မုဟ်ဍုၚ်၊ ဂျောန်(၂၄)
တွဵုရးဍုၚ်မန် ပွိုၚ်ဍုၚ်မုဟ်ဍုၚ် ဟိုတ်နူဗုံခတိုဟ်လဝ် ဗ္ဒာဲဘာတန်သၠုၚ် ဍုၚ်ကၟာဝက်တုဲ ပၞာန်ညးဍုၚ် ကွာန် ဒုၚ်ဩဇာကံၚ်ဇြဳပၞာန်မွဲတၠ ဒးချိုတ်လဝ်တုဲ ဒးလဝ်ဘဲဝပ်မွဲတၠရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲတာဲကၚ် ဗ္ဒာဲဘာတန်သၠုၚ် ကောန်ဒပ်ကံၚ်ဇြဳပၞာန် လေပ်ကေတ်ဒၟံၚ်ပရေၚ်ဂီုကၠီုဂှ် ပ္ဍဲဂိတုဂျောန် စၟတ်တ္ၚဲ (၂၂) အခိၚ်ဒေါဝ်တ္ၚဲ ၜိုတ် (၃)နာဍဳဂှ် ဗုံခတိုဟ်လဝ်ရ။
ဟိုတ်နူဗုံခတိုဟ်လဝ်တုဲ ဥူမျိုဝ်လွေန် ကောန်ဒပ်ပၞာန်ညးဍုၚ်ကွာန် ကေတ်ဒၟံၚ်ဂီုကၠီု ပ္ဍဲတာဲကၚ်ဂတ မုက်ဘာဂှ် ဒးလဝ်ကဝေက်မာၚ် ပ္ဍဲက္ဍိုပ်ကဵုပ္ဍဲဇိုၚ် ဒးချိုတ်လဝ် ပ္ဍဲဒၞာဲက္တဵုဒှ်ပရေၚ်ပရောဂှ်တုဲ ညးလုပ် ဂကောံပၞာန်ညးဍုၚ်ကွာန် ဥူတေန်လှာၚ်ဂှ်မ္ဂး ဒးလဝ်ကဝေက်မာၚ် ပ္ဍဲတဲကဵုပ္ဍဲဇကုရ။

အတိုၚ်ညးဒေသတအ်ဟီုလဝ်မ္ဂး ပရေၚ်ပါ်ခတိုဟ်ဏံဂှ် ဒှ်ကၠုၚ်ဟိုတ်နူမာၚ်ပါံ ခတိုဟ်လဝ်ရဂှ် ၜိုန်ရဟီု ဂးဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာဟွံမာန်ရ။
ကြဴနူပါ်ခတိုဟ်တုဲဂှ် ကောန်ဒပ်ကံၚ်ဇြဳပၞာန် ကေတ်ဒၟံၚ်ဂီုကၠီု ပ္ဍဲရုၚ်သ္ကိုပ်ပရေၚ်အုပ်ဓုပ် ဍုၚ်ကၟာဝက်ဂှ် ဖံက်ပန်လဝ်လွဟ်ကီု ဒးဗလးကဵုလဝ်ဘာ ကၠာဟွံဂွံစိုပ် အခိၚ်ဗလးဘာဏီကီုရဂှ် ဂွံတီကေတ်ရ။
ပ္ဍဲကဵုချာန်နေဝ်တေဝ်လဳဂရာမ် ညးထံက်ဂလာန်ဒပ်ပၞာန်တအ်ဂှ် ပရေၚ်မာၚ်ပါ်ခတိုဟ်လဝ်ဏံ ဟိုတ်နူ မာၚ်ကၠောန် PDF တအ် ကၠုၚ်ပါံစွံလဝ် ပါ်ခတိုဟ်လဝ်တုဲ ဒးဇီုကပိုက်ချိုတ်လဝ်ရဂှ် ပရေၚ်တြးဒၟံၚ် ဝါဒနွံရ။

စပ်ကဵုပရေၚ်ပရောဏံတုဲ လ္ပာ်ဒပ်စဵုဒၞာညးဍုၚ်ကွာန် ပွိုၚ်ဍုၚ်မုဟ်ဍုၚ်တအ်ဂှ် စဵုကဵုလၟုဟ်ဏံ ပွမလလောၚ်တြးပ္တိတ်လဝ် မမိက်ကဵုမွဲမွဲ ဟွံဂွံဆဵုလဝ်ဏီရ။
တွဵုရးဍုၚ်မန် ဍုၚ်ကၟာဝက်ဂှ် ဒှ်ဍုၚ်ကောန်ဂကူမန်တအ် မံၚ်တန်တဴဒၟံၚ်ဂၠိုၚ်အိုတ်မွဲဍုၚ်တုဲ ဒေသတံဒပ် ပၞာန်တိုက်ကံၚ်ဇြဳပၞာန် ခမရ(၂၀၉) ဖျေံသ္ဇိုၚ်မွဲဒေသလေဝ် ဒှ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ

