ပ္ဍဲတိဍာ် KNU ပွိုၚ်မွဲဂိတု ပံၚ်လၟိဟ်ပေါဲဗတိုက် ၄၀၀ ဝါပြၚ် ဒှ်လဝ်

ကအ်ကြိက်၊ ဂျောန်(၂၅)

ပ္ဍဲတိဍာ်ထိၚ်ဒဝ် ဗော်သွးကောန်ဂကူကရေၚ် KNU ပ္ဍဲဂိတုမေ တုဲကၠုၚ် ပွိုၚ်မွဲဂိတုဂှ် အကြာဒပ် ကံၚ်ဇြဳပၞာန်ကဵု ဒပ် KNLA KNDO တအ် ပေါဲဗတိုက် အပံၚ်လၟိဟ် (၄၀၀)ပြၚ် က္တဵုဒှ်လဝ်ရဂှ် ဂွံတီကေတ် အတိုၚ်တၚ်လလောၚ်တြး ရုၚ်ဂအုပ်ပၞာန် ဒပ်ပၞာန်ဗၠးၜးကောန်ဂကူကရေၚ် KNLA ရ။

ဒပ်ပၞာန်ဗၠးၜးကောန်ဂကူကရေၚ် KNLA၊ ဒပ်ပၞာန်စဵုဒၞာကောန်ဂကူကရေၚ် KNDO မၞုံသၟဝ်ဌာန ပရေၚ်စဵုဒၞာ KNU ကဵု ဒပ်ကံၚ်ဇြဳပၞာန်တအ်ဂှ် ပ္ဍဲဂိတုမေ လၟိဟ်ပေါဲဗတိုက် (၄၃၉) ဝါ က္တဵုဒှ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲပေါဲဗတိုက်ဂှ် လ္ပာ်ကံၚ်ဇြဳပၞာန် ဒးချိုတ်လဝ် လၟိဟ် (၃၄၀)တၠနွံတုဲ ညးဒးလဝ်ဘဲဝပ် (၂၈၄)တၠ နွံရဂှ် တၚ်လလောၚ်တြး ရုၚ်ဂအုပ်ပၞာန် KNLA ဟီုသ္ဂးလဝ်ရ။

ပ္ဍဲကဵုပေါဲဗတိုကဂှ် လ္ပာ်ဒပ်သၟဝ်တဲ KNU ဂှ်မ္ဂး သ္ဂံၚ်ပူဇဴဏာလမျီု သွက်ဍုၚ်သွက်ဂကူ (၇)တၠ သ္ဂံၚ်ဇီုကပိုက်ဒးလဝ်ဘဲဝပ် (၂၄)တၠနွံတုဲ ပ္ဍဲကဵုညးသၠးပူဇဴဏာလမျီုကဵု ညးဒးလဝ်ဘဲဝပ်တအ်ဂှ် သ္ဂံၚ် PDF တအ်လေဝ် ပါလုပ်ဒၟံၚ်ရဂှ် ရုၚ်ဂအုပ်ပၞာန် KNLA လလောၚ်တြး ဟီုသ္ဂးလဝ်ရ။

ပ္ဍဲဂိတုဨဗြဴတုဲကၠုၚ်တေံဂှ်မ္ဂး ပ္ဍဲတိဍာ်ထိၚ်ဒဝ် KNU အကြာဒပ်ကံၚ်ဇြဳပၞာန်ကဵု ဒပ် KNLA၊ KNDO တအ် ပေါဲဗတိုက် အပံၚ်လၟိဟ် (၃၈၃) ဝါ က္တဵုဒှ်လဝ်ဂှ် ညးဒးချိုတ်လဝ် လ္ပာ်ကံၚ်ဇြဳပၞာန် (၄၀၆)တၠနွံတုဲ ညးဇီုက ပိုက်ဒးလဝ်ဝပ် (၃၂၀)တၠနွံရဂှ် ဂွံတီကေတ် အတိုၚ်တၚ် လလောၚ်တြးလဝ်ဂှ်ရ။

ပ္ဍဲတိဍာ် KNU ဂှ် မ္ၚးနူပေါဲဗတိုက်တအ်တုဲ ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞောန်တုဲ ကောန်အရာပ်ညးဍုၚ်ကွာန် (၆) ကိုတ်ပြၚ် ဒးဂြိပ်ဒဴပါဲဓလေတ်ဒၟံၚ်ကီု သွက်ညးပါဲဘဲပၞာန်တအ်ဂှ် ဆက်နွံဒၟံၚ်ပၟိက် အရီုဗၚ်ဗ္စာရဏာပရေၚ်မၞိဟ် နဒဒှ်ကာတၟေၚ်ရဂှ် ဂွံတီကေတ် အတိုၚ်တၚ်လဟီု KHRG ရ။

ပရိုၚ်-သြၚ်လောန်တိုၚ်(မ်)

ဗီုရုပ်-KNU