သွက်ဂွံထ္မံက်ရုပ်ရဴ Burma Act ဂှ် သဳကၠဳဒၟံၚ်ကဵု အမေရိကာန်

ဝါယှေန်တာန်၊ ဂျောန် (၂၅)

သွက်ပရေၚ်ဂွံထ္မံက်ရုပ်ရဴ Burma Act မသ္ဂောံရီုဗၚ်ထံက်ပၚ်အာ ဂကောံဇြဟတ်ဒစဵုဒစး တၠအဝဵုပၞာန်တံဂှ် ဝန်ဇၞော် NUG တံ ကၠောန်သ္ပလဝ် ပေါဲသဳကၠဳ ကုသၞာဲဒဴအမေရိကာန်တံရောၚ်ဂှ် NUG လလောၚ်ပ္တိတ်လဝ်ပရိုၚ်ရ။

တုဲကၠုၚ် ပ္ဍဲဂိတုဂျောန် (၂၀) တေံ ပ္ဍဲကဵုကၟိန်ဍုၚ်အမေရိကာန်၊ ဍုၚ်ဇၞော်ဝါယှေန်တာန်ဒဳဇြဳ ပ္ဍဲကဵုပေါဲသဳကၠဳရုၚ်ကမၠောန်မူဝါဒ ကေၚ်ကာဍုၚ်ဗၟာ နူကဵု Global Fund For Burma မကၠောန်ဗဒှ်လဝ်ဂှ် သဳကၠဳလဝ်ပရေၚ်ထ္မံက်ရုပ်ရဴ Burma Act ကေုာံ ပရေၚ်တပ်ဒဏ်ကၟာတ်လဒဵုကေတ်ဒုဟ် ကုကံၚ်ဇြဳပၞာန်တံရ။

ပေါဲသဳကၠဳဂှ်ဂှ် ဝန်ဇၞော်ကၟိန်ဍုၚ် NUG ဂမၠိုၚ် ဒံက်တာဇြဝ်ဝေန်သဵု၊ ဥူထေန်လေန်အံၚ်၊ ဒုဝန်ဇၞော် ဥူမိုဝ်ဇြဝ်ဥူ ကေုာံ ပူဂဵုကဵုကသပ်ဗွဲတၟေၚ် တိုက်သြန်ဗဟဵုအခိၚ်အကြာ Sean Turnell တံ တိုန်စိုပ်လဝ်အိုတ်ရ။

မ္ၚးနူညးစၞးကၠတ်ထဝ်အမေရိကာန်၊ ကံၚ်ဇြဳဂီုကၠီုကောန်ဂကူ သ္ၚိဗု သမ္မတအမေရိကာန်တံဂှ်ကဵု ဝန်ဇၞော် NUG တံဂှ် ဂကောံကောန်ဍုၚ်အရၚ် မတိုန်စိုပ်ကၠုၚ်ဂမၠိုၚ်ဂှ်ဝွံ သွက်ဂွံထ္မံက်ရုပ်ရဴ Burma Act မာန်ဂှ် သဳကၠဳလဝ်အိုတ်ရောၚ် ထ္မံက်ထ္ၜးလဝ် ပ္ဍဲကဵုတၚ်လလောၚ်တြး ဌာနဝန်ဇၞော်နဲပညာ ကေုာံ တၚ်နၚ်ပရိုၚ်ဆက်စၠောံ NUG တံရ။

အခက်အခုဲ အကာဲအရာဗလးတိ ဍုၚ်ဗၟာလၟုဟ်ဂှ် ညံၚ်ဂွံဂွံပရေၚ်ထံက်ပၚ်ရီုဗၚ် နူကဵုဍုၚ်သ္အာၚ်တံကဵု အလဵုအသဳအမေရိကာန်တံဂှ်ကီု၊ ကိစ္စထ္မံက်ရုပ်ရဴ Federal Democracy တံဂှ်ကီု၊ ကေၚ်ကာဍုၚ်သ္အာၚ် တံကဵု ပရေၚ်ရေၚ်တၠုၚ် ကုလသမဂ္ဂတံသၟးဟွံက ကိစ္စကေၚ်ကာသၞောဝ်ဥပဒေတံဂှ်လေဝ် သဳကၠဳလဝ်အိုတ်ရောၚ်ဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု− NUG