၊ ပ္ဍဲသၞာံ ၂၀၂၂ ဂှ် ၃၂ တၠ၊ အပ္ဍဲသၞာံဏံဂှ် ၁၄ တၠ ဒးဒုၚ်ဂစိုတ်လဝ်ရ။

သ္အာၚ်နူဂှ်ပၠန် ကြဴနူဒးဒုၚ်တပ်ၝောံပိုဒ်နာနာတုဲဂှ် မၞိဟ်ဒးဒုၚ်ဖျေံစၟတ်ဒဏ်ဂစိုတ် နွံကၠုၚ် စဵုကဵု ၁၅၇ တၠတုဲ ပ္ဍဲကဵုဏံ မၞိဟ်ဒးဒုၚ်ဖျေံစၟတ်လဝ်ဒဏ်ဂစိုတ်ကြဴမတ်တံဂှ် နွံလဝ် ၄၂ တၠရ။

အလုံမွဲကၟိန်ဍုၚ်ဂှ် အပ္ဍဲကာလဒပ်ပၞာန်သီအဝဵုဏံ ဟိုတ်နူဒပ်ကံၚ်ဇြဳပၞာန် ရပ်ဒက်ပန်ဂစိုတ်တံတုဲ မၞိဟ်ဒးပြဟ်လလုဲအာလဝ်ဂှ် နွံကၠုၚ် စဵုကဵုဗ္ဒါဲ ၃၇၀၀ ယျဂှ် ဂွံတီကေတ် အတိုၚ်တၚ်လလောၚ်တြး AAPP ရ။

ပရိုၚ်−သြၚ်လောန်တိုၚ်(မ်)

ဗီု−CJ

Leave a Reply

Your email address will not be published. Required fields are marked *