ဟိုက်ဒရိုဝ်ကာဗောန်ဂမၠိုၚ်ဝွံ အနာဂတ်ဂတဏံ ပ္ဍဲကဵုဇြဟတ်ဓာတ်နှဴရဴ အာဇြဳယာန်တံဂှ် ဒှ်ကၠုၚ်အရာပၟိက်ဇၞော်မွဲဏောၚ်

ကွာလာလာမ်ပူ၊ ဂျောန် (၂၇)

ဟိုက်ဒရိုဝ်ကာဗောန်ဂမၠိုၚ်ဝွံ ဟိုတ်နူပရေၚ်ဂီုကၠီုဇြဟတ်ဓာတ်တုဲ ဆက်တုဲတန်တဴအာ နဒဒှ်ဇြဟတ်ဓာတ်နှဴရဴ ပၟိက်ဇၞော် ပ္ဍဲကဵုအာယှဒိုဟ်အဂၞဲဏံရောၚ်ဂှ် သ္ကိုပ်ဝန်ဇၞော်မလေဝ်ယှာ အာန်ဝါအဳဗရာဟေန် ဟီုဂးလဝ် ပ္ဍဲဂိတုဂျောန် (၂၆) တေံရ။

တၚ်ရန်တၟံ ပရေၚ်ဗလးပ္တိတ်သၟုဟ်ဓာတ် ညံၚ်ဂွိုအ်မွဲဏံ ဂွံအံၚ်ဇၞးဂှ် ပရေၚ်သၠဲပ္တိတ် ညံၚ်ပရေၚ်ပိုန်ဒြပ်ဂွံဖောအ်ဗြေဝ်ဂှ်လေဝ် ဒှ်ဟွံထေက်ပုဟ်ဂှ် မေဿတာအာန်ဝါ ဟီုဂးလဝ် ပ္ဍဲကဵုအသေအဟာန်ပံက်ကောံဓရီု Energy Asia နူကဵုကမ္ပဏဳကၠေၚ်ဍေန် ဍုၚ်မလေဝ်ယှာပိုၚ် ပက်ထရောန်နက် ဟီုဂးလဝ်ရ။

“စၞးဏံဂှ် သွက်ဂွံဖအောန်ဖျေံ ပရေၚ်ဖောအ်ဗြေဝ်တောတက် ဍုၚ်အာယှဂမၠိုၚ်ဂှ်ကဵု တၚ်ရန်တၟံကာဗောန်တံမာန်ဂှ် တီကေတ်တာလျိုၚ်တုဲ နကဵုအစဳဇန်သာ်လဵု ဂွံကၠောန်ရော အခေါၚ်အရာသာ်ဏံဂှ် ဒးကေတ်တွဵုရဏောၚ်” သာ်ဝွံ ညးဟီုဂးလဝ်ရ။

အာယှဝွံ ဒှ်ဌာန်ဒတန် သွက်ကၟိန်ဍုၚ် ဗလးပ္တိတ်သၟုဟ်ဓာတ် သ္ၚိဒတန်ဟွံဒးဗြဲကျာဇၞော်အိုတ် လ္တူဂၠးတိမွဲတုဲ အခိၚ်ဍုၚ်တောတက်တံ အာတ်မိက်ဒၟံၚ် အထံက်အပၚ်သြန်လှုဲ နူကဵုညးကၠောန်ပ္တိတ်သၟုဟ်ဓာတ်တံဂှ် ဒေါအ်ဒေၚ်အာ ကၠေၚ်စၞပၟတ်ဇြတၟံတံဂှ်တုဲ သွက်ဂွံသၠုၚ်ပ္တိုန် အပြံၚ်အလှာဲဇြဟတ်ဓာတ်တံဂှ် ကဵုကၠုၚ်လဝ်ကတိကဝတ်နာနာသာ်ရ။

ပ္ဍဲကဵုဍုၚ်ပလံၚ်ပ္တိတ် LNG ဂၠိုၚ်အိုတ် လ္တူဂၠးတိဏံ ၅ ဍုၚ်ဂှ် မလေဝ်ယှာ မဒှ်မွဲဍုၚ်ကီုဂှ် ပ္ဍဲကဵုပရေၚ်နှဴရဴသၟုဟ်ဓာတ်တံဂှ် သၟုဟ်ဓာတ်သဘာဝဝွံ ဒဒှ်ရပါလုပ်ဒၟံၚ် နူကဵုအခန်ကဏ္ဍပၟိက်ဇၞော်တံဂှ် အာန်ဝါ ဟီုဂးလဝ်ရ။

အလဵုအသဳဝွံ သွက်ဂွံကၠောန်ပ္တိတ် နဲကွတ်ပညာကြိုၚ်စွံ ရပ်ကေတ်ကာဗောန် ကဵု ကၠေၚ်စၞပၟတ်ဟိုက်ဒရိုဝ်ဂျေန်တံမာန်ဂှ် ပ္ဍဲကဵုဒုတိယကဝက်သၞာံဏံ လလောၚ်ပ္တိတ်အာ ဗီုတိထ္ၜးဂၠံၚ် မထ္မံက်ထ္ၜးလဝ် တၠုၚ်လအာကၟိန်ဍုၚ် ဗွဲလစှ်ေ ဂှ်ရ။

တၠပညာသိပ္ပံတံဂှ် ပွမကၠောန်ပ္တိတ်နဲကွတ်ပညာတၟိတံဂှ်ဝွံ ဒှ်အဓိကရောၚ် ၜိုန်ရဂးလဝ်ကီုလေဝ် ညံၚ်ဂွံစဵုဒၞါ အသိၚ်ဂၠးတိက္တဴ ညံၚ်ဟွံဂွံဂၠိုၚ်နူကဵုခေတ်ကွတ်စက်တေံ 1.5 ဒဳဂရဳသေန်ဒဳဂြုက်ဂှ် ပွမထပိုတ်ထောံ ပရေၚ်ဗလးပ္တိတ်သၟုဟ်ဓာတ်တံဂှ်ဝွံ ဒဒှ်ရပၟိက်ဇၞော်ဂှ် ဟီုဂးလဝ်ရ။

ဍုၚ်မလေဝ်ယှာဝွံ သၞာံ ၂၀၃၀ ဏံ သွက်ဂွံဖအောန်ဖျေံ ပရေၚ်ကၠောန်ပ္တိတ်သၟုဟ်ဓာတ်မဳတုၚ် ၜိုတ် ၃၀ တၟံကၠံ သွက်ဂွံပါလုပ်အာ ပ္ဍဲကဵုကတိကဝတ်အလုံဂၠးတိဂှ် ဒဒှ်သ္ဂးလဝ်ဗိုန်န်ဗတ်တ်ဂှ် ညးထပ်ဟီုဂးလဝ်ရ။

သ္ကိုပ်သၞာဲဒဴရေၚ်တၠုၚ်ဖဵု နူကဵုဂကောံဍုၚ်ပလံၚ်ပ္တိုန်ကၠေၚ်ဍေန် (OPEC) ၊ အေဂျေန်ဇြဳဇြဟတ်ဓာတ်ကလေၚ်ဒှ်တၟိ အလုံဂၠးတိ (IRENA) ကေုာံ ဇြဝ်ဒဳအရာမ်ဂိုဝ်၊ တိုဝ်တေဝ်အာန်နာဂျဳ ကေုာံ ဗဳတိုဝ်တံဂှ်လေဝ် တိုန်စိုပ်လဝ် ပေါဲသဳကၠဳကွာလာလာမ်ပူတံအိုတ်ရ။

ပ္ဍဲကဵုအသေအဟာန်ဏံဂှ် က္ဍိုပ်သ္ကိုပ်ဇြဟတ်ဓာတ်ဂၠးတိဂမၠိုၚ်၊ ကမ္ပဏဳဂမၠိုၚ် ကေုာံ မၞိဟ်ဖျေံမူဝါဒဂမၠိုၚ်တံ သဳကၠဳဂၠါဲအာသွဟ် အပြံၚ်အလှာဲဇြဟတ်ဓာတ် အပ္ဍဲဒေသတံရောၚ် မဒှ်ရ။

Ref: CNA