တၞၚ်သဳ၊ ဂျောန် (၂၈)
ဒပ်ကံၚ်ဇြဳပၞာန် ဟိုတ်ဟွံမွဲမွဲသာ် ဟိုတ်နူပန်ပှော်လဝ်လွဟ်ဇၞော် အပ္ဍဲကွာန်ပဝ ပွိုၚ်ဍုၚ်တၞၚ်သဳ ရးဒေသဇၞော်တၞၚ်သဳဂှ်တုဲ ညးဒေသ (၃၀၀၀) ပြၚ်ဝွံ ဒးဂြိပ်ဒဴပါဲဒလေတ်ဒၟံၚ် အခိၚ်ဗ္တံရောၚ်ဂှ် ညးတာလျိုၚ် ပကဖ ပွိုၚ်ဍုၚ်တၞၚ်သဳတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်အမၠံက်ကံၚ်ဇြဳပၞာန် စၟတ် ၃၁၆ ဖျေံသ္ဇိုၚ်ကွာန်မဝ်တုၚ်ဂှ်ဝွံ တုဲကၠုၚ် ပ္ဍဲဂိတုဂျောန် ၂၆ ၜိုတ်အခိၚ်ဇိုၚ် သဝ်တ္ၚဲ ၇ နာဍဳဂှ် ဟိုတ်ဟွံမွဲမွဲသာ် ပန်ပှော်စုတ်လဝ် လွဟ်ဇၞော် အပ္ဍဲကွာန်ပဝ (၅) လ္တုန်ရ။
ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ညးဒေသကွာန်ပဝတံကဵု ညးဍုၚ်ကွာန်ပါဲဒဴဘဲပၞာန်တံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံ အခိၚ်ဗ္တံရောၚ်ဂှ် ဂွံတီကေတ်ရ။
ကွာန်ပဝဝွံ ဒှ်ကွာန်ဇၞော် သ္ၚိ ဗ္ဒါဲ ၁၀၀၀ မနွံတုဲ ဟိုတ်နူပေါဲဗ္တိုက်တုဲ ညးဒေသ နူကဵုကွာန်တၞဟ်ဟ် မကၠုၚ်စိုပ်ပါဲဒလေတ်ဒၟံၚ် ဘဲပၞာန်တံလေဝ် မံၚ်စံၚ်ဒၟံၚ်အိုတ်ရ။
ညးဒေသ မ္ဒးဂြိပ်ဒဴပါဲဒလေတ်ဒၟံၚ် အခိၚ်ဗ္တံတံဂှ်ဝွံ အခိၚ်လၟုဟ်ဂှ် သီုကဵုဇွောံမစၞစကာမံက်တိုန်တံဂှ် အရီုဗၚ်ပရေၚ်ဗ္စာရဏာမၞိဟ်တံလေဝ် နွံပၟိက်ဒၟံၚ်ရောၚ်ဂှ် ညးတာလျိုၚ်ပကဖ ပွိုၚ်ဍုၚ်တၞၚ်သဳ ဟီုရ။
ပ္ဍဲပွိုၚ်ဍုၚ်တၞၚ်သဳ မလလောၚ်တြးလဝ် ပရေၚ်အုပ်ဓုပ်ပၞာန်ဂှ် တုဲကၠုၚ် နူဂိတုဂျောန် (၁၇) စဵုကဵုဂိတုဂျောန် (၁၉) တေံ ဟိုတ်နူပေါဲဗ္တိုက် မက္တဵုဒှ်လဝ်ဂှ်တုဲ ညးဒေသ ၃၀၀၀ ပြၚ် နူကဵုကွာန် ၁၀ ကွာန် သီုကဵုကွာန်ဗာန်ဠဝ်၊ သမဳလှ၊ ညံၚ်ပေန်ကွေန်၊ ဇြေန်ခံၚ်တံ ဒးဂြိပ်ဒဴပါဲဒလေတ်ဒၟံၚ်ရောၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai