ရေဝ်၊ ဂျောန် (၂၇)
တွဵုရးဍုၚ်မန် ပွိုၚ်ဍုၚ်ရေဝ် ပ္ဍဲကွာန်ဒူရာဂှ် ပ္ဍဲဂိတုဂျောန် (၂၆) အခိၚ်လဒေါဝ်တ္ၚဲ ကောန်ပၞာန်ညး ဍုၚ်ကွာန် သၟဝ်ကံၚ်ဇြဳပၞာန်မွဲတၠ ဒးဒုၚ်ပန်ဂစိုတ်လဝ်တုဲ ညးဗြဴဒေသမွဲတၠလေဝ် ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံရ။
ကောန်ပၞာန်ညးဍုၚ်ကွာန် အာယုက် ၆၄ သၞာံမွဲတၠ ဥူသဵုအံၚ်ဂှ်ဝွံ ပ္ဍဲဂိတုဂျောန် (၂၆) ၜိုတ်အခိၚ်လဒေါဝ် တ္ၚဲ (၁၂) နာဍဳဂှ် အဃောဗက်ပလံၚ် ကမ္မဌာန်အပ္ဍဲကွာန်မွဲဂှ် ဒးဒုၚ်ပန်ဂစိုတ်လဝ် ကဵုသေနာတ်ရ။
ဟိုတ်နူဒးဒုၚ်ပန်ဂစိုတ်လဝ် ကဵုသေနာတ်ဂှ်ရ ကောန်ပၞာန်ညးဍုၚ်ကွာန် ဥူသဵုအံၚ်ဝွံ ကလိဂွံလဝ်ဝပ် ပ္ဍဲကဵုကအ်၊ သၟိပ်၊ သြိုဟ်တံဂှ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
အပ္ဍဲလၟေၚ်ဒဒှ်ပန်ပှော်ဏံ မဇြေန်နဲ ဒၟံၚ်ကွာန်ဒူရေဝ် ညးအာပလံၚ်ကမ္မဌာန်မွဲဂှ်လေဝ် ကလိဂွံလဝ်အာ ဝပ် ပ္ဍဲကဵုထာၚ်ဒဳ ကေုာံ ပ္ဍဲကဵုဇိုၚ်တံရောၚ်ဂှ် ညးဒေသမွဲတၠ ဟီုရ။
ဥူသဵုအံၚ် ကောန်ပၞာန်ညးဍုၚ်ကွာန် မဒးဒုၚ်ပန်ဂစိုတ်လဝ် နကဵုသေနာတ်ဂှ်ဝွံ ဒှ်ကောန်ပၞာန် တြေံမွဲတၠ ဂှ်လေဝ် ဂွံတီကေတ် အတိုၚ်ဂလာန်ညးဒေသတံရ။
ဥူသဵုအံၚ် ကောန်ပၞာန်ညးဍုၚ်ကွာန်ဂှ် နူကဵုဂကောံလကိုဟ်ဍုၚ်ရေဝ်တံ ပန်ပသောၚ်လဝ်ရောၚ် က္ဍိုပ်သ္ကိုပ်ဂကောံလကိုဟ်ဍုၚ်ရေဝ် ချူပ္တိုန်လဝ် လ္တူမုက်လိက် ဇာဇၞိက်ပရေၚ်မၞိဟ်ညးရ။
ဂကောံလကိုဟ်ဍုၚ်ရေဝ်ဝွံ တုဲကၠုၚ် ပ္ဍဲဂိတုဂျောန် (၂၂) တေံလေဝ် ပန်ပသောၚ်လဝ် ညးဗြဴဍုၚ်လၟိုၚ် မွဲတၠ မသ္ပဒၟံၚ်ညးစအကြာ ပ္ဍဲအရာကၠောန်တၞးကာဒ်ကောန်ဍုၚ် ကဵုဒၟံၚ်ပရိုၚ် ရေၚ်တၠုၚ်ဒၟံၚ် ဇရေၚ်ကံၚ်ဇြဳပၞာန်တံဂှ်ရ။
ပ္ဍဲပွိုၚ်ဍုၚ်ရေဝ် တွဵုရးဍုၚ်မန်ဂှ် အပ္ဍဲအခိၚ်သီအဝဵုဏံ ဟိုတ်နူဒပ်ကံၚ်ဇြဳပၞာန်၊ ကောန်ဒပ်ဗၠာဲသၟိၚ်၊ ပၞာန်ညးဍုၚ်ကွာန်သၟဝ်သြဇာကံၚ်ဇြဳပၞာန်တံ သီုကဵုရဲကဵုပရိုၚ်တံ ဒးဒုၚ်ပန်ပသောၚ်ဒၟံၚ်ကီု၊ ရုၚ်နူကဵုဌာန မဆေၚ်စပ်တံ ဒးဒုၚ်ဗ္တိုက်ဒၟံၚ် မွဲဏှမွဲဏှကီုဂှ်ရ ဒှ်ပွိုၚ်ဍုၚ် ကံၚ်ဇြဳပၞာန် လလောၚ်တြးလဝ် နဒဒှ်ပရေၚ်အုပ်ဓုပ်ပၞာန်မွဲရ။
ပရိုၚ်−သြၚ်လောန်တိုၚ်(မ်)
ဗီု-CJ
sanlontai