ဟိုတ်နူဇြဟတ်ဓရိုဟ်ကံၚ်ဇြဳပၞာန်တုဲ Pact Myanmar ကၟာတ်ကမၠောန်ဂလေံသြန်တုဲ တိတ်နူကၟိန်ဍုၚ်ဗၟာပေၚ်ၚ်ဏောၚ် လလောၚ်တြးလဝ်

လဂုၚ်၊ ဂျောန်(၂၈)

သွက်ညးဍုၚ်ကွာန် ၂ ဒသမ ၃ ပြကောဋိကိုတ် ဒၟံၚ်တန်တဴဒၟံၚ်ပ္ဍဲကွာန်ရး ပံၚ်လၟိဟ်ကွာန် ၜိုတ် ၁၅၀၀၀ မၞုံပ္ဍဲကၟိန်ဍုၚ်ဗၟာဂှ် ကမၠောန်ဂလေံသြန် Pact Global Microfinance Fund ( PGMF) ရေၚ်တၠုၚ်ကဵု လဝ်ပွိုၚ် ၂၅ သၞာံပေၚ်ၚ်ဂှ် ဟိုတ်နူဇြဟတ်ဓရိုဟ်ကံၚ်ဇြဳပၞာန် ဟွံဗဗွဲတုဲ ဟွံဆက်ပ္တိုန်စၟတ်သမ္တီတုဲ သြန်ဂလေံသွက်ဂွံက္လိဂွံ နွံဒၟံၚ်ဂှ်လေဝ် လေဲကဵုတုဲ စ္ဍးတိတ်နူကၟိန်ဍုၚ်ရောၚ် လလောၚ်တြးလဝ်ပရိုၚ် ဗွဲမလုပ်သၞောဝ်ရ။

ကမၠောန်ဂလေံကဵုသြန် ပြာကတ်ဒၟံၚ် Pact Myanmar ဂှ် ဒှ်ကမၠောန်ဖျေံသ္ဇိုၚ်အမေရိကာန်တုဲ နဒဒှ်ဂကောံပရေၚ်ပိုန်ဒြပ် ဒးနွံသၟဝ်ပရေၚ်ထိၚ်ဒဝ် ဌာနက္ဍိုက်က္ဍိုပ်ကမၠောန်ကွတ်စက်အဇာဍောတ် ကံၚ်ဇြဳပၞာန်ဂှ် ပ္ဍဲဂိတုဂျောန် စၟတ်တ္ၚဲ (၃၀)ဏံ ဟိုတ်နူကလေၚ်ပ္တိုန်စၟတ်သမ္တီ အလန်လကြဴအိုတ် ဟွံမာန်တုဲ ဒဒှ်ရဒးနုက်တိတ်လဝ်ရဂှ် ညးတာလျိုၚ်ကမၠောန်ဏံ ဟီုသ္ဂးလဝ်ရ။

“ပိုဲဂှ် ဗွဲမအောန်စိုတ်ရ သွက်ဂွံဆက်ဗ္ဂေတ်အာကမၠောန် ပ္ဍဲကၟိန်ဍုၚ်ဏံ ဒှ်ဟွံမာန်ရ။ သွက်ညးဇက် ကေတ်လဝ်ကဵု ညးဖျေံလဝ်သြန် နူကဵုသၞာံတုဲကၠုၚ်တေံ သြန်ကိုတ်ဗွဲမဂမၠိုၚ်ဂှ် ဆာပ်ပရေတုဲ သွက်ဂကောံဏံ ဂွံဆက်ကၠောန်ကမၠောန်မာန် ဖျေံလဝ်ကတောဝ် အလဵုအသဳဗၟာရ။ ပါဲနူတးပါဲလဝ် သွက်ဂွံကဵုအခေါၚ် ပိုဲပ္တိုန်စၟတ်သမ္တီတုဲ အလဵုအသဳဂှ် တိတ်နူကၟိန်ဍုၚ်ဏံတှ်ေတိတ် ဟွံသေၚ်တှ်ေ သွက်ဂွံဗ္ဂေတ်အာကမၠောန်ဟွံလုပ်သၞောဝ် ကဵုလဝ်ဇြဟတ်ဓရိုဟ်ရ” ဂှ် မာဿ Ellen Varney ညးမဒှ်ဥက္ကဋ္ဌ ဂကောံဗုက်ဂှ် ဟီုသ္ဂးလဝ်ရ။

နကဵု Pact Global Microfinance Fund (PGMF) ဂှ် ဟိုတ်နူဂၠံၚ်ဍာန် သွက်ဂွံရုဲစှ်တၞဟ်သ္အာၚ်ဟၟဲဂှ်ရ ဒးစစဳဇန်လဝ် သွက်ကၟာတ်သီကမၠောန်သြန် ပ္ဍဲကၟိန်ဍုၚ်ဗၟာရဂှ်လေဝ် ဟီုသ္ဂးလဝ်ရ။

ပ္ဍဲကာလကံၚ်ဇြဳပၞာန်သီကေတ်အဝဵုတုဲဂှ် ညံၚ် Pact Global Microfinance Fund (PGMF) ဟွံဂွံပ္တိတ်ကဵုသြန်ဂလေံတၟိ ဒးဒုၚ်တာဒၞာလဝ်ကီု ဗဳဇြာက္ဍိုပ်သ္ကိုပ် ဂကောံကဆံၚ်လ္တူတအ်လေဝ် ဒးဒုၚ်ပါဲတးလဝ်ရဂှ် ဂကောံဏံ ဟီုသ္ဂးလဝ်ရ။

သ္အာၚ်နူဂှ်ပၠန် ဟိုတ်နူကံၚ်ဇြဳပၞာန် ကရေပ်ဓရတ်လဝ် ပရေၚ်သၠာဲဂတးသြန်ဍုၚ်သ္အာၚ်တုဲ သွက်ဂွံကဵု အိက်သြန် တၠဂတှ်ဂကောံ PGMF ကီု သြန်ဍုၚ်သ္အာၚ်လုပ်တိတ်တအ်ဂှ် သီုပရေၚ်ပရှ် ဒုၚ်ကဵုလဝ် ပရိုၚ်ဟၟဲမွဲသာ် ပရေၚ်ဒးဒုၚ်ကၟာတ်လဝ်လေဝ် နွံကၠုၚ်ဂှ်ရ သွက်ကမၠောန်ဂွံဆက်ဂေတ်အာ ဒှ်ကၠုၚ်အခက်ခုဲရဂှ် ဟီုသ္ဂးလဝ်ရ။

နကဵု PGMF ဂှ် ဟိုတ်နူပရေၚ်ကဵုဇြဟတ်ဓရိုဟ်ဗီုလၟုဟ်ဏံတုဲ သွက်ဂွံဆက်မံၚ်အာ ပ္ဍဲကၟိန်ဍုၚ်ဗၟာ ဂွံဆက်ကၠောန်အာကမၠောန်ဂှ် ဟိုတ်နူဒှ်ဟွံမာန်ဂှ်ရ ဂတှ်နူညးဂၠေံကဵုလဝ် ၈၉၀၀၀၀ တၠတအ် ဒဝ်ဠာ ၁၅၆ ပြကောဋိကိုတ်ဂှ် သီုတမ်သီုပရဲ ဟွံက္လေၚ်အာတ်တုဲ ကလေၚ်လေဲကဵုလဝ်တုဲ စ္ဍးတိတ်နူကဵုကၟိန်ဍုၚ်ရဂှ် လလောၚ်တြးဟီုသ္ဂးလဝ်ရ။

အခေါၚ်ဒုၚ်စသိုၚ် ညးယိုက်ဝန် ပ္ဍဲကမၠောန်ဖျေံဂလေံသြန် Pact Myanmar ကီု၊ သြန်ဂိတုကဵု အခေါၚ်ဒုၚ်စသိုၚ်တၞဟ်သ္အာၚ်တအ်ဂှ် ဒစးဒုၚ်ကဵုလဝ်တုဲ အခေါၚ်ဒုၚ်စသိုၚ်ထေက်ကဵုဂွံသ္အာၚ်တအ် စရိတ်တ္ၚဲဍာံတအ်ဂှ်လေဝ် ပ္အပ်ကဵုအာရောၚ်ဂှ်လေဝ် လလောၚ်တြးလဝ်ရ။

PGMF ဂှ် ရေၚ်တၠုၚ်ကဵုဒၟံၚ် အပံၚ်လၟိဟ်ကွာန် ပ္ဍဲကၟိန်ဍုၚ်ဗၟာ ဗ္ဒာဲ ၁၅၀၀၀ ပြၚ် အပံၚ်လၟိဟ်ဖံက်သေဝ် ၂ ဒသမ ၃ ပြကောဋိကိုတ်ပွိုၚ် ၂၅ သၞာံ ဇၟာပ်ပ်သၞာံတုဲ ၉၉ တၟံကၠံတအ် ရီုဗၚ်ကဵုလဝ် ညးဗြဴတအ်ရဂှ် ဟီုသ္ဂးလဝ်ရ။

နကဵု Pact Global Microfinance Fund (PGMF) ဂှ် အကာဲအရာကၟိန်ဍုၚ် ဗၟာကလေၚ်ခိုဟ်တိုန် ကၠုၚ်တုဲ ယဝ်ရအခေါၚ်ခိုဟ်နွံကၠုၚ်မ္ဂး သွက်ဂွံကလေၚ်လုပ်ကၠောန်ကမၠောန်ဖျေံသြန်မာန်ပၠန် ပလေဝ်ပလေတ်လဝ်ဒတုဲရဂှ်လေဝ် ဟီုသ္ဂးလဝ် ပ္ဍဲတၚ်လလောၚ်တြးရ။

ပရိုၚ်-သြၚ်လောန်တိုၚ်(မ်)

ဗီုရုပ်- Pact Myanmar