ပ္ဍဲထဳလေန် ဟိုတ်နူလွဟ်ဇၞော်ကံၚ်ဇြဳပၞာန်တုဲ သီုခမဳသၚ်မွဲဇကု ဇီုကပိုဒးလဝ်ဘဲဝပ် (၇) တၠ

ထဳလေန် -ဂျောန်(၂၃)

ရးမဂွေ၊ ပွိုၚ်ဍုၚ်ထဳလေန်ဂှ် ဟိုတ်နူလွဟ်ဇၞော်ဒပ်အမၠံက်ကံၚ်ဇြဳပၞာန် ကျောက်ထုတုဲ သီုခမဳသၚ်မွဲဇကု ဒးလဝ်ဘဲဝပ် (၇)တၠရဂှ် ညးဒေသတအ် ဟီုသ္ဂးလဝ်ရ။

ပ္ဍဲဂိတုဂျောန် စၟတ်တ္ၚဲ (၂၁) တုဲကၠုၚ် အခိၚ်ဇိုၚ်သဝ်တ္ၚဲဂှ် မကမ်လွဟ်ဇၞော် နူဒပ်အမၠံက်ကံၚ်ဇြဳပၞာန်ကျောက်ထု ပန်ပ္တိတ်ဏာဂှ် ဒတုံစှ်ေလဝ် ဗ္ဒာဲဘာလကျာ်ကွာန် ကွာန်ယွာတာတုဲ ခတိုဟ်အာလဝ်ရ။

“ပ္ဍဲဘာလကျာဂှ် ညးဍုၚ်ကွာန်ပါဲဘဲပၞာန် ပါဲဒၟံၚ်ဘဲပၞာန်ကဵု လကျာ်၊ ထပိုဲတအ် ဒးလဝ်ရ။ ချိုတ်လဝ်ဂှ် ဟွံမိၚ်လဝ်ဏီ။ ဒးလဝ်ဘဲဝပ်ဒးဒှ်ဓဝိၚ် နွံဒၟံၚ်မွဲတၠရ ဟီုဒၟံၚ်” ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဟိုတ်နူလွဟ်ဇၞော်ကံၚ်ဇြဳပၞာန် ဒတုံစှ်ေခတိုဟ်လဝ်တုဲ ကျာ်ဇၞော်ဂ္ဇအ်ဘာ ကွာန်ယွာတာ၊ ထပိုဲဇၞော်မွဲဇကု၊ ညးဍုၚ်ကွာန် နူကွာန်အညာပန်တၠကဵု ညးဍုၚ်ကွာန်နူကွာန်အကျဳ မွဲတၠ ပံၚ်(၇)တၠ ဇီုကပိုက်ဒးလဝ်ဘဲဝပ်ရ။

ပွိုၚ်ဍုၚ်ထဳလေန်ဂှ် ကံၚ်ဇြဳပၞာန် – ပျူသဝ်ထဳပံၚ်တောဲတုဲ ဟိုတ်နူထ္ပက်ဒၟံၚ်ကရောၚ်ပၞာန်ဂှ်ရ ပ္ဍဲဂိတုဂျောန် စၟတ်တ္ၚဲ (၂၁)တေံဂှ် ဟိုတ်နူဒပ်စဵုဒၞာညးဍုၚ်ကွာန် တံၚ်ခတိုဟ်လဝ်မာၚ်တုဲ မၞိဟ်ဇီုကပိုက်ဒးလဝ်ဘဲဝပ် ဟွံအောန်နူ(၅)တၠ နွံလဝ်တုဲ ပန်ဖျေံနၚ်လွဟ်ဇၞော် ပ္ဍဲကွာန် ဒၞာဲညးဍုၚ်ကွာန်တအ် မံၚ်တန်တဴဒၟံၚ်ဗီုလၟုဟ်ရဂှ် ဂွံတီကေတ်ရ။

သ္အာၚ်နူဂှ်ပၠန် ရေၚ်ယာန်ကွဳစက်ကံၚ်ဇြဳပၞာန် ပါကၠုၚ် (၉)ဖ္ဍိုက်ဂှ် နူပွိုၚ်ဍုၚ်ပေါက်မွဲကဆံၚ် ဟိုတ်နူစိုပ်ကၠုၚ်ဒၟံၚ် အကြာကွာန်အညာကဵု ကွာန်အကျဳဂှ်ရ ညံၚ်ညးဍုၚ်ကွာန်တအ် ဟွံဂွံသုၚ်စောဲဂၠံၚ်ကွဳစက် ကျောက်ထု-မေန်တာတ်ဂှ် ဒပ်စဵုဒၞာဒေသတအ် ကဵုလဝ်သတိ ညးဍုၚ်ကွာန်တအ်ရ။

ကြဴနူဒပ်ပၞာန်သီအဝဵုတုဲ သ္ကုတ်လကြဴဏံ ရးသေတ်ဂါၚ်၊ တွဵုရးချေၚ်၊ တွဵုရးကရေၚ်ဍာဲ၊ တွဵုရးကရေၚ်၊ ရးဗဂေါ၊ ရးအၚ်ဝ ကေုာံရးမဂွေတအ်ဂှ် ဟိုတ်နူဒှ်ဒေသပၞာန်ဒုၚ်ဒဝ်ပၠန်ဂတး ဇြဟတ်ခိုဟ်ဒၟံၚ်တုဲ ဒှ်ဒၞာဲဒးဒုၚ်ဖံက်ပ္ကဝ်ဒၟံၚ်အခေါၚ်အရာမၞိဟ်ကဵုကံၚ်ဇြဳပၞာန် ဂၠိုၚ်အိုတ်ရဂှ် ဂွံတီကေတ်ရ။

ပ္ဍဲရးမဂွေမ္ဂး ဒပ်ကံၚ်ဇြဳပၞာန်ဂှ် ဟိုတ်နူပြိုက်ဂစိုတ်ဒၟံၚ် လ္တူကောန်အရာပ်ညးဍုၚ်ကွာန်တုဲ ညးဍုၚ်ကွာန် (၃၀၀)ပြၚ် ဒးချိုတ်လဝ်ရဂှ် ဓမံက်ထ္ၜးလဝ် ပ္ဍဲဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် AAPP ရ။

ပရိုၚ်-သြၚ်လောန်တိုၚ်(မ်)

ဗီုရုပ်- CJ(ဗီုဂွံညာတ်ကေတ် ဒပ်ပၞာန်စံၚ်ပလီုလဝ် ကွာန်အကျဳဘာန် ပွိုၚ်ဍုၚ်ထဳလေန်)

Leave a Reply

Your email address will not be published. Required fields are marked *