လက်ထက်ကံၚ်ဇြဳပၞာန် ပရေၚ်က္တဵုဒှ် ညးအဝဲဟွံခိုၚ်ကၠိုက်တံ သၠုၚ်တိုန်ကၠုၚ် သ္ဇက်ဒးဂွိၚ်

လဂုၚ်၊ ဂျောန်(၂၈)

ပ္ဍဲဍုၚ်ဗၟာ ပ္ဍဲကာလဒပ်ပၞာန်သီအဝဵုပွိုၚ်(၂)သၞာံပြၚ်ဏံ မ္ၚးနူပဋိပက္ခရပ်လွဟ်ဂှ် ဟိုတ်နူအကာဲအရာတၞဟ်သ္အာၚ်နာနာသာ်တံတုဲ လၟိဟ်ညးအဝဲဟွံခိုၚ်ကၠိုက်တံ သၠုၚ်တိုန်ကၠုၚ် သ္ဇက်ဒးဂွိၚ်ရဂှ် ဥက္ကဌ ကဝ်မတဳပံၚ်ကောံရေၚ်တၠုၚ် အခေါၚ်အရာတုပ်သၟဟ် ညးအဝဲဟွံခိုၚ်ကၠိုက်ဍုၚ်ဗၟာ (MCERP) ဟီုကဵုဌာန်ပရိုၚ်သြၚ်လောန်တိုၚ်မ်ရ။

ပ္ဍဲဟိုတ်ညးအဝဲဟွံခိုၚ်ကၠိုက်တံ ဂွံထပ်ပဵုတိုန်ကၠုၚ်ဂှ်တှ်ေ ညးအဝဲဟွံခိုၚ်ကၠိုက်နူဂဝ်တံလေဝ်နွံကီု ဟိုတ်နူယဲဝေဒနာတုဲ သ္ဒးဒှ်အာညးအဝဲဟွံခိုၚ်ကၠိုက်တံလေဝ်နွံတုဲ ဟိုတ်နူဘဲသဘာဝကဵု ပဋိပက္ခက္တဵုဒှ်မံၚ်လၟုဟ်တုဲ လၟိဟ်ညးအဝဲဟွံခိုၚ်ကၠိုက်တံ သၠုၚ်တိုန်ကၠုၚ်ရ။

ပ္ဍဲတံဏံဂှ် ဟိုတ်နူအကာဲအရာပရေၚ်ဍုၚ်ကွာန်က္တဵုဒှ်မံၚ်လၟုဟ်တံဏံတုဲ ပ္ဍဲဍုၚ်ဒၞါဲပြးဇးတံ ပဋိပက္ခရပ် လွဟ်တံ က္တဵုဒှ်မံၚ်လၟေၚ်တ္ၚဲတုဲ ဟိုတ်နူ ပွဆောံလေၚ်အဝဲအၚ်္ဂဇိုၚ်တဲတံ၊ အာရီုညာတ်တံ၊ အာရီုမိၚ်တံ တုဲလေဝ် ပရေၚ်က္တဵုဒှ် ညးအဝဲဟွံခိုၚ်ကၠိုက်တံ သၠုၚ်တိုန်ကၠုၚ်တီတီဒှ်ဒှ်ရ။ ဥက္ကဌကဝ်မတဳ ပရေၚ်ပံၚ်ကောံရေၚ်တၠုၚ် အခေါၚ်အရာတုပ်သၟဟ်ညးအဝဲဟွံခိုၚ်ကၠိုက်ဍုၚ်ဗၟာ(MCERP) ဥူဇြဝ်လေန်ဂှ်တှ်ေ လၟိဟ်ညးအဝဲဟွံခိုၚ်ကၠိုက်တံဂှ် မ္ၚးနူပွဂြာတ်ဗမ်ကဵုက္ၜၚ်ကျာ ကံၚ်ဇြဳပၞာန်တံကဵု ပွပန်ပှော်အမၠံက်ကြာန်န်တံဂှ် ဟိုတ်နူအာဟာရပိုတ်တံတုဲ ညးအဝဲဟွံခိုၚ်ကၠိုက်တံ ပဵုတုဲဂၠိုၚ်ကၠုၚ်ရဂှ် ဟီုရ။

“ဒၞါဲဒှ်တံဂှ်လေဝ် ဗွဲမဂၠိုၚ်ဟီုတှ်ေ လ္ပာ်နွံဂၠိုၚ်ဂှ်တှ်ေ မၞိဟ်ဂွံဝပ်တံ၊ ဆောံလေၚ်အဝဲအၚ်္ဂတံတုဲ မၞိဟ်ဒှ်အာညးအဝဲဟွံခိုၚ်ကၠိုက်တံလေဝ် လ္ၚီပြၚ်ရ။ ဟိုတ်ဂွံဒှ်ညးအဝဲဟွံခိုၚ်ကၠိုက်တံဂှ်တှ်ေ က္လိဂွံဝပ်ဟီုနူပေါဲဗ္တိုက်တုဲ ဆောံလေၚ်အာ အဝဲအၚ်္ဂဇိုၚ်တဲတံရ။ ညးဍုၚ်ကွာန်ကောန်အရာပ်တံဂှ်လေဝ် ဟွံပါပ္ဍဲပေါဲဗ္တိုက်မွဲသာ် လိုန်ဒးမာၚ်တံဏံတုဲ ဒှ်အာရ။ တုဲပၠန် ဂြာတ်ဗမ်ကဵုက္ၜၚ်ကျာ။ ပန်ပှော်ကဵု အမၠံက်တံကြာန်န်။ ညးဍုၚ်ကွာန်တံ ဇီုကပိုက်၊ ကောန်ၚာ်တံ ဆောံလေၚ်အာ အဝဲအၚ်္ဂဇိုၚ်တဲတံရ။ ဇီုကပိုက်အိုတ်ရ။ ဟိုတ်နူပွဟွံစၚ်ခြၚ် ကြာန်ရောဟ်တံဏံတုဲလေဝ် ဒးဆဵုဂ္ဗမံၚ်ဗီုတံဏံကီုရ။ တုဲပၠန် ဟိုတ်နူအဟာရပိုတ်တုဲဒှ်၊ စၞစတံ၊ ဟိုတ်နူစၞစတံတုဲ မၞိဟ်ဗွဲမဂၠိုၚ်တံ ဒှ်ကၠုၚ်ဒဒိုက်အိုတ်ယျ၊ မၞိဟ်သ္ဇက်စဟွံမွဲဗွဲမဂၠိုၚ်တံလေဝ် ဒှ်မံၚ်အိုတ်ယျ”ဂှ် သ္ဂးရ။

အတိုၚ်လဟီုညးရီုဗၚ်ကဵုမံၚ် ပရေၚ်ညးအဝဲဟွံခိုၚ်ကၠိုက်တံဂှ်မ္ဂး ပ္ဍဲကာလသီအဝဵုဏံ လၟိဟ်ညးအဝဲ ဟွံခိုၚ်ကၠိုက်တံ ထပ်ဂၠိုၚ်တိုန်ကၠုၚ် ကဵုလ္ၚီရဂှ် သ္ၚဳဂၠိပ်လဝ်ရ။

ဆ္ဂး ညးအဝဲဟွံခိုၚ်ကၠိုက်ဗွဲမဂၠိုၚ်ဂှ် ဗီုကၠာတေံ ဟွံဂွံပရေၚ်မၚ်မွဲပရေၚ်ထတ်ယုက်ပေၚ်ၚ်ရတုဲ မ္ၚးနူပရေၚ်စသုၚ်မံၚ်စံၚ်ညးတံဂှ် အခေါၚ်အရာသ္ဇိုၚ်ညးအဝဲဟွံခိုၚ်ကၠိုက်တံ သ္ဒးဂွံထေက်တံဂှ်လေဝ် ဒးဆောံလေၚ်မံၚ်ရဂှ် ဂွံတီကေတ်ရ။

ပရေၚ်အဝဲဟွံခိုၚ်ကၠိုက်တံဂှ် ပ္ဍဲအရာပ်ဒေသ ပေါဲဗ္တိုက်က္တဵုဒှ်တံဂှ် က္တဵုဒှ်မံၚ်ဂၠိုၚ်အိုတ်တုဲ ဟိုတ်နူတိဍာ်ဟွံ ညိၚ်ဝတ်ဂှ်ရ ဒးဒုၚ်စသိုၚ်မံၚ် ကုပြဿနာ ဟွံဂွံပရေၚ်လွဳလွတ်ဂဥုဲ ဗွဲမဂတာပ်အခိၚ်တံပရေံပရေံရဂှ် ဥက္ကဌ ဥူဇြဝ်လေန်ထောန် ဟီုရ။

“အဓိကဂှ်တှ်ေ ဨရိယာ ဒှ်မံၚ်ပဋိပက္ခတံ ပေါဲဗ္တိုက်ပၠန်ဂတးတံဂှ် ပရေံအိုတ်ရ။ ပရေၚ်ဂြာတ်ဗမ် တံလေဝ် ဒးဆဵုဂဗမံၚ်အရိုဟ်တ္ၚဲ၊ ပ္ဍဲဒၞါဲတံဏံဂှ်လေဝ် ပရေၚ်ရေၚ်တၠုၚ်ပရေၚ်ထတ်ယုက် ခိုၚ်ၚ်ကၠိုက်က်ကွေံကွေံ ဂွံဗ္ဒဗ္ဒါဲတုဲ ဂွံလွဳဂှ်လေဝ် ဟွံလောဲပုဟ်။ ဟိုတ်ဂှ်ရလေဝ် ဒေသတံဏံဂှ် ပဵုတုဲတှ်ေ ပရေံရ။ စၞစအဟာရတံလေဝ်အောန်အိုတ်၊ ကမၠောန်တံလေဝ် လီုလာ်အိုတ်ယျ။ အဓိကဂှ်တှ်ေ ဒၞါဲပဋိပက္ခက္တဵုဒှ်မံၚ် သေတ်ကိုၚ်တံ၊ မဂွေတံ၊ ချေၚ်တံ၊ ကချေၚ်တံ၊ သေံတံ၊ ကရေၚ်တံရ။ ပ္ဍဲဒေသကရေၚ်ဍာဲတံဂှ် ပဵုတုဲဒးဒုၚ်စသိုၚ်မံၚ် ပရေံပရေံဏီရ။ လ္တူနူလဂုၚ်တံ ဨရာဝတဳတံဂှ် ညးတံပဵုတုဲဒးဒုၚ်စသိုၚ်မံၚ်ပရေံပရေံရ” ဂှ် သ္ဂးရ။

အပ္ဍဲပေါဲဗ္တိုက် ညးအဝဲဟွံခိုၚ်ကၠိုက်တံ ဟိုတ်နူပါဲဓလေတ်ဒၞါဲဗၠးဘဲတံ ဗွဲမဂတာပ်အခိၚ်ဟွံမာန်ဂှ်ရ ဒးလွဟ်ဇၞော်လွဟ်ဍောတ်တံတုဲ ဒးချိုတ်အာတံနွံတုဲ အဟိန်ပါဲဒဴဘဲပၞာန်ဂှ် ဟွံဂွံပရေၚ်မၚ်မွဲပရေၚ် ထတ်ယုက်ကီု ဟိုတ်နူဒပ်ကံၚ်ဇြဳပၞာန်တံ ရပ်ဒက်ဂစိုတ်ဂယျိုၚ်တံတုဲလေဝ် ဒးချိုတ်အာတံ နွံမံၚ်ရ။

မွဲလ္ပာ်ပၠန် ညးအဝဲဟွံခိုၚ်ကၠိုက်တံဂှ် ပ္ဍဲကာလဒပ်ပၞာန်သီအဝဵုဏံ ပရေၚ်ပညာ၊ ပရေၚ်ထတ်ယုက်၊ အခေါၚ်အရာကမၠောန်မပါလုပ် အခေါၚ်ဂွံဂျိုၚ်လမျီုတံဒှ်တမ် ဒးဆောံလေၚ်မံၚ် ဗ္ဒါဲသီုဖအိုတ်တုဲ ပရေၚ်ဇီုကပိုက် လ္ပာ်စိုတ် လ္ပာ်ကာယတံလေဝ် နွံကၠုၚ်ရဂှ် ညးမရီုဗၚ်ကဵုမံၚ် ပရေၚ်ညးအဝဲ ဟွံခိုၚ်ကၠိုက်တံ သ္ဂးအိုတ်ရ။

ပ္ဍဲဍုၚ်ဗၟာ အတိုၚ်စရၚ်လၟိဟ်မၞိဟ်အခိၚ်အကြာ သၞာံ ၂၀၁၉ဂှ်မ္ဂး လၟိဟ်မၞိဟ်ကၟိန်ဍုၚ် ၁၂ ဒဿမ ၈ တၟံကၠံဂှ် ဒှ်ညးအဝဲဟွံခိုၚ်ကၠိုက်တံတုဲ ဟိုတ်နူပဋိပက္ခက္တဵုဒှ်မံၚ်လၟုဟ်တံတုဲလေဝ် လၟိဟ်ညးအဝဲဟွံ ခိုၚ်ကၠိုက် ထပ်ဂၠိုၚ်ကၠုၚ်မံၚ် အရိုဟ်ဒဒှ်တ္ၚဲရဂှ် ဂွံတီကေတ် အတိုၚ်တၚ်နၚ် ဂကောံရီုဗၚ်ရေၚ်တၠုၚ်မံၚ် ပရေၚ်ညးအဝဲဟွံခိုၚ်ကၠိုက်တံရ။

ပရိုၚ်-သြၚ်လောန်တိုၚ်မ်

ဗီု-CJ