ပရေၚ်ပန်ပှော်ၜါလ္ပာ် ပ္ဍဲပွိုၚ်ဍုၚ်ရေဝ် ကောန်အရာပ် (၄) တၠ ဒးလဝ်ဘဲဝပ်

ရေဝ်၊ ဂျောန်(၂၉)

တွဵုရးဍုၚ်မန် ပွိုၚ်ဍုၚ်ရေဝ် ပရေၚ်ပန်ပှော်ၜါလ္ပာ် က္တဵုဒှ်လဝ် ဗ္ဒါဲဒဒန် ၄၀ ပေ ကွာန်ကလအ်ဂှ် ဟိုတ်နူကွဳ စက်သ္ၚိမွဲဖ္ဍိုက် ဒးဒုၚ်ပန်လဝ်တုဲ ကောန်အရာပ် (၄)တၠ ပါလုပ် သီုကောန်ၚာ်မွဲတၠ ဒးလဝ်ဘဲဝပ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဂိတုဂျောန် စၟတ်တ္ၚဲ (၂၈) အခိၚ်နူဂယး ၜိုတ် (၈)နာဍဳဂှ် ကွဳစက်ပၞာန် နူဌာန်ဂအုပ်ကောပ်ကာဲပရေၚ်ပၞာန် စၟတ် (၁၉) ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ရေဝ် မွဲဖ္ဍိုက်ကၠုၚ်ဂေတ်ကၚ်ဂှ် ဂကောံလကိုဟ်ဍုၚ်ရေဝ် ကြတ်ဗတိုက်လဝ်ရ။

ပ္ဍဲပရေၚ်ကြတ်ဗတိုက်ဂှ် ကွဳစက်သ္ၚိ နူလဂုၚ် ဒဳကၠုၚ်လ္ပာ်ထဝါဲမွဲဖ္ဍိုက် ဟိုတ်နူကြေပ်ဂွံပ္ဍဲအကြာ ဒးဒုၚ်ပန်လဝ်တုဲ ကောန်ၚာ် အာယုက်မွဲသၞာံဘာ်မွဲတၠ၊ မၞိဟ်တြုံမွဲတၠ ကေုာံ ညးဗြဴ (၂)တၠ ပါဗက်ကၠုၚ် ပ္ဍဲကွဳစက်ဂှ် ဇီုကပိုက်ဂွံလဝ်ဘဲဝပ်ရ။

ညးဗြဴဒဳကွဳစက် ဒးဒုၚ်ပန်လဝ်ဂှ် ဒးလဝ်ဘဲဝပ်သ္ကာတ်မြဟ်တုဲ ဟိုတ်နူအကာဲအရာဒးဒှ်ဓဝိၚ် ဂွိၚ်ကဵု အန္တရာယ်လမျီုနွံတုဲ နူကဵုရုၚ်ဂဥုဲညးဍုၚ်ကွာန် ပွိုၚ်ဍုၚ်ရေဝ် ပလံၚ်ဗစိုပ်ဏာလဝ် ရုၚ်ဂဥုဲညးဍုၚ် ကွာန်လဂုၚ်ရဂှ် ဂွံတီကေတ်ရ။

က္ဍိုပ်သ္ကိုပ်လကိုဟ်ဍုၚ်ရေဝ်ဂှ်မ္ဂး ပ္ဍဲပရေၚ်ကြတ်ဗတိုက်လဝ် ကွဳစက်ပၞာန်ဂေတ်ကၚ်ဏံ ကောန်ဒပ် ကံၚ်ဇြဳပၞာန် ဒးချိုတ်လဝ် (၅)တၠရဂှ် ချူတြးလဝ် ပ္ဍဲမုက်လိက်ဇာနှိက်ပရေၚ်မၞိဟ်ညးရ။

ပ္ဍဲပွိုၚ်ဍုၚ်ရေဝ် တွဵုရးဍုၚ်မန် လလောၚ်တြးလဝ် ပရေၚ်အုပ်ဓုပ်ပၞာန်ဂှ် အကြာမွဲၜါတ္ၚဲဏံ အကြာဒပ်ပံၚ် ကောံ ဂကောံဇြဟတ်ပၠန်ဂတးတအ်ကဵု ကံၚ်ဇြဳပၞာန် ပေါဲဗတိုက်က္တဵုဒှ်ကၠုၚ်ဒၟံၚ် သိၚ်ၚ်တုဲ ဟိုတ်နူပေါဲ ဗတိုက်ဂှ် ကောန်အရာပ်ညးဍုၚ်ကွာန်တအ် ဇီုကပိုက်ဒးချိုတ်ဒၟံၚ် နွံကၠုၚ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်- ဂကောံရီုဗၚ်ဟံၚ်ပြာ် ပရေၚ်မၞိဟ်ကေုာံ ပရေၚ်ချိုတ်ဂျိုၚ် အောၚ်မၚ်္ဂလာဍုၚ်ရေဝ်