မတ်မလီု၊ ဂျောန်(၂၅)
ကံၚ်ဇြဳပၞာန်ရပ်ဒက်ဖျေံဒၟံၚ်ထံၚ် ကုညးဒစဵုဒစးကဵုသၞောတ်တၠအဝဵုပၞာန် နနဲကဲစုၚ်ကေုာံ ညးချဳဒရာၚ် ဒဳမဝ်ကရေဇြဳ ပ္ဍဲမွဲကာလဒပ်ပၞာန်သီအဝဵုဏံဂှ် သိုၚ်ဗဒှ်ဒၟံၚ်ထံၚ်စာတ်တၟိ ပ္ဍဲမတ်မလီု မွဲထံၚ်ရဂှ် ညးစုက်လုက်ကဵုထံၚ်စာတ်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ထံၚ်စာတ်တၟိဏံ သိုၚ်ဗဒှ်ဒၟံၚ် ပ္ဍဲကွာန်မေန်ယွာ ပွိုၚ်ဍုၚ်မတ်မလီုတုဲ နကဵုတၟံကၠံမ္ဂး (၈၀) တၟံကၠံပြၚ် အာစိုပ်ဒၟံၚ်ဒတုဲရဂှ် ဂွံတီကေတ်ရ။
ထံၚ်စာၚ်သိုၚ်ခၞံဒၟံၚ်လၟုဟ်ဏံ သိုၚ်ခၞံဒၟံၚ် ကြဴနူဒပ်ပၞာန်သီအဝဵုသ္ကုတ်လကြဴဏံတုဲ ပ္ဍဲမွဲဗွိုၚ်ဂှ် တာဒၞာလဝ် အခေါၚ်ကွဳစက်၊ ကွဳလိုန်ဓာတ် တတ်အာကၠုၚ်ရဂှ် ကောန်ဍုၚ်မတ်မလီုမွဲတၠ ဟီုသ္ဂးလဝ်ရ။
ပ္ဍဲဒၞာဲထံၚ်စာတ်တၟိ သိုၚ်ခၞံဒၟံၚ်ဂှ် မွဲကရောံကဵု သ္ကိုပ်ဝန်ဇၞော်တွဵုရး ကံၚ်ဇြဳပၞာန်ခါန်ကၞက်လဝ် ဥူအံၚ်ကျဳ တုၚ် ညးတာလျိုၚ် ဌာနဝန်ဇၞော်ပရေၚ်ပ္ဍဲဍုၚ်၊ ဌာနက္ဍိုက်က္ဍိုပ်ထံၚ်စာတ်တအ် အာစိုပ်စၟဳစၟတ်လဝ် ပ္ဍဲဂိတုဂျောန် စၟတ်တ္ၚဲ(၂၃) တုဲကၠုၚ်ဏံရ။
ပ္ဍဲထံၚ်စာတ်တၟိမတ်မလီုဂှ် သိုၚ်ခၞံလဝ် စမြိုၚ်ကၚ်ဗဟဵု (၃)ထပ်၊ ဗဒမ်ကောန်ထံၚ်တိက် (၂)ထပ်၊ ဗဒမ်စပုၚ်၊ စဵုဒၞာဒက်လဝ်ကၟိုၚ်၊ သ္ၚိဒၟံၚ်သ္ဇိုၚ်ဝန်တအ် တုဲဒှ်ဒၟံၚ်ရဂှ် ဓမံက်ထ္ၜးလဝ် ပ္ဍဲမုက်လိက်ဇာနှိက် ပရေၚ်မၞိဟ် ဥူအံၚ်ကျဳတုၚ်ရ။
သ္အာၚ်နူဂှ်ပၠန် ပ္ဍဲအခိၚ်ကာလပိုၚ်ခြာလဝ် ညံၚ်ဂွံကိတ်ညဳကဵု တၚ်ပိုၚ်ခြာသၞောတ်ဗ္ၜတ် ညံၚ်ဂွံတုဲဒှ် ဗွဲမဂတာပ်အခိၚ် သွက်ဂွံရေၚ်တၠုၚ်သ္ပကဵုဂရုကီု ဂကောံကုမ္ပဏီပရေၚ်သိုၚ်ခၞံတအ်လေဝ် သွက်ဂွံဘိုၚ်ပံၚ်တောဲရေၚ်တၠုၚ်ကဵု ဒဒှ်ရညးဗတိုက်ဖ္အောဝ်လဝ်ဂှ် ချူပ္တိုန်လဝ်ရ။
ပ္ဍဲတွဵုရးဍုၚ်မန် သီုထံၚ်စာတ်ဗဟဵု၊ အချုက်ထံၚ် ဗဒိုပ်ထံၚ် (၁၁) ဗဒိုပ်နွံတုဲ ပ္ဍဲကဵုဂှ် ကောန်ထံၚ်တြုံဗြဴ ဒးဒုၚ်ဖျေံလဝ်ဒုဟ်ဒဏ် နကဵုဂဗုတ်ပရေၚ်ဍုၚ်ကွာန်တအ်ဂှ် ဖျေံစွံလဝ် ပ္ဍဲထံၚ်သဓီု ကေုာံထံၚ်ဗဟဵုကျာ်မြဟ်ရ။
ပရိုၚ်- သြၚ်လောန်တိုၚ်(မ်)
ဗီုရုပ်-MOI
sanlontai