ကအ်ကြိက်၊ ဂျောန် (၂၇)
ပ္ဍဲပွိုၚ်ဍုၚ်ကအ်ကြိက် တွဵုရးကရေၚ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ဟိုတ်နူပရေၚ်ပန်ပှော် လွဟ်ဇၞော် ဒပ်ကံၚ်ဇြဳပၞာန်တုဲ သ္ၚိဒၟံၚ်ညးဒေသ ဟွံအောန်နူကဵု (၁၀) မ ဇီုကပိုက်လီုလာ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ကရောၚ်ပၞာန်ကၠဗုရ။
တုဲကၠုၚ် ပ္ဍဲဂိတုဂျောန် ၂၂ တေံ တမ်ဒပ်ကံၚ်ဇြဳပၞာန် ဖျေံသ္ဇိုၚ်ဍုၚ်ကအ်ကြိက်တံ ဟိုတ်နူပန်ပှော် စုတ်လဝ် လွဟ်ဇၞော် အပ္ဍဲကွာန်(ကြောၚ်သျှာကုန်း) သ္ကုတ်သၟဝ်ကျာကအ်ကြိက်ဂှ်တုဲ သ္ၚိဒၟံၚ်ဒေသ ဟွံအောန်နူကဵု ၂ မ ဇီုကပိုက်လီုလာ်အာလဝ်ရ။
သ္အာၚ်နူဂှ်ပၠန် ပ္ဍဲဂိတုဂျောန် ၉ တေံဂှ်လေဝ် ဒပ်ကံၚ်ဇြဳပၞာန်တံ ဟိုတ်နူပန်ပှော်လဝ် လွဟ်ဇၞော်ကြာန်န် ပ္ဍဲကဵုကွာန်(တောၚ်ကြား) သ္ကုတ်သၠုၚ်ကျာကအ်ကြိက်ဂှ်တုဲ သ္ၚိဒၟံၚ်ညးဒေသ ဗ္ဒါဲ (၁၀) မ ဒးလွဟ်ဇၞော်တုဲ ဇီုကပိုက်ဆောံလေၚ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ညးဒုၚ်တာလျိုၚ်လလောၚ်ပရိုၚ် ကရောၚ်ပၞာန်ကၠဗုဂှ် ဒပ်ကံၚ်ဇြဳပၞာန်ဝွံ ပေါဲဗ္တိုက်ဟွံမွဲမွဲသာ် ပ္ဍဲကဵုကွာန် ညးဍုၚ်ကွာန်ကောန်အရာပ်တံ မံၚ်စံၚ်တံဂှ် အရိုဟ်ဒဒှ်တ္ၚဲ ကၠောန်သ္ပပန်ပှော်ဒၟံၚ် လွဟ်ဇၞော်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးဒေသကအ်ကြိက်တံဂှ်ဝွံ ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံတုဲ ဇီုကပိုက်ချိုတ် ဂျိုၚ်တံ နွံဒၟံၚ်တုဲ ဒးဂွိၚ်ဂွါဲဖေက်လကိုတ်ဒၟံၚ် လၟိုန်ရောၚ်ဂှ် ဂွံတီကေတ်ရ။
အပ္ဍဲဂိတုမေ တုဲကၠုၚ်တေံ ပ္ဍဲကဵုခရိုၚ်ဒူပလာယာ ဒပ်မဟာ (၆) KNU ဂှ် ဒပ်ကံၚ်ဇြဳပၞာန် ဟိုတ်နူပန်ပှော် စုတ်လဝ် လွဟ်ဇၞော် (၁၀၀) လ္စုတ်ပြၚ်တုဲ ဟိုတ်နူပရေၚ်ပန်ပှော်ဏံတုဲ ကောန်ၚာ်သၟတ်မွဲတၠ ချိုတ်တုဲ မွဲတၠ ကလိဂွံလဝ်ဝပ်ရောၚ်ဂှ် KNU လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ကၠဗု
sanlontai