(သၚ်္ချာ) ဥူယျေဝ်နာၚ် မဒှ်ဂကောံအုပ်ဓုပ် ပွိုၚ်ဍုၚ်ကျာ်ထဝ် ဒးဒုၚ်ပန်ဂစိုတ်

ကျာ်ထဝ်၊ ဂျောန် (၂၄)

ဂကောံအုပ်ဓုပ်ကောပ်ကာဲ ပွိုၚ်ဍုၚ်ကျာ်ထဝ် တွဵုရးဍုၚ်မန် ဥူယျေဝ်နာၚ်အံၚ် (က) (သၚ်္ချာ) ဥူယျေဝ်နာၚ်ဝွံ ပ္ဍဲဂိတုဂျောန် (၂၂) အခိၚ်ဇိုၚ်သဝ်တ္ၚဲဂှ် ဒးဒုၚ်ပန်ဂစိုတ်လဝ် ကဵုသေနာတ်တုဲ ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

(သၚ်္ချာ) ဥူယျေဝ်နာၚ်ဝွံ နူကဵုဍုၚ်ကျာ်ထဝ် သွက်ဂွံဗ္တောန်ကျူယှေန် အခိၚ်အာလ္ပာ်ကွာန်ကျာ်ပိဂှ် ဒးဒုၚ်ပန်ဂစိုတ်လဝ် နကဵုသေနာတ် ဂတမုက်ဘာဂြိုပ်ကျာ်ပိဂှ်ရ။

ဟိုတ်နူဒးဒုၚ်ပန်ဂစိုတ်လဝ် ကဵုသေနာတ်ဂှ်ရ (သၚ်္ချာ) ဥူယျေဝ်နာၚ်ဝွံ ပ္ဍဲကဵုကအ်၊ သြိုဟ် ကေုာံ က္ဍိုပ်တံဂှ် မကမ်ကၠိုဟ်လုပ်တုဲ ကလိဂွံအာလဝ်ဝပ် ၉ လစုတ်တုဲ ချိုတ်အာလဝ် ပ္ဍဲကဵုဒၞါဲဒှ်ပရူဂှ်ရ။

(သၚ်္ချာ) ဥူယျေဝ်နာၚ် မချိုတ်အာဂှ်ဝွံ ဂကောံဟံၚ်ပြာ်မှာဇန်တံ ပလံၚ်ဗစိုပ်ကဵုလဝ် ရုၚ်ကရေက်သြိုဟ် ရုၚ်ဂဥုဲကျာ်ထဝ်ဂှ်တုဲ နူဂှ်မွဲကဆံၚ် ကလေၚ်ယိုက်ဖျဴနၚ် သ္ၚိညးယျဂှ် ဂွံတီကေတ်ရ။

ဥူယျေဝ်နာၚ် မဒှ်ဂကောံကံၚ်ဇြဳပွိုၚ်ဍုၚ် ကံၚ်ဇြဳပၞာန်ဂှ် ဂကောံဇြဟတ်ပၠန်ဂတးကျာ်ထဝ် (KRF) တံ ပန်ပှော်ပသောၚ်လဝ်ရောၚ် လလောၚ်ပ္တိတ်လဝ်ရ။

လ္ပာ် KRF တံဂှ် (သၚ်္ချာ) ဥူယျေဝ်နာၚ်ဝွံ တပ်စုတ်ၝောံပိုဒ်နာနာ ဟိုတ်နူရပ်ဒက်ဘပဠဒၟံၚ် ညးဍုၚ်ကွာန်ကောန်အရာပ်တံတုဲ အာတ်ဒၟံၚ်လှုဲဂှ်ရ ဒးပသောၚ်လဝ်ရောၚ်ဂှ် သ္ဂးရ။

လၟေၚ်ဒဒှ်ဏံဝွံ ပ္ဍဲပွိုၚ်ဍုၚ်ကျာ်ထဝ်ဂှ် အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ဏံ ဒှ်လၟေၚ်ဒဒှ် ဂကောံကံၚ်ဇြဳကဆံၚ်ပွိုၚ်ဍုၚ် နူကဵုကံၚ်ဇြဳပၞာန် မဒက်ပ္တန်လဝ်တံ ဒးဒုၚ်ပန်ဂစိုတ်လဝ် နကဵုသေနာတ် မွဲတၠရောၚ် မဒှ်ရ။

ပရိုၚ်−သြၚ်လောန်တိုၚ်(မ်)

ဗီု−CJ