ပ္ဍဲကဵုသၞေဟ်က္ၜၚ်ကျာဟံၚ်ဂံၚ်ဂှ် က္ၜၚ်ကျာ နူလာၚ်ဍုၚ်သ္အာၚ် ဒှ်ဟိုတ်တုဲ မၞိဟ် (၁၁) တၠ ကလိဂွံဝပ်

ဟံၚ်ဂံၚ်၊ ဂျောန် (၂၅)

က္ၜၚ်ကျာစၟတ် CX880 နူကဵုလာၚ်က္ၜၚ်ကျာ Cathay Pacific ဂှ်ဝွံ ပ္ဍဲကဵုသၞေဟ်က္ၜၚ်ကျာဟံၚ်ဂံၚ်ဂှ် က္တဵုဒှ်လဝ် ပြသၞာစပ်ကဵုနဲကွတ်ပညာမွဲတုဲ ဒဒှ်ရမၞိဟ် ၁၁ တၠ ကလိဂွံလဝ်ဝပ်ဇီုကပိုက်ဒးလဝ်ဂှ် လာၚ်က္ၜၚ်ကျာဂှ် လလောၚ်ပ္တိတ်လဝ်ရ။

ပ္ဍဲကဵုဟိုတ်ဏံဂှ် က္တဵုဒှ်လဝ် ပ္ဍဲဂိတုဂျောန် (၂၄) တေံတုဲ လ္တူက္ၜၚ်ကျာဂှ် ညးယိုက်ဝန်က္ၜၚ်ကျာ ၁၇ တၠကဵု ညးအာတရဴ ၂၉၃ တၠ ပါဗက်ကၠုၚ်လဝ်ရ။ လ္တူက္ၜၚ်ကျာဂှ် ဒဒှ်ရပြသၞာစပ်ကဵုနဲကွတ်ပညာတံ က္တဵုဒှ်ဒၟံၚ်ဂှ် နူကဵုညးယိုက်ဝန်က္ၜၚ်ကျာ စမ်ၜတ်ဂွံဆဵုကေတ်တုဲ ဒေါအ်ထောံလဝ်က္ၜၚ်ကျာဂှ် အတိုၚ်လၟေၚ် ကမၠောန်က္ၜၚ်ကျာတံရောၚ်ဂှ် ဂွံတီကေတ်ရ။

အခိၚ်ဒစးဒုၚ်ကဵုသတိ နူကဵုပါၚ်တြၚ်ပလိုတ်က္ၜၚ်ကျာဂှ် ပရေၚ်ဇီုကပိုက်ကလိဂွံဝပ်တံ က္တဵုဒှ်လဝ်တုဲ ညးအာတရဴဂမၠိုၚ်ဝွံ နူကဵုပါၚ်တြၚ်က္ၜၚ်ကျာ ၅ ပၞော်ဂှ် ဒးသုၚ်စောဲလဝ် Escape Slide တံရောၚ်ဂှ်လေဝ် ဂွံတီကေတ်ရ။

ပ္ဍဲကဵုညးအာတရဴ ၁၁ တၠဂှ် ၉ တၠဂှ်ဝွံ ကြဴနူဒုၚ်လွဳလွတ် ပ္ဍဲကဵုရုၚ်ဂဥုဲတုဲကီုလေဝ် မၞိဟ်ယဲသှ်ေၜါတၠ မ္ဒးဆက်လွဳလွတ်ဒၟံၚ်ဂှ်ကဵု ကောန်သ္ၚိကၟိန်ညးတံဂှ် နူကဵုလာၚ်က္ၜၚ်ကျာဂှ် ဆက်တုဲ ကၠောန်သ္ပဒၟံၚ် ပရေၚ်ထံက်ပၚ်တံရောၚ် ဂွံတီကေတ်ရ။

ဟိုတ်နူညးဍုၚ်ကွာန်အာတရဴတံ ဒးဂဗလဝ်အခက်အခုဲသာ်ဏံဂမၠိုၚ်ဂှ်တုဲ နူကဵုလာၚ်က္ၜၚ်ကျာ Cathay ဒုၚ်တဴဂုဏ် ဗွဲမယျဵုလ္ဂူတပ်တးဂှ် ဟီုဂးလဝ်ရ။

ဂကောံဒပ်ဗၠာဲသၟိၚ် ဌာန်ဗလးရုပ်ရမျာၚ် RTHK ဖျေံသ္ဇိုၚ်ဟံၚ်ဂံၚ်တံ နိဿဲကေတ် ဂလာန်ဂကောံ ဒပ်ဗၠာဲသၟိၚ်တံ မဟီုဂးလဝ်ဂှ်တုဲ ပၞောဝ်ကဵုသၠာက္ၜၚ်ကျာဂမၠိုၚ် သၠာမွဲမဂှ်ဝွံ ဂမ္တဴလောန်ၜက်အာတုဲ က္တဵုဒှ်လဝ် စဵုကဵုဗ္တိုဟ်ထ္ကးရောၚ်ဂှ် ထ္မံက်ထ္ၜးလဝ်ရ။

Source: Reuters/ga