ဂၠံၚ်ဗျဳထံၚ်သုလ္ၚဵု မၞုံအပ္ဍဲတွဵုရးဍုၚ်မန်တံဂှ် ဂကောံဇြဟတ်ပၠန်ဂတးတံ စထိၚ်ဒဝ်

ရေဝ်၊ ဂျောန်(၂၇)

တွဵုရးဍုၚ်မန် မွဲဒမြိပ်ဂၠံၚ်ဇၞော်ဗျဳထံၚ်သု စၟတ်(၈)ဂှ် စကၠောန်သ္ပကၠုၚ်မံၚ် ပရေၚ်ထိၚ်ဒဝ်တံတုဲ စဵုကဵုအကာဲအရာသၞောတ်ဗ္ၜတ်မွဲမွဲ ထိၚ်ဒဝ်မာန်ကၠုၚ်လဝ်ယျဂှ် ညးတာလျိုၚ်ကရောၚ်ပၞာန်ပံၚ်ကောံ ဂကောံဇြဟတ်ပၠန်ဂတးတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။

စနူဂိတုဂျောန် စၟတ်တ္ၚဲ(၁၈) တုဲကၠုၚ်တေံ မွဲဒမြိပ် ဂၠံၚ်ဇၞော်စၟတ်(၈) မတ်မလီု၊ မုဟ်ဍုၚ်၊ ဇြပ်ဗု၊ ရေဝ်၊ ထဝါဲ၊ ဗိက်ဂှ် ဒပ်ပၞာန်ဗၠးၜးကောန်ဂကူကရေၚ် KNLA မပါလုပ် ကရောၚ်ပၞာန်ပံၚ်ကောံ ဂကောံဇြဟတ်ပၠန်ဂတးတံ စကၠောန်သ္ပကၠုၚ်လဝ် ပရေၚ်ချဳဒရာၚ်ထိၚ်ဒဝ်တိဍာ်တံရ။

ကရောၚ်ပၞာန်ပံၚ်ကောံတံ သွက်ဂွံထိၚ်ဒဝ်တိဍာ်ဂှ် ပရေၚ်ချဳဒရာၚ်အာကၠုၚ် မွဲဒမြိပ်ဂၠံၚ်ဇၞော်ဗျဳထံၚ်သုစၟတ်(၈)တံ နွံကီုလေဝ် ဟိုတ်နူအကာဲအရာ လ္ပာ်ကံၚ်ဇြဳပၞာန်တံ ပရေၚ်ချဳဒရာၚ်ဟွံမွဲရဂှ်တုဲ စၟတ်သမ္တီထောံ နဒဒှ်ဒေသ ဍေံတံကျအာ ပရေၚ်အုပ်ဓလီုတိဍာ်မာန်မံၚ်ဂှ် ညးတာလျိုၚ် ကရောၚ်ပၞာန်ပံၚ်ကောံ မွဲတၠ သ္ဂးရ။

ကရောၚ်ပၞာန်ပံၚ်ကောံတံဂှ် တွဵုရးဍုၚ်မန်၊ လ္တူဂၠံၚ်ဇၞော်ဗျဳထံၚ်သု စၟတ်(၈)ဂှ် လ္ဂောံကဵုပရေၚ်အုပ်ဓလီုတိဍာ်ကဵု ပရေၚ်ဂီုကၠီုတံတုဲ လ္တူမချဳဒရာၚ်ကၠောန်သ္ပမံၚ် ပရေၚ်စၟဳတ်တံဂှ် လ္ပာ်ကံၚ်ဇြဳပၞာန်တံ ကၠောန်သ္ပကၠုၚ်ကရောၚ်ပၞာန်ထ္ပက်တံ ဟွံမွဲကီုလေဝ် ပ္ဍဲဂိတုဂျောန် စၟတ်တ္ၚဲ(၂၀)ဂှ် နူကဵုဒပ်အမၠံက်ကံၚ်ဇြဳပၞာန်တံ ပန်ပှော်လဝ်ကဵုလွဟ်ဇၞော်ဂှ်ရ ဒတုမ်စှ်ေ ဗ္တိုဟ်ထ္ကးအာလဝ် ပ္ဍဲကၠအ်ထၜိုတ်ညးဒေသတံရ။

ညးမၞုံအခေါၚ်ဟီုဂး KNU ဗဒိုသဝ်ကလာသေဂှ်တှ်ေ ပရေၚ်စၟဳတ် သ္ကုတ်ဂၠံၚ်ဇၞော်ဗျဳထံၚ်သု စၟတ်(၈) ကရောၚ်ပၞာန်ပံၚ်ကောံတံဂှ် ဒှ်အရာဂပ်ဝ်ကၠောန်သ္ပထေက်တုဲ ပ္ဍဲအရာတာဒၞါပရေၚ် ကမၠောန်ကံၚ်ဇြဳပၞာန် တံဂှ် ၜိုတ်သ္ပမာန် သုၚ်စောဲအာ ဂၠံၚ်တရဴနွံပၟိက်တံရောၚ်ဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။

“ဆေၚ်စပ်ကဵု ဂၠံၚ်ရေဝ်-ဇြပ်ဗုဏံဂှ်တှ်ေ ပြဟ်ဟ်ဏံဂှ် က္ဍိုပ်သ္ကိုပ် အာမံၚ်က္ဍိုပ်ပၞောန်ဂတတံရ။ လ္ဂောံကဵုပရေၚ်အုပ်ဓုပ်ကောပ်ကာဲညးတံရ။ တုဲပၠန် အကာဲအရာသီုဖအိုတ်တံဂှ်လေဝ် ပိုဲဟွံဂွံတီကေတ် ချိုတ်တ်ပၠိုတ်တ်သီုဖအိုတ်ဏီပုဟ်။ ၜိုန်ဂှ်လေဝ် ကိစ္စဏံ မုဟိုတ်ပိုဲတံ ဂွံကၠောန်သ္ပလဝ်ရောဟီုတှ်ေ အခိၚ်တ္ၚဲဏံဂှ် ဒှ်အခိၚ် တဝ်စၞေဟ်မံၚ်ကုတၠအဝဵုပၞာန်သီလဝ်အဝဵုတံ အလုံမွဲကၟိန်ဍုၚ်ရ။ မိက်ဂွံသ္ဂးဂှ် အလုံမွဲကၟိန်ဍုၚ်ဂှ် ဟွံဒးစိုတ်တၠအဝဵုပၞာန်ပုဟ်။ ၜိုန်ဂှ်ကီုလေဝ် နူဒပ်ပၞာန်သုၚ်စောဲမံၚ် သၞောတ်တၠအဝဵု ပၞာန်ဏံဂှ် ကဵုမံၚ်ဒဒိုက်ကဵုညးဍုၚ်ကွာန်တံ အဓိကရ။ ဣဏံတှ်ေ ပရေၚ်ကမၠောန်ဒပ်ကံၚ်ဇြဳပၞာန် မဒှ်လေံဒုက်သ္ကအ်တဲ တၠအဝဵုပၞာန် ကဵုမံၚ်ဒဒိုက်ကဵုညးဍုၚ်ကွာန်တံဂှ် ပိုဲတံလေဝ် ပ္ဍဲအရာတာဒၞါတံဂှ် ဂၠံၚ်တရဴနွံပၟိက်တံဂှ် ၜိုတ်ဒှ်မာန် ချပ်တုဲကၠောန်ဏောၚ်။ ဂၠံၚ်ရေဝ်ကဵုဇြပ်ဗုပိုဲတံဂှ်လေဝ် သွက်အဝဵု ပၞာန်ဍေံတံ ဂွံခိုၚ်ဗိုန်ဂှ် ဒှ်ဂၠံၚ်ဒပ်ပၞာန်လေံဒုက်သ္ကအ်တဲဍေံတံ သုၚ်စောဲမံၚ်လၟေၚ်ဍာံဂှ်ရ ပိုဲတံ အရာဏံဂှ် သွက်ဂွံကောပ်ကာဲ ချိုတ်တ်ပၠိုတ်တ်မာန်ဂှ် စဳဇန်ရေၚ်တၠုၚ်လေဝ်ဒှ်ရ။ ဟိုတ်ဂှ်ရ ပ္ဍဲအခိၚ်တ္ၚဲဏံဂှ်တှ်ေ ပ္ဍဲအခိၚ်ညးဍုၚ်ကွာန်ဟွံမွဲပၟိက်ကဵု တၠအဝဵုပၞာန်ဂှ် အရာကၠောန်သ္ပထေက်ဂှ် ပိုဲတံကၠောန်သ္ပလဝ်ရဂှ် အဲ မိက်ဂွံဟီုရ” ဂှ် သ္ဂးရ။

လ္တူဂၠံၚ်ဇၞော်ဗျဳထံၚ်သုစၟတ်(၈) မၞုံအကြာ ဍုၚ်ရေဝ်ကဵု ဍုၚ်ဇြပ်ဗုဂှ် ကရောၚ်ပၞာန်ပံၚ်ကောံ ဂကောံဒပ်KNLA တမ်ဒပ်(၂၇) ကဵု PDF တံ ပါ်(၃)ဒၞါဲတုဲ တုဲကၠုၚ် စနူဂိတုဂျောန် စၟတ်တ္ၚဲ (၁၈)ဂှ် ကွဳစက်အာကၠုၚ်မံၚ် လ္တူဂၠံၚ်ဇၞော်တံဂှ် ဗ္ဒေါံတုဲ ကၠောန်သ္ပလဝ် ပရေၚ်စၟဳတ်တံရ။

အဃောစၟဳတ်မံၚ်ဂှ် မၞိဟ်ဒှ်သံသယ ဆက်စပ်မံၚ်ကဵုကံၚ်ဇြဳပၞာန်တံ (၄)တၠဂှ်လေဝ် ဂွံဆဵုကေတ်လဝ်ဂှ်ရ ထိၚ်ဒဝ်လဝ်တုဲ ဆက်ကၠောန်သ္ပမံၚ် ပရေၚ်စၟဳတ်နွံပၟိက်တံရောၚ်တုဲ စၟဳတ်တုဲမှဟေၚ် လလောၚ်တြးကဵု ချိုတ်တ်ပၠိုတ်တ်ရောၚ်ဂှ် ဒုရုၚ်သ္ကိုပ်ဒေသပၞာန်ပါ်၊ ဒေသပၞာန်ပါ် စၟတ်-၃၊ ခရိုၚ်သ္ကုတ်သၠုၚ်ကျာတံ လလောၚ်တြးလဝ်ရ။

သ္အာၚ်နူဂှ်ပၠန် မတ်မလီု၊ ရေဝ်၊ ဇြပ်ဗုတံဂှ် နဒဒှ် ဒေသအုပ်ဓလီုဖံက်ပၠိုဟ်ဂှ် ပ္ဍဲအရာကၠောန်သ္ပရန်လဝ်ဂှ် ကရောၚ်ပၞာန်ပံၚ်ကောံ KNLA တမ်ဒပ်(၂၇)ကဵု PDFတံ မွဲဒမြိပ်ဂၠံၚ် မတ်မလီု-ရေဝ်- ထဝါဲဂှ် ကေတ်ပရေၚ်အုပ်ဓလီုတိဍာ်တုဲ အဃောကၠောန်သ္ပမံၚ် ပရေၚ်စၟဳတ်လၟေၚ်တ္ၚဲဂှ် မွဲလ္ပာ်ပၠန်ဂှ်လေဝ် ပွိုၚ်ဍုၚ်ရေဝ် ဗ္ဒိုပ်ဗၠာဲသၟိၚ်သၞေဟ်ခရေၚ် မၞုံဗ္ဒါဲဗ္စပ်သၚ်က္ၜဳဂှ် ပ္ဍဲဂိတုဂျောန် (၂၅)ဂှ် ဂကောံဒပ်ပံၚ်ကောံတံ လုပ်စိုပ်ဍိုက်ဗ္တိုက်လဝ်ရ။ အပ္ဍဲပေါဲဗ္တိုက်ဂှ် ဟိုတ်နူလ္ပာ်ကံၚ်ဇြဳပၞာန်တံ ကလေၚ်ပၠန်ဗ္တိုက်ကၠုၚ် ကဵုက္ၜၚ်ကျာဂှ်ရ ညးဒေသကောန်အရာပ် အပ္ဍဲကွာန်သၞေဟ်ခရေၚ်တံ ဇီုကပိုက်ချိုတ်ဂျိုၚ် က္လိဂွံလဝ်ဝပ်တံ နွံလဝ်ရဂှ် ဂွံတီကေတ် နူဇရေၚ်ညးဒေသတံရ။

ပရိုၚ်- သြၚ်လောန်တိုၚ်မ်

ဗီု- SOF