ကံၚ်ဇြဳပၞာန်ကၟာတ်လဒဵုလဝ် အခေါၚ်ရီုဗၚ်ဟံၚ်ပြာ် ညးဒေသ ဒးလဝ်ဘဲဒဏ်လဗိုတ်ကျာတအ်

မတ်မလီု – ဂျောန်(၂၄)

လဗိုတ်ကျာမိုဝ်ခါဇြိုၚ်ကလုံ လုပ်ကၠုၚ်လဝ်ကၟိန်ဍုၚ်ဗၟာတုဲ စဵုကဵုအခိၚ်ပွိုၚ်မွဲဂိတုပြၚ်ဂှ် နူလ္ပာ်ကံၚ်ဇြဳပၞာန် ကၟာတ်ဒၞာလဝ် အခေါၚ်ဂကောံရီုဗၚ်ဟံၚ်ပြာ်ပရေၚ်မၞိဟ် အာစိုပ် သွက်ဂွံကဵုအရီုဗၚ်ထံက်ပၚ် ဗ္စာရဏာပရေၚ်မၞိဟ် ပ္ဍဲတွဵုရးရခေၚ်ရဂှ် UNOCHA လလောၚ်တြးလဝ် ပ္ဍဲဂိတုဂျောန် စၟတ်တ္ၚဲ (၂၂) ရ။

ဟိုတ်နူတၚ်သ္ဂုတ်သွာတ်ကံၚ်ဇြဳပၞာန်တုဲ အကာဲအရာ ပရေၚ်မံၚ်စံၚ်စသုၚ် ညးဒေသ ဒးလဝ်ဘဲဒဏ် လဗိုတ်ကျာတအ် ဟုတ်ယုတ်စှ်ေဒၟံၚ်ဂှ် သာပရေံကၠုၚ်ဒၟံၚ်တုဲ ဟိုတ်နူရာသဳမုဟ်သုန် ကေုာံဗြဲဂူတရိုပ်စှ်ေ ဇၞော်ကဵုဇြဟတ်တုဲ ပရေၚ်ဍာ်ဇၞော် ဍာ်ကၟိုဟ်လေဝ် ညးဒေသ ဒးလဝ်ဘဲဒဏ်လဗိုတ်ကျာတအ် ဒးဒုၚ်ဒၟံၚ်ဘဲဒဏ် သ္ကာတ်တ်မြဟ်ဟ်ရ။

အခိၚ်လၟုဟ်ဂှ် သွက်ညးဍုၚ်ကွာန် ဒးလဝ်ဘဲဒဏ်လဗိုတ်ကျာ(၁၁၀၀၀၀) ပြၚ်တအ်ဂှ် ရီုဗၚ်ကဵုလဝ်ကၟဳဗ္ဒၚ်ကီု သီုကပေါတ်ဟံၚ်ပြာ် တၞဟ်သ္အာၚ်တုဲ ညးဒေသရခေၚ် ဗ္ဒာဲ (၃၀၀၀၀၀) ဂှ်လေဝ် ထံက်ပၚ်ရီုဗၚ်ကဵုလဝ် ဇွောံမစၞစရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ရုၚ်ပ္ညဳပ္ညပ်ပံၚ်ဗ္စပ်ဆေၚ်ရာကဵု အရီုဗၚ်ဗ္စာရဏာပရေၚ်မၞိဟ် ကုလသမဂ္ဂ UNOCHA ရ။

ပ္ဍဲတွဵုရးချေၚ်လေဝ် ကံၚ်ဇြဳပၞာန် ကၟာတ်လဒဵုလဝ် ပရေၚ်ပါ်ပရအ်ကဵုအရီုဗၚ် ကေုာံပရေၚ်ပ္ဍိုက်ဏာ နၚ်ဖိုဟ်ဏီတုဲ ဒးမၚ်စၟဳမံၚ် တၚ်လစွံစိုတ် ညးတာလျိုၚ်မဆေၚ်စပ်တအ်ရဂှ် ဟီုသ္ဂးလဝ်ရ။

သ္အာၚ်နူဂှ်ပၠန် နကဵု UNOCHA ညံၚ်ဂွံက္လိဂွံ အခေါၚ်လုပ်ကဵုရီုဗၚ် ဇရေၚ်ညးဒေသ နွံဒၟံၚ်ပၟိက်တအ် သၠဲသၠဲလးလးဂှ် ရေၚ်တၠုၚ်ဒၟံၚ် ပရေၚ်ပ္ညဳပ္ညပ်သဳကၠဳကဵု ညးပိုၚ်ပြဳအဝဵု ကဆံၚ်နေပျဳဒဝ် ကေုာံကဆံၚ်တွဵုရးတအ်ရဂှ် ကဵုလဝ်သမ္တီရ။

သွက်ဂွံကဵုအရီုဗၚ် ဆေၚ်စပ်ကဵုအရီုဗၚ်ဗ္စာရဏာပရေၚ်မၞိဟ် သွက်ညးဍုၚ်ကွာန် ဒးလဝ်ဘဲဒဏ် လဗိတုတ်ကျာတအ်ဂှ် ၜိုန်ရ UNOCHA အာတ်မိက်လဝ်သြန်ဂအုံ ဇရေၚ်ဂကောံမိတ်ပွံၚ်ဂမၠိုၚ် ဒဝ်ဠာ (၃၃၃)ပြကောဋိကိုတ်ကီုလေဝ် စဵုကဵုလၟုဟ်ဏံ က္လိဂွံလဝ်သြန်ဒဝ်ဠာ (၁၀)ပြကောဋိကိုတ်ဓဝ်ဟေၚ်ရဂှ် ဂွံတီကေတ်ရ။

ဟိုတ်နူလဗိုတ်ကျာ လုပ်လဝ် ပ္ဍဲဂိတုမေ တုဲကၠုၚ်ဏံတုဲ ပ္ဍဲတွဵုရးရခေၚ်၊ တွဵုရးချေၚ်၊ ရးသေတ်ဂါၚ်၊ ရးမဂွေ၊ ကေုာံတွဵုရးကချေၚ်တအ်ဂှ် ညးဍုၚ်ကွာန် ဒးလဝ်ဘဲဒဏ်လဗိုတ်ကျာ မၞုံစဵုကဵု (၁.၆) ပြကောဋိကိုတ်ပြၚ်ရဂှ် ဂွံတီကေတ် အတိုၚ်တၚ်ဂၞၚ်ပ္ဍဲဒေသဂှ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် -CJ (အကာဲအရာလဗိုတ်ကျာ လုပ်လဝ် တွဵုရးရခေၚ်တုဲ)