မတ်မလီု၊ ဂျောန် (၂၇)
အပ္ဍဲအခိၚ်ပၞာန်သီအဝဵု ၜါသၞာံဘာ်ပြၚ်ကၠုၚ်ဏံ ဟိုတ်နူၚုဟ်ထဝ် ကေုာံ ၚုဟ်ဒဝ်ဠာ အပ္ဍဲဍုၚ် မထ္ပက်တိုန် ကၠုၚ်ဒၟံၚ် သိုက်က်ဂှ်တုဲ ဗွဝ်ဖျာတိသ္ၚိကၠအ် နူအပ္ဍဲဍုၚ်မတ်မလီု၊ တွဵုရးဍုၚ်မန်တံ ဂွံသွံကၠုၚ်ဂှ် ဂွံတီကေတ် ဇရေၚ်ညးရေၚ်တၠုၚ်ဖဵုဂမၠိုၚ်ရ။
တုဲကၠုၚ် ပ္ဍဲဂိတုဂျောန် ၂၁ တေံ လ္တူတိုက်သြန် ကံၚ်ဇြဳပၞာန် မထိၚ်ဒက်လဝ် (၂) ဂှ် အလဵုအသဳ အမေရိကာန် ကြဴနူကၟာတ်လဒဵုကေတ်ဒုဟ်တုဲဂှ် မွဲဒဝ်ဠာဂှ် ဒှ်အာ ၃၂၀၀ ဒ္ကေဝ်ပြၚ်၊ ထဝ်ဒကောၚ် မွဲဒ္ကေဝ်ဂှ် ၚုဟ်ထ္ပက်တိုန်အာ စဵုကဵု ၃၂ ကိုဋ်ဒ္ကေဝ်တုဲ ၚုဟ်နှေန်ဟွံညိၚ်ဝတ်တံလေဝ် က္တဵုဒှ်ဒၟံၚ်ရ။
ဟိုတ်နူအကာဲအရာသာ်ဏံတုဲ ညးလှုဲမာန်တံဂှ် ဓလိုက်ကၠုၚ်တမ်ရိုဟ် ပ္ဍဲကဵုဗွဝ်ဖျာတိသ္ၚိကၠအ် မၞုံအပ္ဍဲ ဍုၚ်မတ်မလီုတံအိုတ်ဂှ် ညးရေၚ်တၠုၚ်ဖဵုတိသ္ၚိကၠအ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ထဝ် ကဵု ဒဝ်ဠာဂှ် ဍေံဆက်စပ်ဒၟံၚ်ညးသ္ကအ်ဏောၚ်။ ဆ္ဂး ပ္ဍဲကဵုတိသ္ၚိကၠအ်ဂှ် ဟွံဆက်စပ်ကီုလေဝ် ဂွိၚ်ကၠုၚ်လ္ပာ်ထဝ်တုဲ ဂေတ်ကၠုၚ် လ္ပာ်တိသ္ၚိကၠအ်တံအိုတ်ရ။ ဟွံဓလိုက်တမ်ရိုဟ် လ္ပာ်ဏံရတုဲ တန်တဴကဵု ၚုဟ်တိုန်၊ ဝေၚ်ၚုဟ်တံဂှ်တုဲ နကဵုစိုတ်မဒှ်ဓဝိၚ်ဂှ် စိုပ်အာလ္ပာ်ကလေၚ် ဓလိုက်တမ်ရိုဟ် တံပၠန်ရ” ဂှ် ညးသ္ဂးရ။
အခိၚ်လၟုဟ် အပ္ဍဲဗွဝ်ဖျာတိသ္ၚိကၠအ် မၞုံအပ္ဍဲဍုၚ်မတ်မလီုတံဂှ် တိမွဲဂအာၚ်ဂှ် ၚုဟ်သၠုၚ်တိုန်ကၠုၚ် စဵုကဵု ၅၀ ကိုဋ်တုဲ ဂအာၚ်တိ ၚုဟ်မးမၞုံ မွဲဠက်ကိုဋ်ဒ္ကေဝ်ကဵု ဒ္စါံလ္ၚီကိုဋ်တံဂှ်လေဝ် ရာန်ကၠုၚ်ညးသ္ကအ်အိုတ်ဂှ် ညးဆက်ဟီုလဝ်ရ။
အပ္ဍဲကာလသီအဝဵုဏံ ဟိုတ်နူတိုက်သြန်ဗဟဵု သၟဝ်တဲကံၚ်ဇြဳပၞာန်တံ သၞောတ်ဗ္ၜတ်လဝ် သြန်ဍုၚ်သ္အာၚ် တံဂှ်တုဲ ၚုဟ်ဒဝ်ဠာ ကေုာံ ၚုဟ်ထဝ် သၠုၚ်တိုန်ကၠုၚ် အဆက်က်ကီု၊ ဟိုတ်နူဗွဝ်ဖျာဟွံညိၚ်တုဲ ပွမရာန်ပ္ကောံ ကေုာံ ဓလိုက်တမ်ရိုဟ် လ္တူတိသ္ၚိကၠအ်တံဂှ် သာတုဲဂၠိုၚ်ကၠုၚ်လဝ်ရ။
ညးရေၚ်တၠုၚ်ဒတုဲဖဵုမွဲတၠပၠန်ဂှ်လေဝ် ပြဟ်ဟ်ဏံ တိသ္ၚိကၠအ်တံဂှ် ဂွံသွံရာန်ဂၠိုၚ်ကၠုၚ်တုဲ ညးလှုဲနွံ နူလ္ပာ်ကွာန်ရးတံ ကၠုၚ်ရာန်ဂၠိုၚ်ဒၟံၚ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုဗွဝ်ဖျာတိသ္ၚိကၠအ် တွဵုရးဍုၚ်မန်ဂှ် ပ္ဍဲကဵုအရာပ်မျာၚ်သာယာ ဍုၚ်မတ်မလီု ဂအာၚ်တိ ၄၀/၆၀ ပေ မွဲဂအာၚ်ဂှ် နူ ၅၀၀ ကိုဋ် စဵုကဵု ပွဳပွူ ၇၀၀ ကိုဋ်ဒ္ကေဝ်နွံတုဲ ဂအာၚ်တိ ၆၀/၈၀ မွဲဂအာၚ်ဂှ်လေဝ် ၚုဟ်နွံဒၟံၚ် နူကဵု ၁၈၀၀ ကိုဋ် စဵုကဵု ၂၀၀၀ ကိုဋ်ဒ္ကေဝ်ရောၚ် မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai