ပွိုၚ်ဍုၚ်ရေဝ် ပေါဲဗတိုက်သ္ကာတ်မြဟ်၊ ဒပ်ပၞာန်သုၚ်စောဲက္ၜၚ်ကျာတုဲ ဗတိုက်ပန်ဒၟံၚ်

ရေဝ်၊ ဂျောန်(၂၈)

တွဵုရးဍုၚ်မန် ပွိုၚ်ဍုၚ်ရေဝ် ပ္ဍဲအကြာကွာန်အောၚ်တာယျာကဵု ကွာန်တၟံကၞေၚ်ဂှ် သ္ပတံနူ ဂိတုဂျောန် စၟတ်တ္ၚဲ ၂၇ အခိၚ်နူဂယးတုဲ အကြာဒပ်ကံၚ်ဇြဳပၞာန်ကဵု ဒပ်ဂကောံဇြဟတ်ပၠန်ဂတးတအ် ပေါဲဗတိုက် သ္ကာတ်မြဟ်ဒၟံၚ်တုဲ လ္ပာ်ဒပ်ပၞာန် သုၚ်စောဲက္ၜၚ်ကျာ ဗတိုက်ကၠုၚ်ဒၟံၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ကရောၚ်ပၞာန်ကံၚ်ဇြဳပၞာန် ဇြဟတ်မၞုံ ဗ္ဒာဲ ၁၀၀ ဂှ် ပ္ဍဲဂိတုဂျောန် စၟတ်တ္ၚဲ (၂၆) အခိၚ်ဇိုၚ်သဝ်တ္ၚဲတုဲ ကၠုၚ်တေံ ဟိုတ်နူထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်အောၚ်တာယျာတုဲ ဒှ်လဝ်ပေါဲဗတိုက်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ၊ PDF တအ်ရ။

ပေါဲဗတိုက်ဂှ် ထပ်က္တဵုဒှ်ဒၟံၚ် စဵုကဵုအခိၚ်နူဂယး တ္ၚဲဂှ် ၜိုတ် (၈) နာဍဳတုဲ ပ္ဍဲအခိၚ်ဒေါဝ်တ္ၚဲ ၜိုတ် (၁၁) နာဍဳဂှ်မ္ဂး လ္ပာ်ကံၚ်ဇြဳပၞာန် ကၠုၚ်ပန်လဝ်ကဵုက္ၜၚ်ကျာ (၂) ဖ္ဍိုက်ရဂှ် ဂွံတီကေတ် နူညးဒေသတအ်ရ။

ဟိုတ်နူပေါဲဗတိုက်တုဲ ညးဒေသ နူကဵုကွာန် ၅ ကွာန်ပါလုပ် သီုကွာန်အောၚ်တာယျာ၊ ကွာန်တၟံကၞေၚ် တအ် ဒးဂြိပ်ဒဴပါဲဓလေတ်ဒၟံၚ်တုဲ ညးဒေသလ္ၚဵုဂှ် ဒးဒုၚ်ကၟာတ်ဒၟံၚ် ပ္ဍဲကွာန်နွံရ။

ပေါဲဗတိုက်ၜါလ္ပာ်ဂှ် ပ္ဍဲအခိၚ်ဇိုၚ်သဝ်တ္ၚဲ ၜိုတ်(၃)နာဍဳဂှ် ၜိုန်ရညိၚ်ဝတ်အာ မွဲချိုန်ခနကီုလေဝ် ဟိုတ်နူ အကာဲအရာယှုက်ထုဲဒၟံၚ်တုဲ ဟွံဂွံတီကေတ် အကာဲအရာပရေၚ်ဇီုကပိုက် ဒးချိုတ်လဝ်ဏီရ။

ပ္ဍဲဂိတုဂျောန် စၟတ်တ္ၚဲ (၂၅) ဂှ်လေဝ် နူကဵုဒပ်ပံၚ်ကောံတအ် လုပ်ဗတိုက်လဝ်ဗဒိုပ်ဗၠာဲသၟိၚ် နှေဟ်ခြေၚ် ပွိုၚ်ဍုၚ်ရေဝ်ဂှ် ပေါဲဗတိုက်က္တဵုဒှ်လဝ်တုဲ ဟိုတ်နူဒပ်ကံၚ်ဇြဳပၞာန် ဗတိုက်လဝ်ကဵုက္ၜၚ်ကျာတုဲ ကောန်အရာပ် (၁) တၠ ဒးချိုတ်လဝ်တုဲ ဒးလဝ်ဘဲဝပ် (၄)တၠရ။

ပ္ဍဲပေါဲဗတိုက်နှေဟ်ခြေၚ်ဂှ်မ္ဂး လ္ပာ်ကံၚ်ဇြဳပၞာန် ဒးချိုတ်လဝ် (၉)တၠတုဲ လ္ပာ်ဂကောံဇြဟတ်ပၠန်ဂတး တအ် ပရေၚ်ဇီုကပိုက်ဒးလဝ် မမိက်ကဵုမွဲမွဲ ဟၟဲရဂှ် ဂွံတီကေတ် အတိုၚ်တၚ်လလောၚ်တြး ကရောပ်ပၞာန် ဒပ်ပံၚ်ကောံတအ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-CJ