သ္ၚိဟွံလုပ်သၞောဝ် သိုၚ်လဝ် ပ္ဍဲဍုၚ်ဒဂုၚ်သၠုၚ်ကျာတံဂှ် သွက်ဂွံပါဲကဵု အပ္ဍဲပွိုၚ်မွဲဂိတုဂှ် ကံၚ်ဇြဳပၞာန် ကဵုဒၟံၚ်ဇြဟတ်ဂရိုဟ်

လ္ဂုၚ်၊ ဂျောန် (၂၅)

သ္ၚိသိုၚ်လဝ် ပ္ဍဲကဵုအရာပ် စၟတ် (၇၀) ကဵု အရာပ် (၅၆) ပွိုၚ်ဍုၚ်ဒဂုၚ်သၠုၚ်ကျာ၊ ရးလ္ဂုၚ် လၟိဟ် (၁၀၀) ပြၚ်ဂှ်ဝွံ ဟိုတ်နူနွံဒၟံၚ် လ္တူတိ ဌာနဂဵုလဟဵုတံ ပိုၚ်ပြဳဂှ်ဂးတုဲ အပ္ဍဲပွိုၚ်မွဲဂိတု သွက်ဂွံပါဲကဵုဂှ် ကံၚ်ဇြဳပၞာန် ကဵုကၠုၚ်လဝ်သမ္တီရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

သ္ၚိဒၟံၚ် ကံၚ်ဇြဳပၞာန် ကဵုပါဲဒၟံၚ်ဂမၠိုၚ်ဂှ်ဝွံ ပ္ဍဲလက်ထက်အာန်အေဝ်ဒဳတေံဂှ် ဒဒှ်ရ ဒှ်သ္ၚိသိုၚ်လဝ် လ္တူတိဟွံ လုပ်သၞောဝ်တံဂှ် ပ္တိတ်ကဵုလဝ် တၞးကာဒ်ရောၚ်ဂှ် ဂွံတီကေတ်ရ။

“ကဵုပြံၚ် ပ္ဍဲအခိၚ်ကသီုဏံအတေၚ်ဟီုဂှ် ဒှ်ပြဝဟွံမွဲကဵုဓဝ်ဗ္စာရဏာမၞိဟ်ရဏောၚ်။ ပိုယ်တံဂှ် ဒးဖေက်ဒၟံၚ် သီုဍေံတံဏောၚ်။ မုဂွံဆက်ကၠောန်ဂှ် ဟွံတီရပုဟ်” သာ်ဝွံ ညးဒေသမွဲတၠ ဟီုကဵု ဌာန်ပရိုၚ် သြၚ်လောန်တိုၚ်(မ်) ရ။

သ္အာၚ်နူဂှ်ပၠန် ညးတံဝွံ သိုၚ်လဝ် ပ္ဍဲကဵုဂြိုပ်ဒုန်၊ လ္တူတိဗ္ၚတံဏောၚ် မဒှ်တုဲ မံၚ်ဒၟံၚ် နူကဵုလက်ထက် ဥူတုၚ်ဇြုၚ်တေံရောၚ်ဂှ် ညးဟီုလဝ်ဏီရ။

ကောန်ဗၠာဲ သ္ကိုပ်ဗိုလ်ဇၞော် မေန်အံၚ်လှာၚ်ဂှ် ၜိုန်ရကေတ်လဝ်ဒၞါဲတိဒပ်ပၞာန်ပိုၚ်တံ ကြပ်မးမးဖအိုတ် ကီုလေဝ် ခါန်ညးဍုၚ်ကွာန်တံဂှ် ဒှ်မၞိဟ်မံၚ်ဒၟံၚ် လ္တူတိဌာနဂဵုလဟဵုတံရောၚ်ဂးတုဲ ကဵုပါဲဒၟံၚ်အိုတ်ရ။

ဒပ်ကံၚ်ဇြဳပၞာန်ဝွံ သ္ၚိညးဍုၚ်ကွာန် သိုၚ်လဝ်လ္တူတိဟွံလုပ်သၞောဝ် နူကဵုရးလ္ဂုၚ်ကဵု ရးမာန္တလေဝ်တံဂှ် ကဵုပါဲဒၟံၚ်အတေၚ်တံနွံတုဲ ကဵုသရိုဟ်ပလီုထောံအတေၚ်လေဝ် နွံဒၟံၚ်ရောၚ်ဂှ် ဂွံတီကေတ်ရ။

အလဵုအသဳညဳသၟဟ်ဂကူ NUG ဂှ် စပ်ကဵုပြဝ ဒပ်ကံၚ်ဇြဳပၞာန်တံ မကၠောန်ဒၟံၚ်လ္တူညးဍုၚ်ကွာန်တံဂှ်တုဲ ညံၚ်ဟွံဂွံဆက်ကၠောန်ဂှ် တာဒၞါလဝ်တုဲ သွက်ညးဍုၚ်ကွာန် မဒးဆောံလေၚ်ဒးဂိလဝ်တံဂှ် ဟွံဒေါအ်ဟွံဂွံ ရေၚ်တၠုၚ်ကဵုအာ လၟေၚ်ကမၠောန်ကလေၚ်ပ္တန်ပ္တူတံကဵု ပွဗဗွဲဓဝ်တံဏောၚ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−CJ