ဂကောံဒေါံပန်ပှော် ဟွံကေၚ်ဒှ်ပေါဲဗတိုက် (၅) ဂကောံကဵု ကံၚ်ဇြဳပၞာန်တအ် သွက်ဂွံကၠောန် ကောံဓရီု ပရေၚ်ၜိုဟ်လလံ သဳကၠဳဒၟံၚ်

နေပျဳဒဝ်၊ ဂျောန် (၂၈)

ဂကောံရပ်လွဟ်ကောန်ဍုၚ်အရၚ် (EAO)ဒေါံလဝ်ပန်ပှော် ပ္ဍဲမွဲကာလဒပ်ပၞာန်သီအဝဵုဏံ ဟွံကေၚ်ဒှ်လဝ် ပေါဲဗတိုက်ကဵု ကံၚ်ဇြဳပၞာန် မွဲအလှ်ေ ၅ ဂကောံတအ်ကဵု ကံၚ်ဇြဳပၞာန်တအ်ဂှ် သွက်ဂွံကၠောန်ဗဒှ် ကောံဓရီု ပရေၚ်ၜိုဟ်လလံ သဳကၠဳဒၟံၚ်ရဂှ် ဓမံက်လဝ် ပ္ဍဲလိက်ပရိုၚ် ဒပ်ပၞာန်ထိၚ်ဒဝ်လဝ်ဂှ်ရ။

ဂကောံဒေါံပန်ပှော် (EAO) ထ္ပက်လဝ်စၟတ်တဲ လိက်ကသုက် ဒေါံပန်ပှော်အလုံကၟိန်ဍုၚ် (NCA) ၅ ဂကောံတအ်ဂှ် အတိုၚ်တၚ်ကော်ဘိက် ကဝ်မတဳပ္ညဳပ္ညပ်ဓမံက်ရုပ်ရဴ ပရေၚ်ညဳသၟဟ်ကောန်ဂကူ ကေုာံပရေၚ်ၜိုဟ်လလံ ကံၚ်ဇြဳပၞာန် (NSPNC)ဂှ် သ္ပတံနူ ဂိတုဂျောန် စၟတ်တ္ၚဲ (၂၆)တုဲ ဆဵုဂဗသဳကၠဳဒၟံၚ် ပ္ဍဲနေပျဳဒဝ်ရ။

ပေါဲသဳကၠဳဏံဂှ် ညးစၞးဗော်ဗၠးၜးကောန်ဂကူပအိုဝ် (PNLO)၊ ဒပ်ပၞာန်ကရေၚ် ဒတုဲဖိုလ်ဒဳမဝ်ကရေဇြဳ (DKBA)၊ ကံၚ်ဇြဳပရေၚ်ၜိုဟ်လလံကရေၚ် KNU/KNLA-PC၊ ဗော်သွးဒဳမဝ်ကရေတ်တေတ်လာဟူ (LDU) ကေုာံ ဗော်ဗၠးၜးကောန်ဂကူရခေၚ် (ALP)တအ် တိုန်စိုပ်သဳကၠဳဒၟံၚ်ရ။

ပ္ဍဲဂိတုဂျောန် စၟတ်တ္ၚဲ (၂၆) တ္ၚဲပထမဂှ် သဳကၠဳလဝ် တၚ်ဂၞၚ်မိက်ဂွံပလေဝ်ပလေတ် သၞောဝ်သ္ဇိုၚ်ဒက်ပ္တန် ၂၀၀၈ တအ်ကီု၊ သွက်ကိစ္စ ဂွံရေၚ်တၠုၚ်ဓမံက်ရုပ်ရဴ တၚ်ဂၞၚ်တုပ်လဝ်စိုပ် ပ္ဍဲကဵုပေါဲသဳကၠဳလဝ် အခိၚ်တုဲကၠုၚ်တေံရဂှ် လလောၚ်တြးလဝ်ရ။

သ္အာၚ်နူဂှ်ပၠန် ကိစ္စသွက်ဂွံကၠောန်ဗဒှ်ပေါဲကောံဓရီုပရေၚ်ၜိုဟ်လလံ၊ ပရေၚ်ညိၚ်ဝတ် ပ္ဍဲဒေသ ကေုာံ ပရေၚ်ဗတိုက်သရိုဟ်ဂဥုဲၜူမာဲတအ်လေဝ် သဳကၠဳလဝ်ညးသ္ကအ်တုဲ ပ္ဍဲဂိတုဂျောန် စၟတ်တ္ၚဲ (၂၇) ကဵု (၂၈)ဂှ် သွက်ဂွံဆက်သဳကၠဳအာ နွံဒၟံၚ်ရ။

နကဵုသြၚ်လောန်တိုၚ်(မ်) ၜိုန်ရဆက်စၠောံလဝ်ကဵု ညးမၞုံအခေါၚ်ဟီုဂး ဂကောံ EAO ထ္ပက်လဝ်စၟတ်တဲဒေါံပန်ပှော် တိုန်စိုပ်ဒၟံၚ်ပေါဲသဳကၠဳပရေၚ်ၜိုန်လလံ လ္ၚဵုဂှ် နကဵုတေဝ်လဳဖုၚ်ကီုလေဝ် ဒုၚ်တဲဟီုသွဟ်ကဵုလဝ်ဟၟဲရ။

အခက်ခုဲပရေၚ်ဍုၚ်ကွာန်တအ်ဂှ်မ္ဂး ပေါဲဗတိုက်ဗတိုက်သရိုဟ် ကုတ်ဗပိုတ်ရိုဟ်ကၞက် သၞောတ်တၠ အဝဵုပၞာန် ဒပ်လွဟ်ပန်ဂတးဒၟံၚ်ကဵု ကံၚ်ဇြဳပၞာန် အလုံမွဲဍုၚ်ဂှ် ဟိုတ်နူအသိၚ်သ္ကာတ်မြဟ်ကၠုၚ်ဒၟံၚ်တုဲ ပေါဲကောံဓရီုပရေၚ်ၜိုဟ်လလံ ဂွံဒှ်ကၠုၚ် နွံမာန်ဟွံသေၚ်ရဂှ် သ္ၚဳဂၠိပ်လဝ်အိုတ်ရ။

ပ္ဍဲသ္ကုတ်လကြဴနူ ဂိတုဨဗြဴ သၞာံ ၂၀၂၁ ဒပ်ပၞာန်သီကေတ်လဝ်အဝဵုတုဲဂှ် ပေါဲသဳကၠဳပရေၚ်ၜိုဟ်လလံ ဂအုပ်သ္ကိုပ်သ္ကိုပ်ဗိုလ်ဇၞော်မေန်အံၚ်လှာၚ် ကော်ဘိက်လဝ်ဂှ် EAO ထ္ပက်လဝ်စၟတ်တဲ ဒေါံပန်ပှော် ၇ ဂကောံကဵု EAO ဟွံဂွံထ္ပက်လဝ်စၟတ်တဲ ဒေါံပန်ပှော် ၃ ဂကောံ တိုန်စိုပ်သဳကၠဳလဝ် ဟွံအောန်နူ (၄)ဝါ နွံရ။

ပရိုၚ်-သြၚ်လောန်တိုၚ်(မ်)

ဗီုရုပ်-MOI