ဂကောံဒေါအ်ပန်ပှော် ၅ ဂကောံကဵု ကံၚ်ဇြဳပၞာန်တံ သွက်ဂွံသဳကၠဳပရေၚ်ၜိုဟ်လလမ် နွံ

လ္ဂုၚ်၊ ဂျောန် (၂၅)

ဂကောံရပ်လွဟ်ကောန်ဍုၚ်အရၚ် (EAO) မထ္ပက်လဝ်စၟတ်တဲ ဒေါအ်ပန်ပှော် NCA ကဵု ကံၚ်ဇြဳပၞာန်တံ ကၠုၚ်စိုပ်အပ္ဍဲအကြာတ္ၚဲတံဏံ သွက်ဂွံသဳကၠဳအာ ပရေၚ်ၜိုဟ်လလမ် နွံဂှ် ညးမၞုံအခေါၚ်ဟီုဂး ဂကောံဒေါအ်ပန်ပှော် ၅ ဂကောံတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပေါဲသဳကၠဳပရေၚ်ၜိုဟ်လလမ်ဂှ်ဝွံ ဟိုတ်နူဂကောံပ္ညဳပ္ညပ်သဳကၠဳပရေၚ်ၜိုဟ်လလမ် ကံၚ်ဇြဳပၞာန် (NSPNC) တုဲ ပ္ဍဲဂိတုဂျောန် ၂၆ စဵုကဵု ၂၈ ကၠုၚ်စိုပ်ဏံ ကၠောန်ဗဒှ်အာ ပ္ဍဲကဵုနေဗျဳဒဝ်ဏောၚ် မဒှ်ရ။

ပေါဲသဳကၠဳပရေၚ်ၜိုဟ်လလမ် ကုကံၚ်ဇြဳပၞာန်ဂှ် ဂကောံဒေါအ်ပန်ပှော် (၅) ဂကောံ ဗော်ဗၠးၜးရးရခေၚ် (ALP) ၊ ကံၚ်ဇြဳၜိုဟ်လလမ်ကရေၚ် (KNU/KNLA-PC) ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် (DKBA) ၊ ဗော်သွးဒဳမဝ်ကရေတ်တေတ်လာဟူ (LDU) ကေုာံ ဂအုပ်ဂကောံဗၠးၜးကောန်ဂကူပအိုဝ် (PNLO) တံ သွက်ဂွံတိုန်စိုပ်အာတုပ်ပ် နွံဒၟံၚ်ရ။

“တုဲကၠုၚ် ပ္ဍဲဂိတုဂျောန် ၁၇ တေံ ပိုယ်တံ NCA-S EAO (၇) ဂကောံတံ ကၠောန်လဝ်ကောံဓရီု ပါလုပ်သီုညးဖအိုတ်မွဲရ။ ပ္ဍဲကဵုဏံ အတိုၚ်တၚ်တုပ်စိုတ် ပိုယ်တံ သီု ၇ ဂကောံဂှ်တုဲ ပေါဲသဳကၠဳဆဵုဂဗ နူကဵု NSPNC တံ မကော်ဘိက်လဝ်ဂှ် တိုန်ညးသ္ကအ်တုပ်ပ်ဏောၚ်။ သှ်ေၜါဂကောံ NMSP ကဵု RCSS တံဂှ်တှ်ေ လ္ဂောံကဵုအကာဲအရာ ဂကောံညးတံလၟုဟ်တုဲ သွက်ဂွံအာမွဲဂကောံတုဲမွဲဂကောံဂှ် ပိုယ်တံ ကေတ်လဝ်တၚ်တုပ်စိုတ်တုပ်ပ်မာန်အိုတ်ရ။ ဟိုတ်ဂှ်ရ ကၠုၚ်စိုပ် ပ္ဍဲပွိုၚ် ၂၆၊ ၂၇၊ ၂၈ ပွိုၚ်ပိတ္ၚဲဏံ နူကဵုဂကောံ NCA-S EAO (၇) ဂကောံဂှ် (၅) ဂကောံ သွက်ဂွံဆဵုဂဗသဳကၠဳ တိုန်စိုပ်တုပ်ပ်ဂှ် ပလေဝ်ပလေတ်လဝ်နွံရ” သာ်ဝွံ ညးသ္ဂးရ။

ပ္ဍဲကဵုပေါဲသဳကၠဳဏံဂှ် ဂကောံဒေါအ်ပန်ပှော် ၅ ဂကောံတံ သွက်ဂွံပ္တိုန်ထ္ၜးသဳကၠဳ ကိစ္စစပ်ကဵု ပရေၚ်စဵု ဒၞါကောန် အရာပ်ဂမၠိုၚ်၊ ပရေၚ်မူသ္ဇိုၚ်ဖေဝ်ဒရေဝ်၊ ညံၚ်ဂွံကလေၚ်စ လၟေၚ်ကမၠောန်ပရေၚ် ၜိုဟ်လလမ်မာန်၊ ညံၚ်ပေါဲသဳကၠဳပရေၚ်ၜိုဟ်လလမ် သီုညးဖအိုတ်ပါလုပ်တံ ဂွံမံက်ဂတဝ်ကၠုၚ်တံ နွံဂှ် ဂွံတီကေတ်ရ။

ကြဴနူသၞာံ ၂၀၂၁ ဒပ်ပၞာန်သီအဝဵုတုဲဂှ် ပေါဲသဳကၠဳပရေၚ်ၜိုဟ်လလမ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မကော်ဘိက်လဝ်ဂှ် ဂကောံ EAO ထ္ပက်လဝ်စၟတ်တဲ ဒေါအ်ပန်ပှော် (၇) ဂကောံဂှ်ကဵု ဂကောံ EAO ဟွံဂွံထ္ပက်လဝ်စၟတ်တဲ (၃) ဂကောံတံ တိုန်စိုပ်သဳကၠဳလဝ် (၄) ဝါဟွံကရ။

တုဲကၠုၚ် ပ္ဍဲဂိတုဂျောန်မံက်တေံဂှ်လေဝ် ဟိုတ်နူကြုက်လုပ်ပ္ညဳပ္ညပ်လဝ်အကြာတုဲ ဂကောံဒပ် မဟာမိတ်ကောဒေံပိဂကောံကဵု ကံၚ်ဇြဳပၞာန်တံ အပ္ဍဲသီအဝဵုပွိုၚ်ၜါသၞာံဏံ နဒဒှ်အလန်ကိုပ်ကၠာအိုတ် ၜိုန်ရဆဵုဂဗလဝ်ညးသ္ကအ် ပ္ဍဲကဵုဍုၚ်မိုၚ်လာ သ္ကုတ်ဗၟံက်တွဵုရးသေံတံဂှ်ကီုလေဝ် လ္တူပရူပရာ မသဳကၠဳတံဂှ် ဟိုတ်နူၜါလ္ပာ်ပ္ညဳပ္ညပ် ဟွံပြေပြံၚ်ဂှ်ရ ပေါဲသဳကၠဳ ဒးလီုအာလဝ်ရောၚ် မဒှ်ရ။

ပရိုၚ်−သြၚ်လောန်တိုၚ်(မ်)

ဗီု−MOI