ဟိုတ်နူပရေၚ်ပန်ပှော်လွဟ်ဇၞော်ဒပ်ပၞာန် ပ္ဍဲသ္ကုတ်ဂၠံၚ်မတ်မလီု-ရေဝ်ဂှ်တုဲ ညးဒေသတံ အရာမဒှ်ဓဝိၚ်သၠုၚ်ကၠုၚ်

ရေဝ်၊ဂျောန်(၂၃)

တွဵုရးဍုၚ်မန်၊ ပ္ဍဲဂၠံၚ် မတ်မလီု-ရေဝ် မဒှ်ဂၠံၚ်ဇၞော်ဗျဳထံၚ်သု စၟတ်(၈)ဂှ် ဟိုတ်နူပွပန်ပှော်လွဟ်ဇၞော် ဒပ်ကံၚ်ဇြဳပၞာန်တံတုဲ အကြာညးဍုၚ်ကွာန်အာတရဴတံကဵု ညးဒေသတံဂှ် ပရေၚ်ဒှ်ဓဝိၚ်တံ သၠုၚ်ကၠုၚ်မံၚ်ရောၚ် ဂွံတီကေတ်ရ။

နူစဂိတုဂျောန် စၟတ်တ္ၚဲ(၁၈)တုဲကၠုၚ်တေံတုဲ ပ္ဍဲဂၠံၚ်ဇၞော်ဗျဳထံၚ်သု စၟတ်(၈)ဂှ် ကရောၚ်ပၞာန်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ၊ ဂကောံဒပ်ပြုပြေၚ်ပၞာန်တၟေၚ် S.O.F ကဵု PDF တံဂှ် သွက်ဂွံချဳဒရာၚ်ထိၚ်ဒဝ်တိဍာ်ဂှ်တုဲ ကၠောန်သ္ပလဝ် ပရေၚ်စၟဳတ်တံရ။

ဂကောံဒပ်ပံၚ်ကောံဂှ် ပ္ဍဲဂိတုဂျောန် စၟတ်တ္ၚဲ(၂၀)ဂှ်လေဝ် သွက်ပရေၚ်အုပ်ဓလီုတိဍာ်တုဲ အဃော ကၠောန်သ္ပမံၚ်ပရေၚ်စၟဳတ် မွဲဒမြိပ်ဂၠံၚ် မတ်မလီု-ရေဝ်-ထဝါဲဂှ် နူကဵုတမ်ဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ် ဍုၚ်ရေဝ်တံ ပန်ပှော်လဝ်လွဟ်ဇၞော် ပ္ဍဲသ္ကုတ်ဂၠံၚ်ဂှ် ဟွံအောန်နူကဵု (၅) မရ။

ဟိုတ်နူပရေၚ်ပန်ပှော်လွဟ်ဇၞော်ဒပ်ပၞာန် ပ္ဍဲသ္ကုတ်ဂၠံၚ်မတ်မလီု-ရေဝ်ဂှ်တုဲ ညးဒေသတံ အရာမဒှ်ဓဝိၚ်သၠုၚ်ကၠုၚ်

လွဟ်ဇၞော်ကံၚ်ဇြဳပၞာန်ပန်ပှော်လဝ်တံဂှ် ပွဇီုကပိုက်ဒးဂကောံဒပ်ပံၚ်ကောံတံဟွံမွဲကီုလေဝ် ဒတုံဗ္တိုဟ် ထ္ကးအာလဝ် ပ္ဍဲကၠအ်ထၜိုတ်ညးဒေသပိုၚ်တံရ။

ဟိုတ်နူပွပန်ပှော်လွဟ်ဇၞော် ဒပ်ကံၚ်ဇြဳပၞာန်တံကြာန်န်ဂှ်ရ သွက်ဂွံအာကၠအ် ကေုာံ သွက်ဂွံအာပ္ဍဲဝၚ် ကမၠောန်ဂှ် ပွဂွိၚ်ဂွါဲတံ နွံမံၚ်တုဲ သွက်ဂွံအာတရဴဂှ်လေဝ် ဒးဖေက်လကိုတ်မံၚ်ရဂှ် ညးဒေသရေဝ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။

“လွဟ်ဇၞော်တံဂှ် ဒးဂွိၚ်ကွေံရ။ ဒၞါဲဍေံတံနွံဂှ်လေဝ် ဟွံဂံၚ်အာပုဟ်။ ဒှ်မံၚ်ဗီုဏံတှ်ေ။ အာကၠုၚ်တှ်ေ ဗက်ပန်မံၚ်ကဵုလွဟ်ဇၞော်တှ်ေ လဆောဝ်လဆောဝ် ဒးကောန်အရာပ်တံ။ ဗီုတံဏံလေဝ်ဏး။ ဖေက်ညးသ္ကအ်အိုတ်ရလေဝ်။ ဒၞါဲလဵုဒှ်ဒှ် ဍေံတံဂွံပရိုၚ်တှ်ေ ဖေက်ဍေံပန်နၚ်ကဵုလွဟ်ဇၞော်ရ။ ပန်အကြာဍေံတံရေၚ်သ္ကအ်ဂှ် ကိစ္စဟွံမွဲပုဟ်။ ယဝ်ရဒးအာ ကောန်အရာပ်တံ၊ မၞိဟ်မုဟွံတီတံဂှ်တှ်ေ ဗီုလဵုသ္ပရောဂးတုဲ ရဲကၠအ်တံသီုဖအိုတ် ဂွိၚ်မံၚ်အိုတ်ရ” ဂှ် သ္ဂးရ။

လ္တူဂၠံၚ်ဇၞော်ဗျဳထံၚ်သု စၟတ် (၈)ဂှ် ပ္ဍဲဂိတုဂျောန်စၟတ်တ္ၚဲ(၂၂) အခိၚ်နူဂယးဂှ်လေဝ် ကရောၚ်ပၞာန် ပံၚ်ကောံ KNLA၊ S.O.F ကဵု လကိုဟ်ဍုၚ်ရေဝ်တံဂှ် လ္ဂောံကဵု ပရေၚ်အုပ်ဓလီုတိဍာ်ကဵု ပရေၚ်ဂီုကၠီုတုဲ ကၠောန်သ္ပမံၚ် ပရေၚ်စၟဳတ်ရဂှ် ဂကောံဒပ်ပြုပြေၚ်ပၞာန်တၟေၚ် S.O.F လလောၚ်ပ္တိတ်လဝ်ရ။

ပ္ဍဲမွဲဒမြိပ်ဂၠံၚ်ဇၞော်စၟတ်(၈) မတ်မလီု၊ မုဟ်ဍုၚ်၊ ဇြပ်ဗု၊ ရေဝ်၊ ထဝါဲ၊ ဘိက်ဂှ် စနူဂိတုဂျောန် စၟတ်တ္ၚဲ(၁၅) တုဲ ကွဳစက်အာကၠုၚ်မံၚ်တံဂှ် အခိၚ်ကရောၚ်ပၞာန်ပံၚ်ကောံ KNLA တံ ကၠောန်သ္ပပရေၚ်စၟဳတ်မ္ဂး ဗ္ဒေါံကွဳစက်တုဲ သွက်ဂွံဒုၚ်စၟဳတ်ကီု၊ ညံၚ်ဟွံဂွံဖ္ဍိုက်ပ္တိုန် မၞိဟ်၊ ကပေါတ်ဆေၚ်စပ်ကဵုကံၚ်ဇြဳပၞာန်တံဂှ် သ္ကိုပ်ဌာန KNLA တမ်ဒပ်(၂၇)ဂှ် လလောၚ်ပ္တိတ်လဝ်အမိၚ် ပ္ဍဲဂိတုဂျောန် စၟတ်တ္ၚဲ(၁၀) ဂှ်ရ။

သ္အာၚ်နူဂှ်ပၠန် ညးဍုၚ်ကွာန်အာတရဴတံဂှ် ညံၚ်ဟွံဂွံကၠောန်သ္ပ ဍိုက်ပါဗက်မွဲကရောံကဵု ဂကောံဒပ်ကံၚ်ဇြဳ ပၞာန်တံဂှ်ကီု၊ နကဵုကွဳစက်တံဂှ်လေဝ် သွက်ဒုၚ်စၟဳတ်ခိုဟ်ဟ် ကုဂကောံရပ်လွဟ် ကောန်ဍုၚ်အရေၚ် တၞဟ်ဟ်တံကီုဂှ် ဒုၚ်လဝ်ဂုဏ်ရ။

နကဵု ဂကောံဒပ် KNLA ဂှ် ဟိုတ်နူချဳဒရာၚ်ထိၚ်ဒဝ်မံၚ် မွဲဒမြိပ်ဂၠံၚ်ဇၞော် စၟတ်(၈)ယျဂှ်ရ ညံၚ်ညးဍုၚ်ကွာန် အာတရဴတံ ဟွံဂွံဇီုကပိုက်လီုလာ်ကီု ကေုာံ ဟိုတ်နူ ဂကောံဒပ်သၟဝ်တဲကံၚ်ဇြဳပၞာန်တံ ကေတ်ဇွောံစဵုဒၞါ ကုညးဍုၚ်ကွာန်အာတရဴတံတုဲ သုၚ်စောဲအာကၠုၚ်မံၚ်အိုတ်ဂှ်ရ ဒးလလောၚ်ပ္တိတ်လဝ်အမိၚ်ရောၚ်ဂှ် ပါလုပ်ပ္ဍဲတၚ်လလောၚ်တြးဂှ်ရ။

ပရိုၚ်- သြၚ်လောန်တိုၚ်မ်

ဗီု- KNLA

Leave a Reply

Your email address will not be published. Required fields are marked *