လ္ဂုၚ်၊ ဂျောန် (၂၃)
ပ္ဍဲလက်ထက်ကံၚ်ဇြဳပၞာန် မသီကေတ်လဝ်အဝဵုကၟိန်ဍုၚ် နကဵုလွဟ်ဏံဂှ် ဗော်ပရေၚ်ဍုၚ်ကွာန်ဂမၠိုၚ် ၜိုန်ရကလေၚ်ပ္တိုန်လဝ်စရၚ်ကီုလေဝ် သွာၚ်ဍေံဍန်အာယျဂှ် သၟာပရေၚ်ဍုၚ်ကွာန်ဝှ်ကြံၚ်ဂမၠိုၚ် ကေုာံ ညးသ္ၚဳဂၠိပ်ဂမၠိုၚ် ဟီုဂးလဝ်ရ။
ကံၚ်ဇြဳပၞာန် မသီလဝ်အဝဵုကၟိန်ဍုၚ် နကဵုတၚ်စောတ်စောဲ စရၚ်မာဲဗၠေတ် ပ္ဍဲပေါဲရုဲမာဲသၞာံ ၂၀၂၀ ဂှ်ဝွံ ကလေၚ်ကၠောန်ဗဒှ်ကဵု ပေါဲရုဲမာဲဏောၚ်ဂးတုဲ ပ္ဍဲဂိတုဂျာန္နဝါရဳ ၂၆ တေံ စၞောန်ပျးလဝ် သၞောဝ်ပ္တိုန်စရၚ်ဗော်ပရေၚ်ဍုၚ်ကွာန်တံဂှ်ရ။
ကြဴနူစၞောန်ပျးသၞောဝ်ဂှ်တုဲ အပ္ဍဲပွိုၚ် ၆၀ တ္ၚဲဂှ် ဗော်ပရေၚ်ဍုၚ်ကွာန် ၆၃ ဗော် ပ္တိုန်လဝ်စရၚ်တုဲ ဗော်ပရေၚ်ဍုၚ်ကွာန် ဟွံပ္တိုန်စရၚ် ၄၀ ဗော်တံဂှ် ဒဒှ်ရကံၚ်ဇြဳပၞာန် ပလီုအာဗော်တံဏောၚ်ဂှ် လလောၚ်တြးလဝ်ရ။

ဆ္ဂး ဗော်ပရေၚ်ဍုၚ်ကွာန် ကလေၚ်ပ္တိုန်လဝ်စရၚ်ဂမၠိုၚ်ဝွံ ပ္ဍဲလက်ထက်ကံၚ်ဇြဳပၞာန်ဏံ ပ္ဍဲကဵုအခန်ကဏ္ဍ အခေါၚ်ဂွံရေၚ်တၠုၚ်ပံၚ်တောဲပါလုပ် လ္ဂောံကဵုပရေၚ်ဍုၚ်ကွာန်တံဂှ်ကီု၊ အခေါၚ်ရေၚ်တၠုၚ်ချဳဒရာၚ်တံကီု သီုကဵုထံက်ထ္ၜးပါ်ပါဲတံဒှ်တမ် အခန်ကဏ္ဍတံဏံ ကၠေံဗ္ဒန်ကၠုၚ်ရ။
သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် အခိၚ်အကာဲအရာဍုၚ်ကွာန် ဟွံၜိုဟ်သြိုဟ်ဒၟံၚ်ဏံ အခန်ကဏ္ဍဗော်တံဂှ်လေဝ် ဟွံစှ်ေကဵုနတဲရတုဲ အခိၚ်ဒးကူချပ်ဒၟံၚ် ပရေၚ်ဒတူလိုၚ်ဗော်တံကဵု ပရေၚ်ဂီုကၠီုဘဲအန္တရာယ်တံသၟးဂှ် အကာဲအရာရမျာၚ်ဗော်သ္ၚိတ်ကၠုၚ်နွံဂှ် သ္ၚဳဂၠိပ်လဝ်ရ။
“အကြာပရေၚ်ပၠန်ဂတး အကာဲအရာဍုၚ်ကွာန်မဟွံညိၚ်ဝတ်ဒၟံၚ်ဂှ် ကၠောန်ပေါဲရုဲမာဲဟွံမာန်ပုဟ်ဟီုဂှ် ချိုတ်ပၠိုတ်ရ။ ဟိုတ်ဂှ်ရ အခန်ကဏ္ဍဗော်တံဂှ်လေဝ် ဟွံစှ်ေကဵုနတဲရပုဟ်။ အလဵုဍေံတံဂှ် ဒးမံၚ်ဒၟံၚ် အပ္ဍဲဗွိုၚ်သၞောဝ်တုဲ စပ်ကဵုဗီုပြၚ်အလဵုအသဳကၠောန်ပရေၚ်ဍုၚ်ကွာန်တံ ဗီုအလဵုအသဳကၠောန်ၜိုတ်တံဂှ်တုဲ ဍေံတံမုမှ ပါ်ပါဲသ္ၚဳဂၠိပ်ဟွံမာန်ရပုဟ်။ ဟိုတ်ဂှ်ရ ညးတံဂှ်လေဝ် ဓဝ်ဍာံဂှ်မွဲလ္ပာ်၊ သ္ပထောံမၛ္ဇဟ် အရာတံဏံတုဲ ဒှ်ဒၟံၚ်အခိၚ်ဒးတော်ဒၟံၚ် လ္ပာ်ပရေၚ်ဂီုကၠီုအန္တရာယ် သွက်ပရေၚ်ဒတူလိုၚ်ဗော်ညးတံသၟးဂှ် ရမျာၚ်ပၠန်ဂတးတံဂှ် သာတုဲထတ်ကၠုၚ်ရ။ ရမျာၚ်ဗော်တံဂှ် ဒှ်ကၠုၚ်အကာဲအရာသ္ၚိတ်ဇြကၠုၚ်သိုက်က်နွံ” ဂှ် ညးသ္ဂးရ။

အခိၚ်လၟုဟ် ဗော်ပရေၚ်ဍုၚ်ကွာန်ဂမၠိုၚ်ဝွံ သၟဝ်သၞောဝ်ဗော်ပရေၚ်ဍုၚ်ကွာန်ကံၚ်ဇြဳပၞာန်တံဂှ် ညံၚ်ဗော်ဂွံဆက်ဒတူလိုၚ်အာဂှ်ဟေၚ် ဒးရုန်ဂ္စါန်ဒၟံၚ်တုဲ သွက်ဂွံထ္မံက်ပ္တိတ်ရမျာၚ်ညးဍုၚ်ကွာန်တံဂှ် အခေါၚ်အရာအောန်ကြဳအာရ။
အတိုၚ်တၚ်စၞောန်ပျး သၞောဝ်ဗော်ပရေၚ်ဍုၚ်ကွာန်တံဂှ်မ္ဂး ယဝ်ရဒှ်ဗော်စန်ဒက်အာ အလုံကၟိန်ဍုၚ်မ္ဂး ပပ္တံနူတ္ၚဲပ္တိုန်စရၚ်တုဲ အပ္ဍဲ ၉၀ တ္ၚဲဂှ် ကောန်ဗော်မွဲကိုဋ်ကဵု သြန်ဘဏ္ဍာ လ္ၚီကိုဋ်၊ အပ္ဍဲတ္ၚဲ ၁၈၀ တ္ၚဲဂှ် ဒးပံက်အာရုၚ်ဗော်တံ ပ္ဍဲကဵုပွိုၚ်ဍုၚ် ၁၆၅ ပွိုၚ်ဍုၚ်ရောၚ် မဒှ်ရ။
သ္အာၚ်နူဂှ်ပၠန် ယဝ်ရဒှ်ဗော်စန်ဒက်အာ ပ္ဍဲကဵုရးဒေသဇၞော် ဟွံသေၚ်မ္ဂး ပ္ဍဲကဵုတွဵုရးမွဲဓဝ်ရမ္ဂး ဒးပံက်အာရုၚ် ပ္ဍဲကဵုတွဵုရး ဟွံသေၚ်မ္ဂး ရးဒေသဇၞော်ဂှ် အောန်အိုတ် ၅ ပွိုၚ်ဍုၚ်ဏောၚ်ဂှ် စၞောန်ပျးလဝ်ရ။
ဗော်ဒဳမဝ်ကရေတ်တေတ်ကောန်ဂကူကရေၚ် မပ္တိုန်လဝ်စရၚ် နူကဵု UEC နဒဒှ်ဗော်စန်ဒက် ပ္ဍဲတွဵုရးကရေၚ်ဂှ် ပြဟ်ဟ်ဏံ ဟိုတ်နူဒှ်ဒၟံၚ်အကာဲအရာ ဒးဂ္စါန်ဒၟံၚ် သွက်ဂွံကလေၚ်ဒက်ဗော်ပၠန်ဂှ်ရ ကေၚ်ကာကောန်ဍုၚ်အရၚ်တံဂှ် ကၠောန်ဟွံမာန်ဏီပုဟ်ဂှ် ဥက္ကဌဗော် မာန်အံၚ်ပျဳသဵု ဟီုရ။
“ပြဟ်ဟ်ဏံဂှ် ပိုယ်တံ ရေၚ်တၠုၚ်မတံဏံ ဟွံသၠးဏီပုဟ်။ ဒှ်ဒၟံၚ်အကာဲအရာ ပိုယ်တံ ဒးဂ္စါန်ဒၟံၚ် သွက်ဂွံကလေၚ်ဗ္တန်ဗော်ကီုလေဝ် အစဳဇန်နူတမ်တေံဂှ် နွံမံၚ်ရ။ ဗော်ဂှ်ဝွံ ဟိုတ်နူဒှ်ဗော်ကောန်ဍုၚ် အရၚ်တံဂှ်ရ ကဵုက္ဍိုပ်ကဵုကောန်ဍုၚ်အရၚ်ကရေၚ်တံတုဲ သွက်ဂွံကၠောန်အာဂှ်နွံ။ ဆ္ဂး ကောန်ဍုၚ်အရၚ် သှ်ေတံဂှ်လေဝ် ပိုယ်တံ ဟွံကၠဟ်လဝ်ပုဟ်။ နူကဵုလ္ပာ်သ္ပမာန်ဂှ် ဆက်တုဲ ရံၚ်အာတၚ်နၚ်နွံပၟိက် ကောန်ဍုၚ်အရၚ်တံဂှ်တုဲ ယဝ်ရအကာဲအရာကဵုမ္ဂး ၜိုတ်ကဵုဂှ် သွက်ဂွံဆက်စဳဇန်ရေၚ်တၠုၚ်ကဵုဂှ် နွံရ” သာ်ဝွံ ညးသ္ဂးရ။
ကမ္မယှေန်ပေါဲရုဲမာဲကၟိန်ဍုၚ် သၟဝ်တဲကံၚ်ဇြဳပၞာန်ဂှ် ပ္ဍဲကဵုဗော်ပ္တိုန်လဝ်စရၚ်ဂမၠိုၚ် ဗော်ကောန်ဍုၚ်အရၚ် ၂၇ ဗော်ဂှ် ကဵုလဝ်အခေါၚ်ပ္တိုန်စရၚ်တုဲ သှ်ေဗော်ဂမၠိုၚ်ဂှ် ဆက်တုဲစဳစောတ်ကၠောန်ၜိုတ်ဒၟံၚ်ရ။

မွဲလ္ပာ်ပၠန်ဂှ် ကံၚ်ဇြဳပၞာန် အာယုက်ကာလကာတၟေၚ်မွဲဂိတုဓဝ် မသှ်ေဒၟံၚ်ဂှ်ဝွံ ဒဵုကဵုအခိၚ်လၟုဟ် တ္ၚဲကၠောန်ဗဒှ်ပေါဲရုဲမာဲဂှ် လလောၚ်တြးလဝ် ဟွံမွဲဏီရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ်လေဝ် အလဵုဒပ်ပၞာန် အခိၚ်ဟွံဂံၚ်တိတ်ဒၟံၚ်မ္ၚးဒပ်ဂှ် ဗော်ပရေၚ်ဍုၚ်ကွာန်လဵုမှ ကၠောန်သ္ပချဳဒရာၚ်ဟွံမာန်တုဲ ပေါဲရုဲမာဲကံၚ်ဇြဳပၞာန် မကၠောန်ဗဒှ်တံဂှ် ဒှ်ကဆံၚ်ဗော်ပရေၚ်ဍုၚ်ကွာန်တံ စၟဳဒၟံၚ်ဖိုဟ်ရောၚ်ဂှ် ပါ်ပါဲလဝ်ရ။
“ ဒပ်ပၞာန်ရဂှ် ဟွံဂံၚ်တိတ်ဒၟံၚ်မ္ၚးဒပ်ဂှ် ဗော်ပရေၚ်ဍုၚ်ကွာန်လဵုမှ မုပရေၚ်ချဳဒရာၚ်မှ ကၠောန်ဟွံမာန်ပုဟ်။ ဆ္ဂး ပေါဲရုဲမာဲ စကစ ဟီုဒၟံၚ်ဟီုဂှ် ယဝ်ရကၠောန်ဗဒှ်ကၠုၚ်မ္ဂး မၚ်ဂ္ဇအ်ဒၟံၚ် လ္တူသွပ်လ္ပအ်ရဏောၚ်။ ကဝ်မယှေန်ပေါဲရုဲမာဲဂှ်လေဝ် သိုက်က်ရ။ ပ္ဍဲကဵုဗော်ပ္တိုန်ဏာစရၚ် ၜိုတ် ၅၀ ပြၚ်ဂှ် လၟုဟ်ဂွံ ၂၇ ဗော်ယျ။ ဆ္ဂး ဒဵုကဵုအခိၚ်လၟုဟ် ဆလအ်ကၠောန်ပေါဲရုဲမာဲဏောၚ် သာ်လဵုကဵုအခေါၚ်ချဳဒရာၚ်ဏောၚ်ဟီုဂှ် လလောၚ်တြးဟွံမာန်ဏီပုဟ်။ ဂိတုအဝ်ဂါတ် ခြာဟွံလအ်ဏံဟီုမ္ဂး စိုပ်အခိၚ်ဒးကၠောန်ဗဒှ်ပေါဲရုဲမာဲတုဲ ကံၚ်ဇြဳပၞာန်လေဝ် အခေါၚ်အုပ်ဓုပ်အိုတ်အာဏောၚ်။ ယဝ်ရကၠောန်ပေါဲရုဲမာဲမာန်မ္ဂးလေဝ် နွံဆအယာံမာတ် သွက်ဂွံဆက်ဒတူလိုၚ်အာ နဒဒှ်အလဵုအသဳပၞာန်ရနွံ။ အေ ဂှ်တှ်ေ လုကဴအကာဲအရာ တံဟွံပြံၚ်လှာဲမ္ဂး ဗော်ပရေၚ်ဍုၚ်ကွာန်တံဂှ် ၜိုတ်ကဆံၚ်ဂ္ဇအ်မၚ်ပ္ဍဲသ္ၚိရဏောၚ်” သာ်ဝွံ ညးသ္ဂးရ။

အခိၚ်ကာလကာတၟေၚ်တုဲဒှ်မ္ဂး ကံၚ်ဇြဳပၞာန် မကၠောန်ဗဒှ်ကဵုပေါဲရုဲမာဲဏောၚ်ဂှ်ဝွံ အခိၚ်လၟုဟ် ပွိုၚ်ဍုၚ် ဒးကဵုက္ဍိုပ်ကဵုပရေၚ်ဂီုကၠီုဂှ် ၆၇ ပွိုၚ်ဍုၚ်နွံတုဲ ပွိုၚ်ဍုၚ်ဒးရေၚ်တၠုၚ်ကဵု ပရေၚ်ဂီုကၠီုဗွဲမစိုပ်တရဴတံဂှ် ၆၅ ပွိုၚ်ဍုၚ်နွံတုဲ ပ္ဍဲကဵုဒေသကွာန်ရးလ္ၚဵုတံဂှ် သာတုဲနွံပၟိက်ဒၟံၚ်ပရေၚ်ဂီုကၠီုရောၚ် ဒုၚ်လဝ်ဝန်ရ။
ပ္ဍဲကဵုရးဒေသ ကေုာံ ရး မၞုံအပ္ဍဲဍုၚ်တံဂှ် ဟိုတ်နူပွိုၚ်ဍုၚ်နွံ ၃၃၀ ဂှ်ရ နကဵုကံၚ်ဇြဳပၞာန် ၜိုတ် ၆၀ တၟံကၠံ ၜိုတ်ပွိုၚ်ဍုၚ် ၁၉၈ ပွိုၚ်ဍုၚ်ဟေၚ် ညံၚ်ဂွံၜိုဟ်သြိုဟ်က္ဍိုပ်ကၠံပေၚ်ၚ်ဂှ် ထိၚ်ဒက်မာန်လဝ်ရ။
အတိုၚ်တၚ်နၚ် ဂကောံသုတေသန ISP-Myanmar တံဂှ်မ္ဂး အပ္ဍဲကာလဒပ်ပၞာန်သီအဝဵုတုဲ လောန်ကၠုၚ်ၜါသၞာံပြၚ်ဂှ် ပ္ဍဲကဵုပွိုၚ်ဍုၚ် ၁၉၀ ပြၚ်တံဂှ် ပေါဲဗ္တိုက် ၈၀၀၀ ပြၚ် က္တဵုဒှ်လဝ်ရောၚ် လလောၚ်ပ္တိတ်လဝ်ရ။
ညးခါတ်အကာဲပရေၚ်ဍုၚ်ကွာန်တံဂှ် ပရေၚ်ဍုၚ်ဗၟာ ဗွိုၚ်ပၞာန်မသၠဲလးကၠုၚ်ဂှ်ဝွံ သွက်ဂွံကၠောန်ဗဒှ် ပေါဲရုဲမာဲဂှ် သ္ၚောဲဒၟံၚ်ဏီတုဲ ဗော်ပရေၚ်ဍုၚ်ကွာန်တံဂှ်လေဝ် သွက်ဂွံဆက်ဒတူလိုၚ်အာ သၟဝ်ပရေၚ် အုပ်ဓုပ်ကံၚ်ဇြဳပၞာန်တံဓဝ်ရ ဂ္စါန်ဒၟံၚ်အိုတ်ဂှ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media

