ပ္ဍဲတိဍာ် KNU ဟိုတ်နူလွဟ်ဇၞော်တုဲ ပ္ဍဲပွိုၚ်မွဲဂိတု ညးဒေသ ၂၀,၀၀၀ ပြၚ် ဒးဂြိပ်ဒဴလဝ်ပၞာန်

ကအ်ကြိက်၊ ဂျောန်(၂၄)

ပ္ဍဲတိဍာ်ထိၚ်ဒဝ် ဗော်သွးကောန်ဂကူကရေၚ် KNU ဒပ်မဟာ(၆)ဂှ် ဟိုတ်နူပရေၚ်ဒပ်ကံၚ်ဇြဳပၞာန် ပ္တဝ်ကဵုကောန်အရာညးဍုၚ်ကွာန် ပန်ဗတိုက်လဝ်တုဲ ပ္ဍဲပွိုၚ်မွဲဂိတု ကောန်အရာပ်ညးဍုၚ်ကွာန် ၂၀,၀၀၀ ပြၚ် ဒးပါဲဓလေတ်လဝ်ဘဲပၞာန်ရဂှ် ဌာနလလောၚ်ပရိုၚ် ခရိုၚ်ဒူပလာယာ လလောၚ်တြးလဝ် ပ္ဍဲဂိတုဂျောန် စၟတ်တ္ၚဲ (၂၃)ရ။

ပ္ဍဲတိဍာ် KNU ဒပ်မဟာ (၆) ခရိုၚ်ဒူပလာယာဂှ် ပ္ဍဲဂိတုမေဂှ် ဒပ်ကံၚ်ဇြဳပၞာန် ပ္တဝ်လဝ်ကဵု ကောန်အရာပ်ညးဍုၚ်ကွာန်တုဲ ပရေၚ်ပန်ဗတိုက်လဝ် ပ္ဍဲကဵုကွာန်ဂမၠိုၚ် ကဵုက္ၜၚ်ကျာ (၉)ဝါ ပရေၚ်ပန်ဖျေံလွဟ်ဇၞော် (၁၂၀)ဝါ ကၠောန်သ္ပဏာလဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ဟိုတ်နူဒပ်ကံၚ်ဇြဳပၞာန် ပန်ဗတိုက်လဝ်တုဲ ကောန်အရာပ်ညးဍုၚ်ကွာန် (၃)တၠ ပါလုပ်သီုကောန်ၚာ်(၁)တၠ လမျီုဒးအိုတ်လဝ်တုဲ ကောန်အရာပ်ညးဍုၚ်ကွာန် (၁၇)တၠ ပါလုပ်သီုကောန်ကောန်ၚာ် (၁)တၠ ဇီုကပိုက်ဒးလဝ်ဘဲဝပ်ကီု ဘာကျာ်ခရေတ်ယာန်(၁)ဘာ၊ စမြိုၚ်သ္ၚိဒၟံၚ် (၂၆)မ၊ ကွဳစက်သ္ၚိ (၁) ဖ္ဍိုက် ဇီုကပိုက်ဒးလီုလာ်လဝ်ရဂှ် ဓမံက်ထ္ၜးလဝ်ရ။

သ္အာၚ်နူဂှ်ပၠန် ဟိုတ်နူဒပ်ကံၚ်ဇြဳပၞာန် ပန်ဗတိုက်ကဵုက္ၜၚ်ကျာ ပန်ဖျေံလဝ်ကဵုလွဟ်ဇၞော်တုဲ သ္ဂံၚ်ပၠန်ဂတး (၃)တၠ ပါလုပ်သီုသ္ဂံၚ်ဗြဴ (၁)တၠ ဒးပြဟ်လလုဲလဝ်တုဲ သ္ဂံၚ်ဒးလဝ်ဘဲဝပ် နွံ (၂)တၠရဂှ် လလောၚ်တြးလဝ်ရ။

ညးဒေသ ဒးပါဲဓလေတ်ဒၟံၚ်ဘဲပၞာန်တအ်ဂှ် ဒၟာနူဒှ်ဒၟံၚ်ရာသဳကသီုတုဲ ဒးဆေၚ်ဒၟံၚ်မုက်ကဵု တၚ်ခက်ခုဲ မပ္တံကဵုဒၞာဲမံၚ်၊ ဇွောံမစၞစဟွံရုံဂပ်၊ ဂဥုဲဇဗဆေၚ်စပ်ကဵု ပရေၚ်ထတ်ယိုတ် ကေုာံပရေၚ်လွဳလွတ် ဟွံရုံဂပ်ရဂှ် KNU ဟီုသ္ဂးလဝ်ရ။

အတိုၚ်ဂကောံအခေါၚ်အရာမၞိဟ်ကရေၚ် KHRG ဟီုသ္ဂးလဝ်မ္ဂး ပ္ဍဲတိဍာ်ထိၚ်ဒဝ် ဂဝ်ဒူလေဝ်ဂှ် ဒပ်ကံၚ်ဇြဳပၞာန် ပ္တဝ်လဝ်ကဵု ကောန်အရာပ်ညးဍုၚ်ကွာန်တုဲ ဟိုတ်နူချဳဒရာၚ်ကၠုၚ်ပရေၚ်ပၞာန်ကီု သီုကလိလောန်ဖံက်ပ္ကဝ်ဒၟံၚ်အခေါၚ်အရာမၞိဟ် ဂၠိုၚ်တိုန်ဒၟံၚ်တုဲ ညးဍုၚ်ကွာန်တအ် ဒးဒှ်ဓဝိၚ်ဂွိၚ်ဖေက် လကိုတ်ဒၟံၚ်တုဲ လၟိဟ်ညးဍုၚ်ကွာန် (၆၀၀,၀၀၀)ပြၚ် ဒးပါဲဓလေဝ်ဒၟံၚ်ဘဲပၞာန်ရဂှ်လေဝ် ဂွံတီကေတ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-KHRG